Nagannak—Sanayenyo Dagiti Annakyo Manipud Kinamaladaga
1 “Sanayem ti ubing sigun iti dalan nga agpaay kenkuana; uray no lumakay saanto a sumiasi iti dayta.” (Prov. 22:6) Nagannak, no diyo kayat a “sumiasi” dagiti annakyo iti dalan ti kinapudno, kaano a rumbeng nga irugi ti kasta a panangsanay? Manipud kinamaladaga!
2 Kinuna ni Pablo a nasursuruan ni Timoteo iti naespirituan “manipud kinamaladaga.” (2 Tim. 3:14, 15) Kas resultana, nagbalin ni Timoteo a nagsayaat a naespirituan a tao. (Fil. 2:19-22) Nagannak, masapul a rugianyo met a sanayen dagiti annakyo “manipud kinamaladaga” tapno ‘dumakkelda iti sango ni Jehova.’—1 Sam. 2:21.
3 Ipaayyo ti Danum a Kasapulanda iti Panagdakkel: Kas iti babassit a kayo a masapul a masibugan a kanayon tapno dumakkelda, aniaman ti edad dagiti annak, nasken met a maipaayanda iti danum ti kinapudno a masarakan iti Biblia tapno dumakkel ken agmataenganda kas ad-adipen ti Dios. Ti kangrunaan a pamay-an tapno maisuro ti kinapudno kadagiti annak ken sumingedda iti Dios ket babaen ti regular a sangapamiliaan a panagadal iti Biblia. Ngem dakayo a nagannak, masapul nga ikonsideraryo no kasano kapaut ti kabaelan ti anakyo nga agimdeng. Kadagiti ubbing, mabalin nga ad-adda nga epektibo ti masansan ken ab-ababa a panagadal ngem iti manmano ngem napaut unay a panagadal.—Deut. 11:18, 19.
4 Diyo tagibassiten ti kabaelan ti annakyo nga agsursuro. Estoriaenyo kadakuada ti maipapan kadagiti tattao a naisalaysay iti Biblia. Bay-anyo ida a mangidrowing kadagti eksena iti Biblia wenno paidemostrayo dagiti pasamak iti Biblia. Usarenyo a naimbag dagiti video ken audiocassette, agraman dagiti drama a naibatay iti Biblia. Ibagayyo ti panagadal ti pamiliayo iti edad ken abilidad dagiti annakyo a makasursuro. Ti damo a panangsanay ket mabalin a saggabassit ken maipapan kadagiti simple a banag; ngem bayat a dumakdakkel ti ubing, iyad-adu ti isuroyo ken ad-adda koma a progresibo. Pagbalinenyo a nabiag ken saan a makauma ti panagadalyo iti Biblia. No kayatyo a ‘patanoren ti panagtarigagay’ ti annakyo iti Sao, pagbalinenyo a makapainteres ti panagadal.—1 Ped. 2:2.
5 Iramanyo Ida iti Kongregasion: Mangaramidkayo kadagiti progresibo a kalat para kadagiti annakyo tapno naan-anay a makiramanda iti kongregasion. Ania ti umuna a kalatda? Kinuna ti maysa a nagannak nga addaan iti dua nga ubbing: “Immuna a sinanaymi ida nga agtugaw a siuulimek no addada iti Kingdom Hall.” Kalpasanna, tulonganyo dagiti annakyo nga agkomento iti bukodda a sasao ken pagbalinenyo a kalatda ti agpalista iti Teokratiko nga Eskuelaan ti Panagministro. Iti tay-ak ti ministerio, nasayaat nga aramidenyo a kalatda ti panangitukon iti polieto iti bumalay, panangibasa iti teksto, panangiparang iti magasin, ken makagunggona a pannakisarita kadagiti bumalay.
6 Makitada Koma a Napasnekkayo: Inaldaw kadi a mangngegandakayo dagiti annakyo nga agsao maipapan ken ni Jehova ken agkararag kenkuana? Makitada kadi nga agad-adalkayo iti Saona, tumabtabuno kadagiti gimong, makiramraman iti tay-ak ti ministerio, ken pagragsakanyo ti panangaramid iti pagayatan ti Dios? (Sal. 40:8) Nasken a makitada dayta ken ar-aramidenyo a sangsangkamaysa. Kinuna ti nataenganen nga anak a babai maipapan ken nanangna, a nakapadakkel iti innem nga annak a nagbalin a matalek a Saksi: “Ti mismo nga ulidan ni Nanang ti ad-adda a nanggutugot kadakami—nabilbileg dayta ngem iti sasao.” Kinuna ti maysa a nagannak nga addaan iti uppat nga annak: “Saan laeng a gagangay a pagsasao ti ‘ni Jehova ti maipangpangruna’ no di ket nagbiagkami a maitunos iti dayta.”
7 Nagannak, masapa a rugianyo a sanayen dagiti annakyo, nga isuroyo kadakuada ti kinapudno a masarakan iti Sao ti Dios, mangaramid kadagiti progresibo a kalat, ken ipaayyo ti kasayaatan nga ulidan. Naragsakkayto no aramidenyo dagita!