Kasano nga Usaren ti Siasino Ita Dagiti Mangar-aramid iti Pagayatan ni Jehova?
Baro a Broshur a Nadisenio a Mangiturong Kadagiti Mayad-adalan iti Biblia iti Organisasion
1. Ania ti tallo a panggep ti broshur a Pagayatan ni Jehova?
1 Inusaryo kadin ti baro a broshur a Siasino Ita Dagiti Mangar-aramid iti Pagayatan ni Jehova? Ti panggep daytoy ket tapno (1) maam-ammo dagiti mayad-adalan iti Biblia no siasino dagiti Saksi ni Jehova, (2) maammuanda ti maipapan kadagiti aktibidadtayo, ken (3) makitada no kasano nga agan-andar ti organisasiontayo. Ti broshur a Pagayatan ni Jehova ket naglaon iti maysa a leksion iti kada panid a nalaka laeng nga ileppas iti lima agingga iti sangapulo a minuto iti tunggal panagadal.
2. Deskribirenyo ti pannakadisenio daytoy a broshur ken no ania dagiti linaonna.
2 No Kasano a Nadisenio: Nabingaybingay daytoy a broshur iti tallo a benneg. Ti tunggal benneg ilawlawagna ti nagduduma nga aspeto maipapan iti organisasion ni Jehova kas nadakamat iti ngato. Ti paulo ti 28 a leksion ket naidatag kas saludsod, ket dagiti subtitulo a napuskol ti pannakaisuratna ti sungbat dagita a saludsod. Adda dagiti ladawan a naala manipud iti nasurok a 50 a pagilian a mangipakita a ti trabahotayo ket maar-aramid iti intero a lubong. Adu dagiti leksion nga addaan iti kahon nga “Ammuem ti Ad-adu Pay,” a naglaon kadagiti singasing a mabalinmo nga iparegta nga aramiden ti yad-adalam.
3. Kasanotayo nga usaren ti broshur a Pagayatan ni Jehova?
3 No Kasano nga Usaren: Irugiyo babaen ti panangipakitayo iti saludsod a paulo ti leksion. Bayat ti panangbasayo a dua iti leksion, itampokyo dagiti subtitulo a napuskol ti pannakaisuratna. Kalpasanna, pagsaritaanyo dagiti pangrepaso a saludsod iti baba ti panid. Mabalinyo a basaen ken pagsaritaan a diretso ti intero a leksion wenno basaen ken pagsaritaanyo a subtitulo por subtitulo. Panunotenyo a naimbag no ania a teksto ti basaenyo. Saanyo a liplipatan nga usigen dagiti ladawan ken dagiti kahon nga “Ammuem ti Ad-adu Pay.” Kaaduanna a nasaysayaat no pagsasarunuenyo nga adalen ti tunggal leksion. Nupay kasta, mabalinyo ti umallatiw iti leksion a maitutop iti kasasaad. Kas pagarigan, no asidegen ti asamblea wenno kombension, mabalinyo nga adalen ti leksion 11.
4. Apay a maragsakanka iti daytoy baro nga alikamen?
4 No adda yad-adalantayo iti Biblia, tulongantayo a mangam-ammo iti nailangitan nga Amatayo. Nupay kasta, masapul nga isurotayo met ti maipapan iti organisasion ni Jehova. (Prov. 6:20) Anian a makaparagsak ta addaantayo iti baro nga alikamen a mangpalaka iti panangaramidtayo iti dayta!