Sanayenyo Dagiti Annakyo nga Agbalin a Ministro
1. Sigun iti Salmo 148:12, 13, ania ti rumbeng nga aramiden dagiti Kristiano a nagannak?
1 Aw-awisen ni Jehova dagiti agtutubo nga agdayaw kenkuana. (Sal. 148:12, 13) Gapuna, dagiti Kristiano a nagannak, saanda laeng koma nga isuro kadagiti annakda dagiti kinapudno a linaon ti Biblia ken dagiti moral a pagalagadan ti Dios no di ket sanayenda ida nga agbalin a ministro ti naimbag a damag. Kasanoda a maaramid daytoy a sibaballigi?
2. Ania ti epektona kadagiti annak ti nasayaat nga ulidan dagiti nagannak?
2 Nasayaat nga Ulidan: Imbaga ti ukom a ni Gideon kadagiti 300 a buyotna: “Agsursurokayo iti panangimatangyo kaniak.” (Uk. 7:17) Gagangay a dagiti nagannak ti kitkitaen ken tultuladen dagiti annak. Adda maysa nga ama a rabii ti oras ti trabahona. Ngem imbes a maturog no sumangpet iti agsapa ti Sabado, itugotna dagiti annakna a mapan mangasaba uray no isu ket nabambannog unay. Babaen ti ulidan, isursurona kadagiti annakna a rumbeng nga ipangpangrunada ti ministerio. (Mat. 6:33) Mapalpaliiw kadi dagiti annakyo a naragsakkayo a makiramraman kadagiti nagduduma a kita ti panagdaydayaw, kas koma iti panagkararag, panagbasa iti Biblia, panagkomento, ken panangasaba? Siempre, saankayo a perpekto nga ulidan. Ngem ad-addanto nga agtignay dagiti annakyo iti panangikagumaanyo a mangisuro kadakuada nga agdayaw ken Jehova no makitada a napingetkayo nga agserserbi kenkuana.—Deut. 6:6, 7; Roma 2:21, 22.
3. Ania dagiti progresibo a naespirituan a kalat nga iparegta dagiti nagannak nga ipasdek ken ragpaten dagiti annakda?
3 Progresibo a Kalat: Dagiti nagannak naanusda a mangsanay kadagiti annakda a magna, agsao, agkawes, ken dadduma pay. Bayat a dumakdakkel dagiti annakda, adda dagiti baro a kalat a ragpatenda. No Kristiano dagiti nagannak, tulonganda met dagiti annakda a mangipasdek ken mangragpat kadagiti naespirituan a kalat sigun iti edad ken abilidadda. (1 Cor. 9:26) Isursuroyo kadi dagiti annakyo nga agkomento iti bukodda a sasao ken mangaramid iti pasetda iti Teokratiko nga Eskuelaan ti Panagministro? (Sal. 35:18) Sansanayenyo kadi ida a makiraman iti nagduduma nga aspeto ti ministerio? Iparparegtayo kadi kadakuada a pagbalinenda a kalat ti agpabautisar ken agserbi iti amin a tiempo? Tultulonganyo kadi ida a makitimpuyog kadagiti nararagsak ken nareregta nga ebanghelisador a mangimpluensia kadakuada nga agbalin a naregta?—Prov. 13:20.
4. Kasano a mabenepisiaran dagiti annak no sanayen ida dagiti dadakkelda a makiraman iti ministerio bayat nga ubbingda pay?
4 Kinuna ti salmista: “O Dios, insuronak nanipud pay kinaagtutubok, ket agingga ita isarsaritak ti maipapan iti nakaskasdaaw nga ar-aramidmo.” (Sal. 71:17) Rugianyo a sanayen dagiti annakyo nga agbalin a ministro bayat nga ubbingda pay. Ti panangtulongyo kadakuada a mangipasdek iti naespirituan a pundasion ket sigurado a makatulong kadakuada inton nataengandan!—Prov. 22:6.