Nagannak—Mangipakitakayo iti Nasayaat nga Ulidan Kadagiti Annakyo
1 Kunaen kadatayo ti Sao ti Dios a “ti ama [ken ina] ti nalinteg agragrag-onto unay.” (Prov. 23:24, 25) Anian a bendision kadagiti nagannak a nangipakita iti nasayaat nga ulidan kadagiti annakda! Kinuna ti maysa a miembro ti Branch Committee maipapan kadagiti nagannak kenkuana: “Ti kinapudno ti nakaipamaysaan ti intero a biagda, ket kayatko met nga ipamaysa ti biagko iti dayta.” Aniat’ rumbeng a makita dagiti annak kadagiti nagannak kadakuada?
2 Nasayaat a Kababalin ken Nauneg a Panagraem: Responsabilidad dagiti nagannak nga itukit dagiti nasayaat nga ugali kadagiti annakda. Masursuro dagiti nasayaat a kababalin, saan laeng a babaen iti berbal a panangisuro, no di ket babaen ti panangpaliiw ken panangtulad. Gapuna, ania a kababalin ti ipakpakitayo? Mangmangngegdakay kadi dagiti annakyo a mangibaga iti “dispensarennak,” “pangngaasim,” ken “pagyamanan”? Iti pamilia, adda kadi nauneg a panagraemyo iti tunggal maysa? Agimdengkay aya no agsao dagiti sabsabali? Agimdengkay kadi no makisarita kadakayo dagiti annakyo? Maipakpakita kadi dagitoy a galad agpadpada idiay Kingdom Hall ken uray no dakdakayo idiay pagtaengan?
3 Nabileg nga Espiritualidad ken Naregta a Panagtrabaho: Malaglagip ti maysa a kabsat a lalaki a nagserbi iti amin-tiempo iti nasurok a 50 a tawen: “Nagsayaat a pagulidanan da nanang ken tatang no iti panangipategda kadagiti gimong ken kinaregtada iti ministerio.” Kasanoyo a maipakita kadagiti annakyo a maseknankay iti panangtaginayon iti espiritualidad dagidiay adda iti sangakabbalayanyo? Agtektekstokay kadi a sangsangkamaysa iti inaldaw? Adda kadi regular a panagadalyo a sangapamiliaan? Makitkitadakay kadi dagiti annakyo nga agbasbasa iti Biblia ken kadagiti publikasion ti Sosiedad? Aniat’ mangmangngegda no agkararagkayo a sangapamiliaan? Kasarsaritayo kadi dagiti annakyo maipapan kadagiti banag a makapabileg iti naespirituan, a pagsasaritaanyo dagiti positibo a bambanag maipapan iti kinapudno ken iti kongregasion? Magagarankay kadi a tumabuno kadagiti amin a gimong ken makiraman iti tay-ak ti ministerio kas maysa a pamilia?
4 Nagannak, utobenyo ti ulidan nga ipakpakitayo kadagiti annakyo. Saysayaatenyo dayta, ket ipategdanto iti intero a panagbiagda. Kinuna ti asawa ti maysa nga agdaldaliasat a manangaywan, a nasuroken a 70 ti tawenna: “Tagtagiragsakek pay laeng dagiti gunggona ti nasayaat nga ulidan dagiti naayat a Kristiano a nagannak kaniak. Ket ikarkararagko a sipapasnek nga ipaneknekko ti naan-anay a panangapresiarko iti daytoy a tawid babaen ti siuumiso a panangusarko iti dayta iti amin a tiempo.”