Agtartrabahokay Kadi nga Addaan Panggep?

¹ Ni Jehova ket Dios nga addaan panggep. (Isa. 55:10, 11) Nabalakadantayo a tumulad kenkuana. (Efe. 5:1) Rumbeng a maipakita daytoy iti wagas a panangitungpaltay iti ministeriotayo. Gapuna, maitutop daytoy a saludsod: “Agtartrabahokay kadi nga addaan panggep?”

² Ti panangasabayo iti binalaybalay, iti impormal, ken panagipaima iti literatura ket paset amin ti ministerio nga addaan panggep. Ngem laglagipenyo a saan laeng a panangasaba ti annongentayo no di pay ket panagaramid iti adalan. (Mat. 28:19, 20) Kalpasan ti panangimula kadagiti bin-i ti kinapudno ti Pagarian, nasken nga agsublitayo tapno sibugantayo ida ken regular a taripatuentayo bayat nga agpannuraytay iti panangparang-ay ni Jehova. (1 Cor. 3:6) Nasken a napasnektayo nga agsarungkar ken mangirugi kadagiti panangyadal iti Biblia.

³ Palawaenyo ti Ministerioyo: Kanayon a nasayaat ti rikna no mapanunotmo ti naaramidam iti serbisio ken maikunam: “Naitungpalko ti pinanggepko nga aramiden.” Kas nailanad iti 2 Timoteo 4:5, indagadag ni Pablo: “Naan-anay nga itungpalmo ti ministeriom.” Karaman iti dayta ti ad-adda pay a panangikagumaanyo a mangsurnad iti amin a nasarakan nga interesado. Iti linawas nga eskediulyo iti serbisio, mangiplanokayo iti masnup a tiempo a panagsarungkar. Ikagumaanyo ti mangirugi kadagiti panangyadal iti Biblia kadagidiay agduyos iti kinalinteg. Daytoy koma ti panggepyo no mangaskasabakayo.

⁴ Damagenyo kadagiti agibumbunannag no ania ti riknada idi makitada dagiti iyad-adalanda iti Biblia nga agpabautisar iti asamblea. Nalabit naragsakanda met a kas kadagidiay nabautisaran. Naitungpalda ti naindaklan a panggep! Kastoy ti inyebkas ti maysa nga agar-aramid iti adalan: “Ti panagaramid kadagiti adalan kaipapananna ti panagaramid iti ad-adu pay a mangidaydayaw ken Jehova. Kaipapananna ti biag kadagidiay mangawat iti kinapudno. Pagay-ayatko la unay nga isuro ti kinapudno kadagiti sabsabali​—nakasaysayaat dayta! . . . Adu kadagidiay agayat ken Jehova ti nagbalin a nakasingsinged a gagayyemko.”

⁵ Rabakenyo no adda matulonganyo nga agbalin a dedikado nga adipen ni Jehova! Anian a pakaigapuan ti panagrag-o! Kasta ti ibungana no agtrabahokayo nga addaan panggep iti ministerio.​—Col. 4:17.