Dagiti Imbitasion iti Memorial a Maiwaras iti Intero a Lubong!
1. Sakbay ti Memorial, ania nga espesial a kampania ti naiplano a maaramid iti intero a lubong?
1 “Itultuloyyo nga aramiden daytoy kas panglaglagip kaniak.” (Luc. 22:19) Kas panangtungpal iti daytoy a bilin ni Jesus, dagiti agdaydayaw ken Jehova agraman dagiti interesado agtataripnongda inton Marso 30, 2010 tapno laglagipenda ti ipapatay ni Jesus. Maiwarasto iti intero a lubong ti espesial nga imbitasion iti Memorial inton Marso 13 agingga iti Marso 30.
2. Kasanotayo nga iwaras dagiti imbitasion?
2 No Kasano nga Iwaras Dagiti Imbitasion: Mabalinyo nga ited ti imbitasion iti bumalay tapno makitana ti ilustrasion iti parupana sa kunaenyo: “Inton rabii ti Marso 30, agtataripnongto ti riniwriw a tattao iti intero a lubong tapno laglagipenda ti ipapatay ni Jesus. Immayak tapno itedko daytoy nga imbitasion para iti pamiliayo. Mabalinyo met nga awisen dagiti gagayyemyo. Makitayo ditoy ti oras ken lugar a pakaangayanna.” Depende iti kasasaad, mabalinyo nga ibasa ti Lucas 22:19 manipud iti Bibliayo a mangipakita iti Nainkasuratan a bilin. Ngem laglagipenyo a kasayaatan no apagbiit laeng ti pannakisaritayo yantangay limitado ti panawen a panangwanasyo iti teritoriayo.
3. Siasino dagiti mabalintayo nga awisen?
3 No nalawa ti teritoria ti kongregasionyo, mabalin nga iyurnos dagiti panglakayen a mangibatikayo iti imbitasion kadagiti pagtaengan nga awan dagiti bumalayna uray iti damo pay laeng nga isasarungkaryo. No maitutop, itukonyo dagiti magasin a kadua ti imbitasion. Diyo liplipatan nga awisen dagiti sarsarungkaranyo, dagiti iyad-adalanyo, katrabahuan, kaeskuelaan, kabagian, kaarruba, ken dadduma pay nga am-ammoyo.
4. Ti panangapresiar iti ayat ni Jehova kadatayo babaen ti panangipaayna iti subbot tignayennatayo a mangaramid iti ania?
4 Agsaganakayo a Makiraman a Naan-anay: Ti panawen ti Memorial ket nagsayaat a tiempo tapno mapalawatayo ti aktibidadtayo. Kabaelanyo kadi a baliwan ti eskediulyo tapno makapag-auxiliary pioneer-kayo? Adda kadi annakyo wenno iyad-adalanyo a nasayaat ti panagrang-ayna iti naespirituan? No adda, umasidegkayo kadagiti panglakayen tapno maikeddengda no kualipikadodan a makiraman iti daytoy nga espesial a kampania kas di bautisado nga agibumbunannag. Ti panangapresiar iti ayat ni Jehova kadatayo babaen ti panangipaayna iti subbot saannatayo laeng a tignayen a tumabuno iti Memorial no di ket awisentayo pay a tumabuno ti adu a tattao aginggat’ mabalin.—Juan 3:16.