Pinadasyo Kadin ti Nangasaba iti Rabii?

¹ Maragsakantay amin no nabunga ti trabahotayo. Iti sabali a bangir, no awan positibo a resulta a makitatayo, mabalin a makabannog ken makapaupay ti trabaho. (Idiligyo ti Eclesiastes 3:10-13.) Mayaplikartay daytoy a prinsipio iti trabahotayo a panangasaba. Ammotayo manipud iti kapadasan a no mamalaybalaytayo ket makasaotayo dagiti tattao maipapan ti Biblia, agawidtayo a nabang-aran iti naespirituan. Mariknatayo nga adda nagapuanantayo.

² Iti dadduma a lugar, nagbalinen a narigat a masarakan dagiti tattao iti pagtaenganda iti agsapa ken malem. Adu a kongregasion ti nangtaming iti daytoy a problema babaen ti panangyurnos iti panangasaba iti rabii, ket nasayaat ti resultana. Impadamag dagiti agibumbunannag a no agsarungkarda iti mumalem, ad-adu a tao ti adda iti pagtaenganda ken ad-adda a nakarelaksda ken madadaan nga agimdeng iti mensahe ti Pagarian. Pinadasyo kadin ti nangasaba iti rabii iti teritoriayo?—Idiligyo ti Marcos 1:32-34.

³ Organisaren Dagiti Panglakayen ti Panangasaba iti Rabii: Iti dadduma a lugar, ti taripnong sakbay ti panangasaba iti mumalem wenno sardam ket supsuportaran a naimbag dagiti agtutubo nga agibumbunannag no aggapuda idiay eskuelaan ken dagiti nataengan no malpas ti sekular a trabahoda iti dayta a tiempo. Natakuatan dagiti dadduma nga agibumbunannag a di makaruar kadagiti ngudo ti lawas a ti panangasaba iti rabii iti lawlawasna ket praktikal a wagas kadakuada a maaddaan iti regular a pannakiraman iti trabaho a panangasaba.

⁴ Adda nagduduma nga aktibidad a mabalinyo a pakiramanan bayat ti panangasaba iti rabii. Mabalinyo ti mangasaba kadagiti balaybalay babaen dagiti magasin wenno usaren ti literatura a tukon iti bulan. Ti rabii ket nasayaat a tiempo nga isasarungkar kadagiti tattao nga awan iti pagtaenganda no sumarungkar dagiti agibumbunannag a nasapsapa iti aldaw wenno iti ngudo dagiti lawas. Mabalin nga adda met dagiti nasayaat a teritoria para iti panangasaba iti lansangan, a mangipalubos kadakayo a makasao dagiti tattao nga agawid manipud iti trabaho. Natakuatan dagiti adu a rabii ti kasayaatan a tiempo a panagsarungkar.

⁵ Agannad ken Agmasiribkayo: Iti dadduma a lugar, mabalin a napeggad ti rummuar no nasipngeten. Nainsiriban no agbiahekayo a sagdudua wenno ingrupo kadagiti masilawan a lansangan ken dagiti laeng natalged a lugar ti pagsarungkaranyo. No agtuktokkayo iti ruangan, agtakderkayo iti lugar a makitadakayo, ket iyam-ammoyo a naimbag ti bagiyo. Nasiputkayo koma. No mapaliiwyo a simmarungkarkayo iti di umiso a tiempo, kas no mangmangan ti pamilia, ibagayo a baliwanyonto ti sumarungkar. Masansan a kasayaatan ti mangasaba iti sardam, imbes a rabrabiyenyo ti sumarungkar, no maturogen dagiti bumalay.

⁶ Mainanamatayo a, bayat nga ipaayantay ti Dios iti ‘sagrado a panagserbi iti aldaw ken rabii,’ sigurado a bendisionan ni Jehova ti panagreggettayo.—Apoc. 7:15.