Abrasaenyo Ida!
1. Ania nga okasion ti mangipaay kadatayo iti nagsayaat nga oportunidad a mangipaay iti panangsaksi, ken apay?
1 Awanen ti okasion a mangipaay kadatayo iti nasaysayaat nga oportunidad a mangipaay iti panangsaksi no di ti panangrambaktayo iti tinawen a Memorial. Panunotenyo daytoy: Iti daytoy a tawen, nasurok a sangapulo a milion a bisita ti manamnama a tumabuno iti Memorial ken dumngeg iti dua a katan-okan nga ebkas ti ayat a naiparangarang babaen ti subbot. (Juan 3:16; 15:13) Maammuanda dagiti bendision nga agur-uray kadakuada gapu iti sagut ni Jehova. (Isa. 65:21-23) Nupay kasta, saan laeng a ti ispiker ti makaipaay iti panangsaksi iti daytoy nga okasion. Adda gundaway ti amin a tumabuno a mangipaay iti nabileg a panangsaksi babaen ti sibabara a panangabrasa kadagiti bisita.—Roma 15:7.
2. Kasano a sibabara a maabrasatayo dagiti bisita?
2 Imbes nga agtugawka lattan ken urayem a mangrugi ti programa, apay a dika makiam-ammo kadagiti kaabaymo? Mabalin nga agnernerbios ken saan nga ammo dagiti bisita no ania ti maaramid. Ti nabara nga isem ken nainggayyeman a kablaaw ket dakkel ti maaramidanna tapno saanda nga alusiisen. Tapno maammuam no timmabuno ti maysa gapu ta nakaawat iti imbitasion, mabalinmo a damagen no damona ti tumabuno kadagiti taripnongtayo wenno no adda am-ammona iti kongregasion. Nalabit mabalinmo nga awisen a makikatugaw kenka ken iranudmo ti Biblia ken pagkantaam. No Kingdom Hall ti pakaangayan ti Memorial, mabalinmo nga ipasiar iti apagbiit. Kalpasan ti palawag, sidadaanka koma a mangsungbat kadagiti saludsodna. No masapul a pumanawkayo a dagus iti Kingdom Hall gapu ta adda sumaruno a mangusar, mabalinmo nga ibaga: “Kayatko a maammuan no ania ti makunam iti programa. Kasano ngata a makasaritakanto manen?” Kalpasanna, makitulagka no kaanom a sarungkaran. Nangnangruna nga agbalin a naalibtak dagiti panglakayen a mangparegta kadagiti di aktibo nga agibumbunannag a tumabuno.
3. Apay a napateg nga ikagumaantayo nga abrasaen dagiti bisita a tumabuno iti Memorial?
3 Adunto kadagiti bisita ti damo a makaimatang iti rag-o, talna, ken panagkaykaysa iti naespirituan a paraiso a tagtagiragsakentayo kas adipen ni Jehova. (Sal. 29:11; Isa. 11:6-9; 65:13, 14) Nasayaatto ngata ti malaglagip dagiti bisita? Agdepende dayta iti panangabrasatayo kadakuada.