“Rumbeng Kadi nga Umakarak?”
1 Kas sungbat iti bilin ni Jesus nga “inkayo . . . mangaramidkayo kadagiti adalan a tattao iti isuamin a nasnasion,” adu a dedikado nga adipen ni Jehova ti immakar tapno agserbida iti lugar nga ad-adda nga agkasapulan. (Mat. 28:19) Tultuladenda ni Pablo, a nangsungbat iti awis nga: “Umallatiwka idiay Macedonia ket tulongannakami.” (Ara. 16:9) Kasano a maaramid daytoy a praktikal?
2 Dikay Agdardarasudos nga Umakar: Adda kadi teritoria iti kongregasionyo a manmano a matrabaho? No kasta, ipamaysayo pay a trabahuen dagidiay a lugar. Sakbay nga ikeddengyo ti umakar, kasaritayo dagiti panglakayenyo tapno tingitingenda no kabaelanyo ti umakar. Mabalinyo met ti agdamag iti manangaywan ti sirkitoyo no adda ammona nga asideg a kongregasion a mabalinyo a pangpalawaan iti ministerioyo. Iti sabali a bangir, kalpasan ti naannad a panangtingiting, mabalin a tarigagayanyo a pagpanunotan ti tumulong iti sabali a paset ti pagilian wenno iti sabali a pagilian. No tarigagayanyo daytoy, agsuratkayo koma a kadua ti bagi dagiti panglakayen iti kongregasionyo iti sanga nga opisina ti lugar a kayatyo a pagserbian, nga ibalabalayo ti teokratiko a takderyo. Mabalin a nainsiriban a pasiaren dayta a lugar sakbay nga ikeddengyo no permanente nga umakarkayo sadiay wenno saan.
3 Agannadkayo iti Iyaakar: Umad-adu dagiti kakabsattayo nga umak-akar kadagiti sabali a pagilian gapu ta agbirbirokda iti nasaysayaat a panagbiag wenno tapno maliklikanda ti pannakairurumen. Kabayatanna, dadduma ti nabiktima dagiti nadangkes a tattao nga agkari a tumulong kadakuada nga agnaed iti baro a pagilian ngem kuartaanda laeng ida sada baybay-an. Iti dadduma a kaso, dagitoy a tattao pilitenda pay dagiti ganggannaet nga adipenen iti imoral a wagas. No agkedkedda, awanen ti tumulong kadakuada iti pagilian a napananda. Gapuna, narigrigaten nga amang ti kasasaad dagiti ganggannaet ngem idi addada iti pagilianda. Mabalin nga agkiddawda pay a makidagus wenno agpatulongda kadagiti kakabsat, a mangpadagsen iti dadduma pay a Kristiano a pamilia nga addaan met kadagiti bukodda a parikut ken pakarigatan. Nasinasina dagiti miembro ti dadduma a sangakabbalayan, ken adda dagiti pamilia a kimmapuy ti espiritualidadda gapu iti kasta a di nainsiriban nga iyaakar.—1 Tim. 6:8-11.
4 No kayatyo ti umakar gapu iti personal a pagimbagan, laglagipenyo nga addada latta parikut uray sadino ti pagnaedanyo. Nalaklaka a sarangten dagiti parikut iti lugar nga ammoyon ti pagsasao ken kulturada, imbes a mangabaruanankayo iti diyo kabesado a lugar.