Suruanyo Dagiti Annakyo a Mangidaydayaw ken Jehova
1. Kabaelan kadi dagiti ubbing nga idaydayaw ni Jehova?
1 Iti Salmo 148:12, 13, naiparegta kadagiti ubbing nga “idaydayawda koma ti nagan ni Jehova.” Naglaon ti Kasuratan kadagiti adu nga ehemplo dagiti ubbing a nangaramid iti kasta. Kas pagarigan, “agserserbi idi ni Samuel iti sango ni Jehova, kas maysa nga ubing.” (1 Sam. 2:18) “Maysa a balasitang” ti nangibaga idi iti asawa ni Naaman a ti mammadto ni Jehova idiay Israel ti makaagas iti kukutel ni Naaman. (2 Ar. 5:1-3) Idi simrek ni Jesus idiay templo ken nangaramid kadagiti milagro, “ubbing a lallaki” ti nangipukkaw: “Mangisalakanka, ikararagmi, iti Anak ni David!” (Mat. 21:15) Kasano a dagiti nagannak masursuruanda dagiti annakda a mangidaydayaw ken ni Jehova?
2. Apay a napateg a mangipakita dagiti nagannak iti nasayaat nga ulidan kadagiti annakda?
2 Ulidan: Sakbay nga impasagepsepda ti kinapudno iti puso dagiti annakda, naibilin nga umuna kadagiti Israelita nga amma nga ayatenda ni Jehova ken ikabilda iti pusoda dagiti bilinna. (Deut. 6:5-9) No agsaokayo a sipopositibo maipapan iti ministerio ken pagbalinenyo dayta a paset ti linawas nga eskediulyo, matignay dagiti annakyo a mangmatmat iti ministerio kas napateg ken makapnek.
3. Kasano a nagunggonaan ti maysa a kabsat a babai gapu iti ulidan dagiti dadakkelna?
3 Siraragsak a malagip ti maysa a kabsat a babai: “Idi dumakdakkelak, karaman iti rutina ti pamiliami ti panangasaba iti tunggal ngudo ti lawas. Nakitak a talaga a tagtagiragsaken dagiti dadakkelko ti mangasaba. Dimmakkelkami a ti panangmatmatmi iti ministerio ket maysa a banag a makaparagsak.” Idi agtawen iti pito, nagbalin a di bautisado nga agibumbunannag daytoy a kabsat ken maika-33 a tawenna itan nga agserserbi iti amin a tiempo.
4. Ania ti kayat a sawen ti in-inut a panangsanay kadagiti ubbing?
4 In-inut a Panangsanay: Ikuyogyo dagiti annakyo no makiramankayo iti ministerio. Mabalin nga isuda ti agtimbre iti ruangan, mangyawat iti polieto iti bumalay, wenno mangibasa iti teksto. Daytoy ti mangparayray iti ragsakda ken tumulong kadakuada a maaddaan iti kompiansa iti abilidadda a mangiranud iti mensahe ti Pagarian. Bayat a dumakdakkelda, masapul nga ad-adu ti pannakiramanda iti ministerio. Gapuna, tulonganyo ida a rumang-ay ken mangpanunot no ania dagiti ikeddengda a kalat iti naespirituan.
5. Ania ti kasapulan tapno makakualipikar ti maysa nga ubing kas di bautisado nga agibumbunannag?
5 Makisaritakayo kadagiti panglakayen apaman a makitayo a kualipikadon dagiti annakyo nga agbalin a di bautisado nga agibumbunannag ken no inyebkasdan ti panagtarigagayda iti dayta. Ti panagbalin nga agibumbunannag ti mangitukit iti pusoda iti personal a responsabilidadda a mangidaydayaw ken Jehova. Laglagipenyo a saan a kasapulan a kas iti kaadu ti ammo dagiti bautisado nga adulto ti nasken nga ammo ti maysa nga ubing sakbay a makakualipikar. Maawatan kadin ti anakmo dagiti pamunganayan a sursuro ti Biblia? An-annurotenna kadin dagiti moral a pagalagadan iti Biblia? Tarigagayanna kadin ti makiraman iti ministerio ken mabigbig kas maysa a Saksi ni Jehova? No kasta, mabalinen nga ikeddeng dagiti panglakayen no isu ket kualipikadon kas di bautisado nga agibumbunannag.—Kitaenyo ti Organisado a Mangaramid iti Pagayatan ni Jehova, p. 79-82.
6. Apay a napateg a sanayen dagiti nagannak dagiti annakda?
6 Nasken ti kinapinget iti panangisuro kadagiti annak a naimpusuan a mangidaydayaw ken ni Jehova. Nupay kasta, manmano ti bambanag a makaipaay kadagiti nagannak iti dakdakkel a rag-o ngem iti pannakakitada kadagiti annakda a rumangrang-ay iti naespirituan. Napatpateg pay, maay-ayo ni Jehova no isarsarita dagiti ubbing ti maipapan kadagiti nakaskasdaaw nga aramidna.