Tulonganyo Dagiti Sabsabali a Magunggonaan iti Subbot
Maangay ti Panglaglagip iti Ipapatay ni Kristo Inton Abril 12
1. Ania ti maysa a pamay-an tapno mayebkas dagiti adipen ti Dios ti apresasionda iti subbot?
1 “Pagyamanan iti Dios gapu iti di mailadawan a sagutna nga awanan bayad.” (2 Cor. 9:15) Maitutop unay dagita a sasao a mangyebkas iti riknatayo maipapan iti kinaimbag ken naayat a kinamanangngaasi nga ipapaay ti Dios kadagiti adipenna babaen ti Anakna a ni Jesu-Kristo kas subbot. Nangnangruna a maipakitatayo ti kasta nga apresasion bayat nga agtataripnongtayo inton Abril 12 tapno angayentayo ti Panglaglagip iti Ipapatay ni Kristo.
2. Siasino ti makiramraman kadagiti adipen ni Jehova a manglaglagip iti Ipapatay ni Kristo, ken ania ti nasken nga aramidenda tapno magunggonaanda iti subbot?
2 Agarup sangapulo a milion ti makiramraman kadagiti adipen ni Jehova a manglaglagip iti Ipapatay ni Kristo iti tunggal tawen. Iti panangaramidda iti kastoy, ipakpakitada nga adda panangapresiarda iti sakripisio ni Kristo. Ngem tapno magunggonaanda iti subbot, nasken nga iparangarangda ti pammatida iti dayta. (Juan 3:16, 36) Kasano a matulongantayo ida a mangpatanor iti kasta a pammati? Bayat daytoy panawen ti Memorial, mabalintayo a paregtaen ida a maaddaan iti personal a panagadal iti Biblia ken tumabuno kadagiti linawas a gimong ti kongregasion. Usigentayo dagiti sumaganad a singasing.
3. Kasano a makairugitayo iti panagadal iti Biblia kadagidiay awisentayo iti Memorial?
3 Dagiti Panangyadal iti Biblia: No awisenyo a tumabuno iti Memorial dagiti interesado, apay a diyo padasen nga iyadalan ida iti Biblia babaen ti libro nga Isursuro ti Biblia? Padasenyo nga ilawlawag iti dayta a tao ti maipapan iti Memorial babaen ti panangukagyo iti panid 206-8 ken usigenyo ti topiko a “Ti Pangrabii ti Apo—Panglaglagip a Pakaidayawan ti Dios.” Mabalinyo nga adalen dayta nga impormasion iti umuna wenno maikadua a panagsarungkar, nalabit kas panangyadal iti Biblia iti ruangan. No malpasyon dayta a material, mabalin a kayat ti estudiante nga adalenyo ti kapitulo 5, “Ti Subbot—Kapatgan a Sagut ti Dios.” Apaman a maipasdek ti regular a panagadal iti Biblia, sublian ken usigenyo ti umuna nga uppat a kapitulo ti libro.
4. Siasino dagiti mabalintayo nga itukonan iti panagadal iti Biblia bayat daytoy panawen ti Memorial?
4 Siasino dagiti mabalintayo nga itukonan iti panagadal iti Biblia babaen ti panangusartayo iti daytoy a pamay-an? Nalabit kadagiti dadduma a katrabahuan, kaeskuelaan, wenno kaarrubayo nga umanamong kadagiti kasta a saritaan. Dagiti kakabsat a lallaki mabalinda nga asitgan dagiti di manamati nga assawa dagiti kakabsat a babbai iti kongregasion. Saanyo met a liplipatan nga iyadalan dagiti saan a Saksi a kabagianyo. Maysa pay, kayattayo nga ikagumaan nga awisen a tumabuno iti Memorial dagidiay dati nga aktibo a kameng ti kongregasion. (Luc. 15:3-7) Sapay koma ta ikagumaantayo a tulongan dagiti kasta a tattao a magunggonaan iti subbot.
5. Kasano a maparegtatayo dagiti estudiante iti Biblia ken ti dadduma pay nga interesado a tumabuno kadagiti linawas a gimong ti kongregasion?
5 Dagiti Gimong ti Kongregasion: Ti Memorial ti kaunaan a gimong a tabunuan ti adu nga estudiante iti Biblia ken dadduma pay nga interesado. Ngem kasano a maparegtatayo ida a tumabuno kadagiti dadduma pay a gimong ti kongregasiontayo? Ti panid 8 ti Abril 2005 a Ti Ministeriotayo iti Pagarian ipaayna dagiti sumaganad a singasing: “Dakamatenyo ti paulo ti sumaganad a palawag publiko. Ipakitayo kadakuada ti material a mausig iti Panagadal iti Pagwanawanan ken iti Panagadal iti Libro ti Kongregasion. Ilawlawagyo ti maipapan iti Teokratiko nga Eskuelaan ti Panagministro ken ti Gimong ti Serbisio. No adda pasetyo iti eskuelaan, mabalinyo nga ensayuen dayta kadakuada. Iranudyo dagiti napateg a punto a naidatag kadagiti gimong. Usarenyo dagiti retrato kadagiti publikasiontayo tapno mailadawanda iti panunotda no ania ti maar-aramid kadagiti gimong. Iti damo pay laeng a panagadalyo, awisenyo idan a tumabuno.”
6. Ania ti dua a pamay-an a mabalintayo a tulongan dagiti napudno ti panagpuspusoda a tattao a magunggonaan iti subbot?
6 No dagiti napudno ti panagpuspusoda a tattao ket addaan iti regular a panagadal iti Biblia ken kanayon a tumabunoda kadagiti gimong ti kongregasion, masansan nga alisto ti panagrang-ayda iti naespirituan. Sapay koma ngarud ta paregtaentayo dagiti sabsabali a manggundaway kadagitoy a naespirituan a probision ken magunggonaan iti kapatgan a sagut ti Dios—ti subbot.