Mangrugi Inton Abril 2 ti Panagiwaras Kadagiti Imbitasion iti Memorial
1. Kaanotayo nga agiwaras kadagiti imbitasion iti Memorial iti daytoy a tawen, ken ania ti pateg daytoy a tinawen a kampania?
1 Manipud Abril 2 agingga inton Abril 17, agiwarastayto kadagiti imbitasion para iti kapatgan nga okasion iti tawen—ti Panglaglagip iti ipapatay ni Kristo. Iti napalabas, adu nga interesado ti nangipangag iti daytoy a tinawen a kampania. Kas pagarigan, iti aldaw ti Memorial, adda babai a timmawag iti sanga nga opisina ket kinunana: “Kasangsangpetko laeng ditoy balay, ket adda nakitak nga imbitasion iti ridawmi. Kayatko ti tumabuno ngem diak masigurado no ania nga oras.” Inlawlawag ti kabsat no ania a paset ti imbitasion ti pakasarakanna iti dayta nga impormasion. Sakbay a nagpakada ti babai, inkarina, “Mapanakto inton rabii!”
2. Ania ti mabalintayo nga ibaga no itedtayo ti imbitasion?
2 No Kasanotayo nga Aramiden Daytoy: Yantangay limitado ti panawen a panangwanastayo iti teritoriatayo, nasaysayaat no ababa laeng ti presentasiontayo. Mabalintayo nga ibaga: “Naimbag nga aldawyo. Kayatmi nga ikkan ti pamiliayo iti imbitasion para iti napateg a tinawen nga okasion a maangay iti intero a lubong inton Domingo, Abril 17. [Iyawatyo ti imbitasion iti bumalay.] Dayta a petsa ti anibersario ti ipapatay ni Jesus. Addanto palawag a naibatay iti Biblia a mangilawlawag no kasanotayo a mabenepisiaran iti subbot nga impaay ni Kristo ken awanto ti koleksion a maaramid sadiay. Naikabil iti daytoy nga imbitasion ti adres ken oras ti pannakaangayna ditoy lugartayo.”
3. Kasanotayo a makaawis iti adu a tattao aginggat’ mabalin?
3 No nalawa ti teritoria ti kongregasionyo, mabalin nga ibaga dagiti panglakayen a mangibatikayo iti imbitasion kadagiti pagtaengan nga awan dagiti bumalayna iti paset a saan a makita dagiti aglablabas. Siguraduenyo nga awisen dagiti sarsarungkaran, kakabagian, katrabahuan, kaeskuelaan, ken dadduma pay nga am-ammoyo. No makiramankayo iti panagiwaras iti imbitasion kadagiti ngudo ti lawas, itukonyo dagiti magasin no maitutop. Mabalinyo kadi ti ag-auxiliary pioneer inton Abril tapno ad-adu ti pannakiramanyo iti daytoy a makaparagsak a kampania?
4. Apay a kayattayo a tumabuno iti Memorial dagiti interesado a tattao?
4 Ti Memorial ket nabilegto la ketdi a panangsaksi kadagiti interesado a tumabuno! Mangngegandanto ti maipapan iti naindaklan nga ayat ni Jehova gapu iti panangipaayna iti subbot. (Juan 3:16) Maammuandanto no kasano a mabenepisiaran ti sangatauan babaen ti Pagarian ti Dios. (Isa. 65:21-23) Maawisdanto pay nga umasideg kadagiti paraasistir ken agkiddaw iti panangyadal iti Biblia tapno ad-adu pay ti maammuanda. Ikarkararagtayo nga adu koma a tattao a napudno ti panagpuspusona ti mangipangag iti daytoy a kampania ket tumabunodanto iti Memorial!