Panagpalista iti Teokratiko nga Eskuelaan ti Panagministro
1 Minilion a Saksi ni Jehova ti sinanayen ti Teokratiko nga Eskuelaan ti Panagministro kas ministro. Adu kadatayo ti makalagip no kasano kakaro ti nerbiostayo idi damo a nagpalistatayo iti daytoy nga eskuelaan, ket itan siyayamantayo a mangbigbig iti akemna iti naespirituan a panagrang-aytayo kas mannursuro iti Sao ti Dios. (Idiligyo ti Aramid 4:13.) Nagpalistakayo kadin iti daytoy nagpaiduma nga eskuelaan?
2 Siasino dagiti mabalin nga agpalista? Kuna ti panid 73 ti Organisado a Mangitungpal ti Ministeriotayo: “Amin dagiti aktibo a naitimpuyog iti kongregasion ti mabalinda ti agpasalista, agraman tattao a kabbaro a tumabtabuno kadagiti gimong, la ketdi no saanda nga agbibiag a maikontra kadagiti Nakristianuan a prinsipio.” Awisentayo amin dagiti kualipikado nga umasideg iti manangaywan iti eskuelaan ket agpalistada.
3 Programa ti Eskuelaan iti 1997: Saklawen ti programa iti Teokratiko nga Eskuelaan ti Panagministro iti 1997 ti nagduduma a sursuro ken karakter iti Biblia, agraman ti pakasaritaan ti organisasion. Mainayon iti panangparang-ay iti abilidadtayo nga agsao ken mangisuro, makasursurotayo kadagiti adu a naespirituan a gameng a masarakan iti kurikulumna iti kada lawas. (Prov. 9:9) No agsaganatayo para iti eskuelaan, a pakairamanan ti linawas a panagbasa iti Biblia, ken regular a tumabunotayo, makagun-odtayo iti dakkel a naespirituan a gunggona iti programa.
4 Iti 1997 ab-ababa ngem kadagiti napalabas a tawen ti kaaduan kadagiti panagbasa iti Biblia para iti Paset Num. 2. No isaganana daytoy, masapul nga orasan a naimbag ti estudiante ti panagbasana sana ikeddeng no kasano kawadwad iti naituding a lima a minuto ti mausarna iti introduksion ken konklusion. Daytoy ti mangipalubos iti estudiante a mangusar a naan-anay iti tiempona ken mangpatanor nga agpadpada iti abilidadna nga agbasa ken iti arte ti panagsao nga ekstemporaneo.—1 Tim. 4:13.
5 Ti impormal a panangasaba ket nainayon a kas posible a buya (setting) para iti Paset Num. 3, a naibasar iti libro a Pannakaammo. Ngarud, mabalin a pilien ti kabsat a babai ti panagsarungkar, pangyadal iti Biblia iti pagtaengan, wenno impormal a panangasaba a kas buya para iti daytoy a paset.
6 Addaankayo man iti pribilehio a mangipaay iti makaisuro a palawag, tampok iti Biblia, wenno paset ti estudiante, maipakitayo ti panangipategyo babaen ti panangisagana ken panangensayo a naimbag iti pasetyo, babaen ti panangiparang a buyogen ti panamati ken kinarayray, a saan a lumbes iti oras, babaen ti panagimdeng ken panangyaplikar iti balakad ti manangaywan iti eskuelaan, ken babaen ti kanayon a panangiparang a simamatalek iti naituding a pasetyo. Iti kasta, ti panagpalistayo iti eskuelaan agbalin a bendision kadakayo ken kadagiti amin a dumngeg kadakayo.