Abrasaen Dagiti Bisitatayo

Inton Marso 23, agarup 12 a milion wenno ad-adu pay a bisita ti manamnama a tumabuno iti Memorial. Naisangsangayan la ketdi a panangsaksi ti awatenda bayat nga ilawlawag ti ispiker ti sagut ni Jehova a subbot ken dagiti bendision a sagrapen dagiti tattao iti masanguanan! (Isa 11:6-9; 35:5, 6; 65:21-23; Jn 3:16) Nupay kasta, saan laeng a ti ispiker ti mangipaay iti panangsaksi iti daytoy naisangsangayan nga okasion. Mabalintayo amin ti makiraman babaen iti nabara a panangabrasa kadagiti bisitatayo. (Ro 15:7) Adtoy ti sumagmamano a singasing.

• Imbes nga agturongkayo iti pagtugawanyo sa basta urayen ti panangrugi ti programa, abrasaenyo dagiti bisita ken dagiti di aktibo babaen iti nainggayyeman nga isem ken kablaaw

• Nupay ipaayanyo iti naisangsangayan nga atension dagiti personal nga inimbitaranyo, nasiputkayo met koma kadagiti adda sadiay gapu iti kampania a panagimbitar. Awisenyo dagiti kabbaro a makikatugaw kadakayo. Iranudyo ti Biblia ken pagkantaanyo

• Kalpasan ti palawag, nakasaganakayo koma a mangsungbat kadagiti saludsodda. No limitado ti tiempo ket masapul a pumanawkayo gapu ta adda sumaruno a kongregasion nga agusar, iyurnosyo ti pannakasarungkar ti bisita kalpasan ti sumagmamano nga aldaw. No diyo pay naala ti pangkontakan kadakuada, mabalinyo nga ibaga: “Kayatko a maammuan no ania ti makunayo iti programa. Kasanokayo ngata a makontak?”