“Ti Kinasirib Mapaneknekan a Nalinteg Babaen iti Ar-aramidna”
1. Ania ti panangmatmat ti dadduma iti trabahotayo?
1 No dadduma, negatibo ti reaksion dagiti bumalay a saan a makatarus iti trabahotayo wenno nakangngeg kadagiti di umiso a damag maipapan kadagiti Saksi ni Jehova. Mabalin a naimpluensiaanda kadagiti adda dasdasiganna a report ti media. Iti dadduma a lugar aw-awagandatayo iti “napeggad a sekta.” Ania ti rumbeng a reaksiontayo no makangngegtayo iti kasta a pammadakes?
2. Ania ti makatulong tapno saantayo a maupay no padaksendatayo?
2 Taginayonenyo ti Nasayaat a Kababalin: Ni Jesus ken ti dadduma nga adipen ni Jehova idi umuna a siglo ket masansan a di matarusan dagiti tattao ken masupsupiatda. (Ara. 28:22) Nupay kasta, saanda nga imbain ti ministerioda gapu laeng kadagiti pammadakes. Kinuna ni Jesus: “Ti kinasirib mapaneknekan a nalinteg babaen iti ar-aramidna.” (Mat. 11:18, 19) Sireregta nga intultuloyna nga aramiden ti pagayatan ni Amana, nga agtalek a dagidiay agsapsapul iti kinapudno maammuandanto ti pateg ti naimbag a damag. Maliklikantayo ti pannakaupay no laglagipentayo nga uray ti mismo nga Anak ti Dios ket nagsagaba met iti kasta.
3. Apay a saan a nakaskasdaaw no padaksen ken busorendatayo?
3 Imbaga ni Jesus a dagiti adalanna ket guraento ti lubong kas iti pananggurada kenkuana. (Juan 15:18-20) Ngarud, saantayon a pakasdaawan ita no padaksen ken busorendatayo. Ekspektarentayo ketdi nga agbalin nga ad-adda a gagangay dayta bayat nga umad-adanitayon iti panagpatingga ti maudi nga al-aldaw ken kumarkaro ti pungtot ni Satanas. (Apoc. 12:12) Agrag-otayo ta daytoy ti mangipakita nga asidegen nga agpatingga ti lubong ni Satanas.
4. Ania ti rumbeng nga aramidentayo no negatibo ti reaksion ti bumalay iti naimbag a damag?
4 Sumungbat a Sidadayaw: No negatibo ti reaksion ti bumalay, kanayon koma a nadayaw ken naalumamay ti sungbattayo. (Prov. 15:1; Col. 4:5, 6) No ipalubos ti kasasaad, mabalintayo nga ilawlawag kenkuana a nakaad-adu ti di umiso a damag maipapan kadagiti Saksi ni Jehova wenno saludsodentayo no apay a kasta ti kaririknana. No sumungbattayo a siaalumamay, mabalin a pagduaduaanton ti bumalay dagiti nadamagna maipapan kadagiti Saksi ken dumngegton inton sumaruno a makasabaan. Ngem no kasta unay ti pungtot ti bumalay, mabalin a nasaysayaat no agpakadatayo laengen. Aniaman ti panangmatmat dagiti sabsabali kadatayo, masiguradotayo nga ipatpateg ni Jehova ti ministeriotayo.—Isa. 52:7.