Baro a Programa ti Asamblea Sirkito
Ti maysa a depinasion ti panagbuteng ket “nauneg a panagraem ken panagamak, nangnangruna iti Dios.” Iladawan daytoy ti umiso a panagbuteng a dinakamat ti Kasuratan a kas “punganay ti sirib.” (Sal. 111:10) Maisupadi iti dayta, sabali a kita ti panagbuteng ti agraraira iti lubong ni Satanas iti aglawlawtayo. Kasanotay a maliklikan dayta di umiso a rikna bayat a patanorentayo ti nadayaw a panagbuteng ken Jehova? Masungbatan daytoy a saludsod iti baro a programa ti asamblea sirkito para iti 2002. Ti temana ket “Agbutengkayo iti Dios ket Idayawyo.” (Apoc. 14:7) Matarusantayto ti nadumaduma a wagas no kasano a ti panagbuteng ken Jehova ket makagunggona kadatayo kas indibidual ken kas grupo.
Nupay ti panagbuteng mabalin nga ipasimudaagna ti panagdanag wenno kinaawan iti tured ken panagkedked a mangsango iti narigat a kasasaad, kuna ti Biblia: “Naragsak ti tunggal maysa nga agbuteng ken Jehova.” (Sal. 128:1) Ipakita ti programa ti asamblea no kasanotay a mapagballigian dagiti karit iti pudno a panagdayaw. Maammuantayto no kasano a tulongan dagiti kabbaro a mangpatanor iti kasta nga umiso a panagbuteng iti Dios, a mangtignay kadakuada nga agserbi iti Dios iti amin a puso, kararua, panunot, ken pigsada. (Mar. 12:30) Ti umuna nga aldaw agngudonto iti palawag ti manangaywan iti distrito nga “Umadani nga Ad-adda Kadagidiay Ay-ayatenyo.” Ilawlawagna no kasano a makapagtalinaedtayo a nasiput iti panangikagumaan ti Diablo a mangyadayo kadatayo ken Jehova, iti pamiliatayo, ken kadagiti Kristiano a kakabsattayo.
Ti tema ti nagkapat a paset ti simposium iti maikadua nga aldaw ket “Agbutengkayo ken Jehova, Saan nga iti Tattao.” Ilawlawagna no kasano ken apay a masapul a parmekentayo ti aniaman a buteng a manglapped kadatayo a naan-anay a mangitungpal iti ministeriotayo wenno mangtaginayon iti kinatarnaw ken nadalus a konsiensiatayo idiay eskuelaan ken iti pagtrabahuan. Ti palawag publiko nga “Agbutengkayo iti Dios ken Salimetmetanyo Dagiti Bilinna” ket naibatay iti agsasaruno a pasamak a nadakamat iti Apocalipsis kapitulo 14. Magibusan ti asamblea sirkito iti makaparegta a pammagbaga nga “Itultuloyyo ti Magna iti Panagbuteng ken Jehova.”
Ti Teokratiko nga Eskuelaan ti Panagministro, modelo a Gimong ti Serbisio, palawag ti bautismo, ken ti sumario ti Panagadal iti Pagwanawanan ket kanayonan a tampok ti programa a diyo kayat a liwayan. Awisenyo a tumabuno ti iyad-adalanyo iti Biblia. No adda agtarigagay nga agpabautisar, ibagana koma a dagus dayta iti mamangulo a manangaywan. Kayattay amin nga ipakita ti umiso a panagbuteng ken Jehova ken idaydayaw babaen ti ditay panangliway iti daytoy naisangsangayan a programa!