Gun-odenyo ti Pagimbagan nga Ipaay ti 1999 a Programa ti Teokratiko nga Eskuelaan ti Panagministro
1 Ni Jesus ti Nalaing a Mannursuro. ‘Nagsiddaaw unay [dagiti tattao] iti wagas ti panangisurona.’ (Mar. 1:22) Maikagumaantay a tuladen ni Jesus nupay saantayo a mapadaan ti laingna nga agpalawag ken mangisuro. (Ara. 4:13) Tapno maaramidantay dayta, ti pannakipasettayo iti programa ti Teokratiko nga Eskuelaan ti Panagministro tulongannatayo nga agtultuloy a mangparang-ay iti abilidadtayo nga agpalawag ken mangisuro.
2 Iti 1999, kaaduanna a maibasarto ti Paset Num. 1 kadagiti artikulo ti 1997 a magasin a Pagwanawanan ken Agriingkayo! Maparayrayto unay ti pannakaawattayo kadagiti naespirituan a banag no basaentayo a nasakbay daytoy nga impormasion sa kalpasanna imdengantayo dayta iti programa ti eskuelaan. Dagidiay matudingan a mangipaay kadagitoy a makaisuro a palawag mangaramidda koma iti praktikal nga aplikasion ti material, nga isangoda dayta a makapainteres ken nabiag. Maibasarto ti Paset Num. 3 iti libro a Kinaragsak iti Pamilia, ket ti Paset Num. 4 iti maysa a karakter iti Biblia, nupay agsinsinnublat ti pakaadawan ti material kadagitoy a paset. Usigen koma a naimbag ti manangaywan iti eskuelaan ti material sakbay nga itedna dagiti paset. Mapagulidanan koma ti mismo a biag ti pamilia dagiti amin nga estudiante a matudingan a mangipaay iti material manipud iti libro a Kinaragsak iti Pamilia.
3 Iyaplikaryo ti Balakad, ken Agsagana a Naimbag: Mabalintay amin ti rumang-ay iti arte ti panagpalawag ken panangisuro. (1 Tim. 4:13) Gapuna, awatentay koma ti balakad ken ditay pulos matmatan dayta kas banag a masapul a liklikan. (Prov. 12:15; 19:20) Ti epektibo a panangisango iti kinapudno kadagiti gimong ken iti tay-ak ti ministerio ket saan laeng a basta panangisalaysay iti kinapudno wenno panangbasa laeng kadagiti kasuratan. Masapul a danonentayo dagiti puso ken tignayentayo dagidiay dumngeg kadatayo. Maaramidantayo daytoy babaen ti kombinsido a panangipalawagtayo iti kinapudno manipud iti pusotayo. (Idiligyo ti Aramid 2:37.) Ti maibalakad kadatayo iti eskuelaan tulongannatayto a mangaramid iti daytoy.
4 Apaman a makaawatkayo iti paset, panunotenyo dagiti kalidad ti panagpalawag a masapul a parang-ayenyo a maitunos iti nailawlawag iti Giya ti Eskuelaan. Panunotenyo no aniat’ masapul nga aramidenyo tapno mayaplikaryo ti naibalakad kadakayo iti napalabas. Utobenyo a naimbag ti temayo, ti wagas a panangiparangyo iti dayta no kasapulan, ken no kasanoyo nga iyaplikar dagiti kasuratan a masarakan iti material a naituding kadakayo. Panunotenyo ti kasayaatan a panangusaryo iti impormasion a pangisuro ken panggutugot.—1 Tim. 4:15, 16.
5 No maamakkayo nga agpasalista iti eskuelaan, ikararagyo dayta ket kalpasanna ibagayo ti rikriknayo iti manangaywan ti eskuelaan. Magunggonaantay amin babaen ti naan-anay a pananggundawaytayo iti programa a maipresenta iti Teokratiko nga Eskuelaan ti Panagministro iti 1999.