Umimdengkayo a Naimbag
1 Kasapulan ti disiplina tapno makapagimdeng a naimbag. Kasapulan met a maaddaan ti agdengdengngeg iti tarigagay nga agadal ken makasursuro iti nangngegna. Gapuna, impaganetget ni Jesus a masapul a “siputanyo no kasano ti panagimdengyo.”—Luc. 8:18.
2 Nangnangruna nga agaplikar daytoy no tumabunotayo kadagiti gimong ti kongregasion, asamblea, ken kombension. Dagitoy ti gundaway a masapul nga umimdengtayo a siaannad. (Heb. 2:1) Adtoy ti sumagmamano a punto a tumulong kadakayo a makapagimdeng a naimbag kadagitoy Nakristianuan a taripnong.
◼ Apresiarentayo ti pateg dagiti gimong. Dagita ti kangrunaan a pamay-an tapno ‘masursuruannatayo ni Jehova’ babaen “ti matalek a mayordomo.”—Isa. 54:13; Luc. 12:42.
◼ Agsagana a nasaksakbay. Repasuen ti material a maadal, ket siguraduenyo nga itugot ti Biblia ken ti kopiayo ti publikasion a maadal.
◼ Kabayatan dagiti gimong, ikagumaanyo ti agatension. Liklikanyo ti makisarita kadagiti katugawyo ken kasta met ti kumitakita iti ar-aramiden ti dadduma a timmabuno. Tapno saankayo a masinga, diyo koma pampanunoten no ania ti aramidenyo kalpasan ti gimong wenno maipapan iti dadduma a personal a bambanag.
◼ Utobenyo ti maipalpalawag. Saludsodanyo ti bagiyo: ‘Kasano nga agaplikar daytoy kaniak? Kaano nga iyaplikarko?’
◼ Aginotarkayo iti ababa kadagiti kangrunaan a punto ken teksto ti kasuratan. Daytoy ti tumulong kadakayo a mangipamaysa iti panunotyo iti adda a mapagsasaritaan ken manglagip kadagiti napateg a punto a mausaryonto.
3 Isuroyo Dagiti Annakyo nga Agimdeng: Kasapulan dagiti ubbing ti naespirituan a panangisuro. (Deut. 31:12) Idi un-unana, “dagiti amin nga umdas ti kinasariritna nga umimdeng” iti ili ti Dios masapul nga agimdengda bayat a maibasa ti Linteg kadakuada. (Neh. 8:1-3) No makiraman dagiti nagannak kadagiti gimong ken agimdengda a naimbag, mabalin a tuladen ida dagiti annakda. Saan a nainsiriban a mangitugot iti ay-ayam wenno makoloran a libro tapno adda pakaliwliwaan dagiti ubbing. Makasinga met ti panagimdengda no masansan a mapanda iti kasilias uray no saan a kasapulan. Yantangay “ti kinamaag naisinggalut iti puso ti maysa nga ubing,” ikagumaan koma dagiti nagannak a pagtalinaeden dagiti annakda iti tugawda ken agimdeng kadagiti gimong.—Prov. 22:15.
4 No umimdengtayo a naimbag, mapaneknekantayo a pudno a masiribtayo ken tarigagayantayo ti “gumun-od iti ad-adu pay a pammilin.”—Prov. 1:5.