Masupapakan ti Panagibtur
1 “Babaen ti panagibturyo magun-odanyonto dagiti kararuayo.” (Luc. 21:19) Dagita a sasao, a paset ti padto ni Jesus maipapan iti “panungpalan ti sistema ti bambanag,” nalawag nga ipakitana nga iti panangsalimetmet iti kinatarnawtayo, masapul a nakasaganatayo a mangsango iti adu a pakasuotan. Ngem babaen ti bileg ni Jehova, kabaelan ti tunggal maysa kadatayo ti ‘agibtur agingga iti panungpalan’ ket ‘maisalakantayto.’—Mat. 24:3, 13; Fil. 4:13.
2 Mabalin nga inaldaw a masuottayo gapu iti pannakaidadanes, sakit, kinarigat ti biag, ken pannakariribuk ti rikna. Ngem pulos a ditay koma liplipatan nga ikagkagumaan ni Satanas a dadaelen ti kinatarnawtayo ken ni Jehova. No inaldaw nga agtalinaedtayo a nasungdo iti Amatayo, inaldaw met a makatulongtayo a mangsungbat iti karit ti Manangumsi. Anian a makaliwliwa a maammuan a saan a lipaten ni Jehova dagiti ‘luatayo’ iti sidong ti pakasuotan! Napateg dagita kenkuana, ket maragsakan ti pusona no agtalinaedtayo a natarnaw!—Sal. 56:8; Prov. 27:11.
3 Magugoran Gapu Kadagiti Pakasuotan: Ti pakarigatan mabalin nga ipalgakna ti pagkapuyan ti pammati wenno ti di umiso a kababalin, kas iti kinatangsit wenno kinaawan anus. Imbes a liklikan wenno pagpatinggaen dagiti pakasuotan babaen kadagiti di nainkasuratan a pamay-an, nasken nga ipangagtayo ti balakad ti Sao ti Dios a ‘bay-antayo a ti panagibtur an-anayenna ti aramidna.’ Apay? Agsipud ta ti simamatalek a panangibtur kadagiti pakasuotan tulongannatayo nga agbalin a ‘naan-anay ken nasalun-at iti amin a bambanag.’ (Sant. 1:2-4) Matulongannatayo ti panagibtur a mangpatanor kadagiti napateg a kualidad, kas iti kinanainkalintegan, pannakipagrikna, ken asi.—Roma 12:15.
4 Nasubok a Kualidad ti Pammati: No ibturantayo dagiti pakasuotan, maaddaantayo iti nasubok a kualidad ti pammati a dakkel ti pategna iti imatang ti Dios. (1 Ped. 1:6, 7) Tulongannatayo ti kasta a pammati nga agtalinaed a natibker iti sidong dagiti pakasuotan iti masanguanan. Maysa pay, mariknatayo ti anamong ti Dios, ket daytoy ti mangpabileg iti namnamatayo, a pagbalinenna dayta nga ad-adda a napaypayso kadatayo.—Roma 5:3-5.
5 Ti kasayaatan a gunggona iti panagibtur ket naipaganetget iti Santiago 1:12, a kunana: “Naragsak ti tao nga agtultuloy nga agibtur iti pannakasuot, agsipud ta iti pannakaanamongna awatennanto ti korona ti biag.” Agtalinaedtayo ngarud a natibker iti debosiontayo ken ni Jehova, ket agtalektayo a sibabaknang a gunggonaannanto dagidiay “agtultuloy nga agayat kenkuana.”