Tulonganyo Dagiti Annakyo a Rumang-ay iti Ministerio
1 Addaan dagiti Kristiano a nagannak iti nadagsen a responsabilidad a mangsanay kadagiti annakda iti ministerio manipud iti kinaubingda. Adu dagiti wagas a maaramidda daytoy. Adda dagiti ubbing a makabael a mangikabesa iti maitutop a teksto ti Biblia uray no saanda pay a makabasa. Mabalin a dakkel ti epekto daytoy kadagiti agdengdengngeg. Bayat a dumakdakkel dagiti ubbing, ad-adu pay ti maaramidanda iti ministerio. Dakayo a nagannak, kasano a matulonganyo dagiti annakyo a makiraman iti panangasaba? Nalabit makatulong met dagiti sumaganad a singasing.
2 Kalpasan ti kablaaw, mabalinyo a kunaen:
◼ “Daytoy ti anakko, ni [naganna]. Adda la koma napateg a teksto iti Biblia a kayatna nga iturong iti imatangyo.” Mabalin a kunaen ti anakyo: “Naammuak iti daytoy a teksto iti Salmo no ania ti nagan ti Dios. [Basaen wenno ibagana ti linaon ti Salmo 83:18.] Ilawlawag dagitoy a magasin no anianto ti aramiden ni Jehova a Dios maipaay kadatayo. Mabalinko kadi nga ibati dagitoy kadakayo?” Mabalinyo nga ingudo ti saritaan babaen ti panangilawlawag no kasano a masupsuportaran ti sangalubongan a trabaho.
3 Wenno mabalinyo a padasen daytoy:
◼ “Komusta? Kaduak ti balasangko a ni [naganna], ta sansanayek a mangipakita iti pannakaseknan kadagiti sabsabali. Adda la koma kayatna nga iranud kadakayo nga ababa a mensahe a naggapu iti Biblia.” Mabalinna nga ibaga ti kastoy: “Ti maysa a pamay-an a kayatko a tulongan dagiti tattao ket babaen ti panangipakaammok no ania ti ibagbaga ti Biblia a namnamatayo iti masanguanan. [Basaen wenno ibagana ti linaon ti Apocalipsis 21:4.] Ilawlawag dagitoy a magasin no ania ti aramiden ti Pagarian ti Dios maipaay kadatayo. Magustuanyo la ketdi a basaen dagitoy.”
4 No kanayon a simple ti presentasion, maaddaan dagiti ubbing iti kompiansa iti abilidadda a mangiranud iti mensahe maipapan iti Pagarian. Ti panangensayo kadagiti ubbing nga agsao iti nalawag ken napigsa ket makatulong kadakuada nga agsao iti nadumaduma a kasasaad. Ti nasayaat a nasakbay a panagsagana ken napasnek a komendasion tulonganna dagiti ubbing a mangyebkas iti pammatida.
5 Buyogen ti kasta a pammaregta, adu nga agtutubo ti nakakualipikar kas di bautisado nga agibumbunannag. Anian a makaparagsak a makita ti irarang-ay dagiti annaktayo iti Nakristianuan a ministerio!—Sal. 148:12, 13.