Gimong ti Serbisio iti Oktubre
Lawas ti Oktubre 4
10 min: Lokal a pakaammo. Dagiti napili a Pakaammo iti Ministeriotayo iti Pagarian. Pagsasaritaan dagiti nasasayaat a punto kadagiti kaudian a ruar Ti Pagwanawanan ken Agriingkayo! ket ipakita no kasano a mausar dagitoy iti panagitukon kadagiti magasin iti daytoy ngudo ti lawas. Paregtaen ti amin nga agitukonda kadagiti suskripsion no maitutop, nangnangruna kadagiti panagsarungkar wenno ruta ti magasin.
17 min: “Ti Kinadalus Idayawna ni Jehova.” Saludsod ken sungbat a panangsaklaw ti panglakayen. Ingudo babaen ti ababa a palawag a mangrepaso iti balakad a naipaay iti Hunio 1, 1989, a Pagwanawanan, panid 15-20, nga iyaplikar dagiti punto a maitutop iti lokal a kongregasion.
18 min: Sipapanunotkay Koma Kadagiti Magasin! Dakamaten ti dagup dagiti magasin a naipaima ti kongregasion itay kallabes a bulan. Kasano ti kaaduna daytoy no idilig kadagiti naawat manipud iti Sosiedad? No dakkel ti naggidiatanna, aniat’ kasapulan a maaramid? Awisenyo ti tallaong a komentuanda dagiti sumaganad: (1) Agpedido koma ti tunggal agibumbunannag iti umdas ngem maitutop a suplay. (2) Matmatanyo ti kada Sabado kas Aldaw a Panagmagasin. (3) Iyurnosyo ti personal nga eskediulyo iti serbisio ket iramanyo ti panagmagasin iti kada bulan. (4) Iplanoyo ti ad-adu pay a panangasaba iti di pormal nga usarenyo dagiti magasin a pangirugi iti saritaan. (5) Mangitugotkayo iti naisangsangayan nga artikulo para kadagiti negosiante ken propesional a tattao a nalabit interesado kadagita. (6) Irekordyo a siuumiso dagiti napaimaan, sa mangaramidkayo iti ruta ti magasin, a regular nga iyeganyo ida kadagiti kaudian a ruar. (7) Usarenyo a naimbag ti aniaman a daan a kopia dagiti magasin tapno saan a maurnong. Laglagipenyo a kanayon a naintiempuan ti material a linaon dagiti immun-una a ruar ken makagunggona dayta kadagidiay makasabaantayo, isu a saantayo koma a negatibo a mangitukon kadagita. Ipakita dagiti agdama a magasin, ket dakamaten dagiti artikulo a nalabit mangtukay iti interes. Paidemostra iti maysa a nataengan ken maysa nga agtutubo ti saggaysada nga ababa a presentasion iti magasin.—Kitaenyo ti suplemento ti Enero 1996 a Ministeriotayo iti Pagarian.
Kanta 105 ken pangserra a kararag.
Lawas ti Oktubre 11
10 min: Lokal a pakaammo. Report ti kuenta.
15 min: Lokal a kasapulan.
20 min: “No Kasano nga Ad-adda a Magun-odtayo ti Rag-o Kadagiti Gimong.” Saludsod ken sungbat. Dakamaten dagiti espesipiko a pagarigan no kasanotayo a maipakita ti konsiderasion ken agbalin a makaparegta iti maysa ken maysa kadagiti gimong. Awisenyo dagiti agdengdengngeg a mangisalaysay kadagiti ehemplo manipud iti mismo a kapadasanda.
Kanta 152 ken pangserra a kararag.
Lawas ti Oktubre 18
10 min: Lokal a pakaammo ken dagiti kapadasan iti tay-ak ti serbisio.
13 min: “Umakarkayo Kadi?” Makaparegta a palawag ti sekretario. No makita dagiti agibumbunannag a kasapulan ti umakar iti sabali a kongregasion, nasken a mairuamda a naimbag kadagiti baro nga aglawlawda tapno maliklikan dagiti aniaman a tubeng iti naespirituan. Ipaganetget a nasken nga ipakaammo a nasaksakbay kadagiti panglakayen ti maipapan iti kakasta a plano no mabalbalin ken agpatulong kadakuada a mangbirok iti baro a kongregasion. Nangnangruna a nasken daytoy no umakar iti sabali a pagilian yantangay adu ti kakabsattayo a nakalkaldaang ti napasaranda gapu iti pannakayadayoda iti nateokratikuan a timpuyog bayat nga addada iti sabali a pagilian.
22 min: “Ania ti Ibagayo iti Maysa a Judio?” Saludsod ken sungbat. Ilawlawag ti nagdudumaan ti Orthodox, Repormado, ken Konserbatibo a Judaismo. (Kitaenyo Ti Panangbiruk ti Sangatauan iti Dios, panid 226-7.) Dakamaten dagiti benneg a mabalin a pangipasdekantay iti pareho a paginteresantayo ken iti maysa a Judio. Mangidemostra iti nasayaat ti pannakaisaganana a presentasion. Para iti ad-adu pay nga impormasion maipapan iti Judaismo, kitaenyo ti libro a Panakirinnason, panid 22-3 ken Ti Panangbiruk ti Sangatauan iti Dios, kapitulo 9.
Kanta 142 ken pangserra a kararag.
Lawas ti Oktubre 25
15 min: Lokal a pakaammo. Tulongan ti amin nga agsagana a mangitukon iti broshur a Kalikaguman wenno ti libro a Pannakaammo iti Nobiembre. Ilawlawag no kasano ti mangisagana iti presentasion a mangipamaysa iti saludsod a, “Sungbatan aya ti Dios dagiti kararag?” Usarenyo dagiti punto iti leksion 7 ti broshur wenno kapitulo 16, parapo 12-14, iti libro. Idemostra ti simple a presentasion a mangiraman iti maysa a kasuratan.
15 min: Panagbirok iti Sungbat Kadagiti Saludsod a Nainaig iti Biblia. Umasideg iti ministerial nga adipen ti maysa nga agibumbunannag a nakasarak iti interesado nga addaan iti saludsod a nainaig iti Biblia. Imbes nga ibagana ti sungbat, ilawlawag ti ministerial nga adipen no kasano a biroken dayta. Umuna, irepasona dagiti singasing a masarakan iti Giya ti Eskuelaan, adalen 7, parapo 8-9. Kalpasanna, ammuenda ti sungbat ti maysa a saludsod a masansan a bumangon iti lokal a teritoria. Birokenda dagiti espesipiko a reperensia a mangilawlawag iti dayta a tema ken mangbirokda kadagiti makakombinsir a punto a manglawag iti kangrunaan a rason no apay a kasta ti sungbat ti Biblia. Paregtaen ti tallaong a mangaramid iti kastoy a kita ti makagunggona a panagadal a mangsukimat kadagiti saludsod a nainaig iti Biblia.
15 min: Dagiti Kalat a Mabalintayo nga Ipasdek. Palawag ken pagsasaritaan ti tallaong. Irepaso dagiti praktikal a kalat a naibalabala iti kahon iti panid 11 ti Marso 15, 1997, a Pagwanawanan. Iraman ti pammaregta iti panag-auxiliary wenno panag-regular pioneer. Ilawlawag no kasano a makagunggona a mismo kadatayo ti panangragpat kadagitoy a kalat. Awisen ti tallaong a mangisalaysay iti dadduma kadagiti rag-o a nasagrapda idi naragpatda dagiti teokratiko a kalat.
Kanta 151 ken pangserra a kararag.