Maibagayyo Kadi ti Eskediulyo?
1. Apay a rumbeng nga ibagaytayo ti eskediultayo a mangasaba?
1 Kas pudno a Kristiano, inawattayo ti awis nga agbalin a “dumadaklis iti tattao.” (Mat. 4:19) Umasping iti literal a dumadaklis, maaddaantayo met iti nasaysayaat a resulta ti trabaho a panagdaklis iti tattao no mangasabatayo iti tiempo nga addada iti pagtaenganda. Iti adu a pagilian, mangted dagiti sumarsaruno a bulan iti at-atiddog nga oras ti aldaw. Ad-adu a tattao ti madanon iti pagtaenganda no iti mumalem ken sardam. Masansan nga awan unay ti pakakumikomanda ken mabalin a kaykayatda ti umawat iti bisita. Maibagayyo kadi ti eskediulyo a mangasaba kadagita nga oras?—1 Cor. 9:23.
2. Ania dagiti sumagmamano a pamay-an tapno maidanontayo ti naimbag a damag kadagiti ad-adu a tattao?
2 Panangasaba iti Sardam: Ad-adu a tattao ti mapakaammuantayo iti naimbag a damag no iplanotayo a nasaksakbay ti mangasaba iti sardam. (Prov. 21:5) Mabalin a mangasaba dagiti agtutubo kalpasan ti klaseda. Adda dagiti mangaramid iti dayta kalpasan ti trabahoda. Dadduma a grupo ti panagadal ti libro ti mabalin a mangyurnos iti maysa nga oras a panangasaba sakbay ti linawas a panagadalda.
3. Kadagiti ania a pamay-an a mabalinyo ti mangasaba iti mumalem ken sardam iti teritoriayo?
3 Makasaritayo dagidiay gagangay nga awan iti pagtaenganda no mangasabakayo iti binalaybalay iti mumalem ken sardam. Iti adu a teritoria, ti panangasaba iti lansangan ken iti dadduma pay a publiko a lugar ket mabalin met nga aramiden iti sardam. Natakuatan ti adu nga iti sardam ti kasayaatan a tiempo nga agsarungkar ken mangirugi kadagiti panagadal iti Biblia.
4. Apay a napateg ti panagbalin a mannakaawat ken nakonsiderar no makiramraman iti panangasaba iti sardam?
4 Kasapulan ti Pannakaawat: Kasapulan ti panangtingiting a naimbag no makiramramankayo iti panangasaba iti sardam. Masansan a kasayaatan no ipatingga laeng ti panangasaba iti sardam imbes nga itultuloy dayta agingga a tiempon ti pannaturog dagiti bumalay. (Fil. 4:5) No agtuktokkayo iti ruangan, agtakderkayo iti lugar a makitadakayo sa iyam-ammoyo ti bagiyo. Ibagayo a dagus ti panggep ti ibibisitayo. No saan a kombeniente ti tiempo nga isasarungkaryo, kas koma no mangmangan ti pamilia, ibagayo nga agsublikayto iti sabali a gundaway. Kankanayon koma nga ipakitayo ti konsiderasion.—Mat. 7:12.
5. Kasano a maliklikantayo dagiti posible a peggad bayat ti panangasaba?
5 Nasken met nga agannadtayo kadagiti posible a peggad. No mangaskasabakayo iti lugar a nariwet wenno nasipnget, nainsiriban no adda kaduayo wenno grupokayo a mapan. Magnakayo kadagiti nalawag a kalsada a sadiay saankayo nga agmaymaysa. Mangasabakayo laeng kadagiti lugar a natalged. Liklikanyo dagiti lugar a napeggad no nasipngeten.—Prov. 22:3.
6. Ania pay dagiti gunggona nga itden ti panangasaba iti mumalem ken sardam?
6 Ti panangasaba iti mumalem ken sardam ikkannatayo iti gundaway a makikadua kadagiti auxiliary ken regular pioneer. (Roma 1:12) Maibagayyo kadi ti eskediulyo tapno makiraman iti daytoy a pamay-an ti panagserbi?