Kabaelanyo Kadi ti Makiraman iti Panangasaba iti Rabii?
1. Sigun iti maysa nga eskolar, ania nga oras ti panangaskasaba ni Pablo iti binalaybalay?
1 Sigun iti libro a Daily Life in Bible Times, kadawyan a mangaskasaba ni apostol Pablo iti binalaybalay “manipud iti alas kuatro ti malem agingga nga adalemen ti rabii.” Saantay nga ammo no kastoy a talaga ti eskediul ni Pablo, ngem ammotayo a sidadaan a ‘mangaramid iti amin a bambanag maipagapu iti naimbag a damag.’ (1 Cor. 9:19-23) Sigurado a karaman iti daytoy ti panangyeskediulna a mangasaba iti binalaybalay iti oras nga adu ti makasabaanna.
2. Apay a nasayaat ti mangasaba iti rabii?
2 Iti adu a lugar, gagangay a mangaskasaba iti binalaybalay dagiti agibumbunannag iti agsapa kabayatan ti lawas. Ngem daytoy pay laeng kadi ti kasayaatan nga oras ti panangasaba iti lugaryo? Kinuna ti maysa a payunir maipapan iti teritoriada: “Dandani awan ti madanonmi a tao iti balayda iti aldaw. Ngem ad-adu ti madanonmi iti rabii.” Ti panangasaba iti rabii ket mabalin a mangipaay iti kasayaatan nga oportunidad tapno maidanontayo kadagiti tattao, nangnangruna kadagiti lallaki, ti naimbag a damag. Masansan a nalamlamiis ti ulo dagiti bumalay ken sidadaanda a makisarita. No makagunggona daytoy, masapul a mangyurnos dagiti panglakayen kadagiti taripnong sakbay ti panangasaba iti rabii.
3. Kasanotayo nga ipakita ti kinanainkalintegan no mangasabatayo iti rabii?
3 Agbalin a Nainkalintegan: Napateg ti panagbalin a nainkalintegan no mangasabakayo iti rabii. Kas pagarigan, no saan a kombeniente ti tiempo nga isasarungkaryo, kas koma no mangrabrabii ti bumalay, nasaysayaat no ibagayo nga agsublikayto laengen. No nasipnget, agtakderkayo iti lugar a makitanakayo ti bumalay, ken iyam-ammoyo a dagus ti bagiyo ken ibagayo ti panggep ti isasarungkaryo. Nainsiriban met no mangasabakayo a sagdudua wenno kadua ti grupo. Mangasabakayo laeng kadagiti nalawag a kalsada ken saankayo a suminsina iti grupo. Saankayo a mangasaba no rabii unayen di la ket ta maisturbo dagiti bumalay nga agsagsaganan a maturog. (2 Cor. 6:3) No ti teritoriayo ket delikado iti rabii, mangasabakayo iti sardam.—Prov. 22:3.
4. Ania dagiti bendision nga itden ti panangasaba iti rabii?
4 Bendision: Ad-adda a matagiragsaktayo ti ministerio no adda makasabaantayo. Ken no ad-adu ti makasabaantayo, ad-adu met ti oportunidad a matulongantayo dagiti sabsabali a “maisalakan . . . ken dumtengda iti umiso a pannakaammo iti kinapudno.” (1 Tim. 2:3, 4) Kabaelanyo kadi a baliwan ti eskediulyo tapno makiramankayo iti panangasaba iti rabii?