No Kasano nga Usaren ti Libro nga Ayat ti Dios iti Panangyadal iti Biblia
1. Ania ti nakairantaan ti libro nga Ayat ti Dios?
1 Anian a ragsaktayo a nakaawat iti baro a libro nga Agtalinaedka iti Ayat ti Dios iti napalabas nga “Agpaidalankayo iti Espiritu ti Dios” a Kombension Distrito! Kas naipakaammo, nairanta daytoy a publikasion a tumulong kadatayo a mangammo ken mangayat kadagiti pagalagadan ni Jehova mainaig iti kondukta saan ket nga iti panangisuro kadagiti pamunganayan a doktrina ti Biblia. Saantayo nga itukon daytoy iti panagbalaybalaytayo.
2. Kasanotayo nga usaren daytoy a publikasion, ken siasino ti pangiyadalantayo?
2 Daytoy a libro ti sumaruno nga iyadaltayo iti estudiante kalpasan a makompletona ti libro nga Isursuro ti Biblia. Laglagipenyo a nagduduma ti kapartak ti irarang-ay dagiti tattao iti naespirituan. Maibagay koma ti tunggal panangyadal sigun iti abilidad ti estudiante. Siguraduenyo a matarusan a naimbag dagiti topiko nga iyad-adalyo. Iti kaaduan a kasasaad, saan a rumbeng a mausar daytoy a libro a pangirugi iti panangyadal iti Biblia kadagiti tattao a nayadalanen iti sumagmamano a libro ngem saan met a makigimgimong ken saan a talaga nga interesado a mangyaplikar kadagiti kinapudno a naadalda iti Biblia.
3. Ania ti masapul nga aramidentayo no iyad-adaltayo pay laeng ti libro nga Agdayawkayo iti Dios?
3 No iyad-adalyo pay laeng ti libro nga Agdayawkayo iti Dios ngem addakayon kadagiti maudi a kapitulona, mabalin nga ikeddengyo nga iringpas dayta a publikasion sa iparegtayo iti estudiante a basaenna laengen a bukbukodna ti libro nga Ayat ti Dios. Ngem no saankay pay a nakaadayo, kasayaatan no isardengyon nga iyadal dayta ket rugianyon nga iyadal ti baro a libro. Kas iti panangadal iti libro nga Isursuro ti Biblia, ti panangilawlawag kadagiti topiko iti apendise ket opsional.
4. Ania ti masapul nga aramidentayo no agpabautisaren ti iyad-adalantayo sakbay pay a mairingpasna dagiti libro nga Isursuro ti Biblia ken Ayat ti Dios?
4 No agpabautisaren ti estudiante sakbay pay a mairingpasna dagita a libro, itultuloyyo latta nga iyadalan agingga a mairingpasna ti libro nga Ayat ti Dios. Uray nabautisaranen ti estudiante, mabalinmo nga ireport ti oras, panangsarungkar, ken panangyadalmo kenkuana. Ti agibumbunannag a kaduam ken nakipaset iti panangyadal mabalinna met nga ireport dayta kas oras.
5. Kasanotayo a mausar ti libro nga Ayat ti Dios a tumulong kadagiti agibumbunannag a saan a makiramraman iti ministerio iti sumagmamanon a tiempo?
5 No ti kameng ti Komite ti Serbisio iti Kongregasion dutokannakayo a mangyadal iti Biblia iti maysa a kabsat a di aktibo iti trabaho a panangasaba, mabalin a kiddawenna nga iyadalyo dagiti espesipiko a kapitulo iti libro nga Ayat ti Dios a maitutop iti kasapulan ti di aktibo. Saan a kasapulan nga agtultuloy ti panagadal iti napaut a tiempo. Anian a nagsayaat a probision daytoy a baro a libro, a nairanta a tumulong kadatayo nga agtalinaed “iti ayat ti Dios”!—Jud. 21.