Itultuloyyo ti “Agaramid iti Nasayaat”
1 Naimbag ti inaramidyo idi nagbalinkayo nga adipen ni Jehova a Dios. Ita nupay kasta, ti karit kadagitoy napeggad a tiempo isu ti panagtultuloy nga “agaramid iti nasayaat.” (Gal. 6:9) Nupay kalikaguman daytoy ti pudpudno a panagregget, maaramidanyo dayta. Kasano?
2 Sukayenyo ti Panagpampanunot ni Jesus: Kas ken Jesus, maanduranyo dagiti suot no agtalinaed a naipamaysa ti panunotyo iti namnama iti Pagarian. (Heb. 12:2, 3) Mangnamnamakayo nga ay-ayatennakay ni Jehova ken kayatna nga agballigikayo. (2 Ped. 3:9) Naan-anay nga agtalekkayo kenkuana, a namnamaenyo a tulongannakayo. (1 Cor. 10:13) Reggetanyo ti agkararag, nga idawatyo ken Jehova a tulongannakayo nga agibtur. (Roma 12:12) Agrag-okayo agsipud ta ammoyo a ti panagibturyo ket mangiturong iti iyaanamong ti Dios. (Roma 5:3-5) Ti kinamatalekyo iti panangsukay iti “kababalin ti isip a naadda ken Kristo Jesus” ket mangyeg kadakayo iti personal a pannakapnek ken mangparagsak iti puso ni Jehova.—Roma 15:5; Prov. 27:11.
3 Itultuloyyo ti Agaramid iti Naimbag: Naan-anay nga aprobetsarenyo dagiti probision nga impaay ni Jehova kadagiti adipenna a tumulong kadakuada nga agtultuloy nga agaramid iti nasayaat. Taginayonenyo ti nasayaat a personal a rutina iti panagbasa iti Sao ti Dios ken panagadal kadagiti naibatay-Biblia a publikasion ti klase matalek ken masirib nga adipen. Regular nga agsagana, tumabuno, ken makipasetkayo iti amin a gimong ti kongregasion. Sakbay ken kalpasan dagiti Nakristianuan a gimong, sidedekket a makilangenkayo kadagiti kakabsatyo iti naespirituan. Mangaramidkayo kadagiti realistiko a kalat iti ministerio tapno nabunga ti panagserbiyo iti tay-ak ken tapno maparang-ay ti abilidadyo a mangiparang iti naimbag a damag kadagiti dadduma.
4 Iti daytoy a pamay-an a makapagtultuloykayo nga agaramid iti nasayaat ken kasta met a mapasaranyo ti dakkel a rag-o. Maipapan iti daytoy, kinuna ti maysa a kabsat a lalaki idiay Italia: “No rumabiin, ken agawidakon kalpasan ti agmalem a panagserbik ken Jehova, mariknak a nabannogak. Ngem naragsakak, ket agyamanak ken Jehova iti panangipaayna kaniak iti rag-o a di pulos maikkat ti asinoman.” Gapuna, itultuloyyo ti agaramid iti nasayaat, ket sagrapenyonto met ti napalaus a rag-o.