Dakkel a Pammaneknek ti Maipaay
1. Malaksid iti palawag, ania pay ti mabalin a maapresiar dagiti bisita a tumabuno iti Memorial? Ilawlawagyo.
1 Kaano? Inton rabii ti Memorial. Ikagumaantayo nga awisen dagiti tattao nga umay tumabuno. Mabalin a saan laeng a ti mangngeg dagiti bisita ti maapresiarda. Adda maysa a babai a timmabuno iti Memorial. Espesipiko a kinomentuanna ti nakitana—ti kinamannakigayyem ti amin ken ti napintas, nadalus a pasdek nga imbangon ken manmanteneren dagiti boluntario. Gapuna, amintayo, saan laeng a ti ispiker, ket makaipaay iti panangsaksi iti daytoy a kapatgan nga okasion iti tawen.—Efe. 4:16.
2. Kasano a makaipaay ti tunggal maysa kadatayo iti pammaneknek kadagiti bisita?
2 Sibabara a Kablaawanyo Dagiti Bisita: Ti naisem ken nabara a panangkablaawtayo kadagiti bisita ket makaipaay iti pammaneknek. (Juan 13:35) Uray no saanyo a makasarita ti amin, mabalinyo latta ti makiam-ammo kadagiti kaabayyo. (Heb. 13:1, 2) Siputanyo dagiti bisita a kasla awan ti am-ammona. Mabalin a naikkanda iti imbitasion kabayatan ti kampania. Mabalinyo nga isaludsod, “Damoyo kadi ti tumabuno?” Awisenyo ida a makikatugaw kadakayo ken ibagayo a saanda nga agbabain nga agsaludsod. No kasapulan a pumanaw a dagus ti kongregasionyo gapu ta adda sabali a kongregasion a sumaruno a mangusar iti pasdek, mabalinyo nga ibaga: “Kayatko koma a maammuan no ania ti makunayo iti programa. Mabalin kadi a maammuan ti adresyo wenno ti numero ti selponyo?”
3. Kasanotayo nga abrasaen dagiti di aktibo?
3 Abrasaenyo Dagiti Di Aktibo: Awan duadua a tumabunonto dagiti di aktibo ken ti sumagmamano nga indibidual a ti Memorial laeng ti tabtabunuanda iti tunggal tawen. Abrasaenyo ida ken ibagayo a maragsakankayo a makakita kadakuada. (Roma 15:7) Mabalin a sarungkaran ida dagiti panglakayen iti kabiitan a panawen tapno paregtaenda ida nga agtultuloy a makitimpuyog iti kongregasion. Ikarkararagmi a ti adu a tumabuno ket matignay koma a mangidaydayaw iti Dios saan laeng a gapu iti mangngegda no di ket iti pay makitada ‘kas bunga ti nasayaat nga ar-aramidtayo nga isuda ti saksi kadagita.’—1 Pedro 2:12.