Panangisuro Babaen ti Broshur a Naimbag a Damag
1. Kasano ti pannakadisenio ti broshur a Naimbag a Damag?
1 Kas nadakamat iti ruar Ti Ministeriotayo iti Pagarian idi Hulio, ti broshur a Naimbag a Damag Manipud iti Dios ket maysa kadagiti napateg nga alikamentayo a mangisuro. Saan a nakotar dagiti nadakamat a teksto tapno matagiragsak dagiti bumalay ti direkta a panagsursuro manipud iti Biblia. Nupay adu kadagiti publikasion nga us-usarentayo a mangyadal ket naisurat iti pamay-an a nalaka a tarusan dagiti tattao ti kinapudno uray no awan ti mangisuro kadakuada, daytoy a publikasion ket nadisenio nga adda mangisuro. Gapuna, no itukontayo daytoy, ikagumaantayo nga idemostra ti panagadal tapno makita ti bumalay a nagsayaat nga adalen ti naimbag a damag manipud iti Biblia.—Mat. 13:44.
2. Kasanotayo nga usaren ti broshur a Naimbag a Damag iti damo a pannakisarita?
2 Iti Damo a Pannakisarita: Mabalinyo nga ibaga: “Bumisbisitakami ta maseknan dagiti tattao no ania ti pagtungpalan ti lubong. Panagkunam, sumayaat pay ngata ti kasasaad? [Palubosanyo a sumungbat.] Naglaon ti Biblia iti naimbag a damag a mangted kadatayo iti namnama. Adtoy ti sumagmamano a saludsod a sungbatan ti Biblia.” Iyawat ti broshur iti bumalay, ken pagpiliem iti saludsod iti makinlikud nga akkubna. Kalpasanna, ipakita no kasano ti panagadal ket usaren ti umuna a parapo iti napilina a leksion. Mabalin met a mangibangonka iti makapainteres a saludsod iti bumalay a naibatay iti napilim a leksion sa idemostram no kasano a makatulong kenkuana ti broshur a mangbirok iti sungbat ti Biblia. No ti leksion ket adda katupagna a video iti jw.org, dadduma nga agibumbunannag ti mangipabuya iti dayta bayat ti panangidemostrada.
3. Ilawlawagyo no kasano nga usaren ti broshur a Naimbag a Damag iti panangyadal.
3 No Kasano nga Aramiden ti Panagadal: (1) Basaen ti nanumeruan ken napuskol ti pannakaisuratna a saludsod tapno maipamaysa ti panunot ti bumalay iti kangrunaan a punto. (2) Basaen ti parapo nga adda iti babaenna. (3) Basaen dagiti teksto a nakaitaliko, ken sitataktika a mangibangon kadagiti saludsod tapno matulongan ti bumalay a mangkita no kasano a dagiti teksto sungbatanna ti nanumeruan a saludsod. (4) No adda pay kanayonan a parapo iti babaen ti saludsod, uliten ti numero 2 ken 3. No adda video a katupag ti saludsod ket saan pay a naipabuya iti bumalay, aramiden dayta bayat ti panagadal. (5) Kamaudiananna, kiddawen iti bumalay a sungbatanna ti nanumeruan a saludsod tapno masigurado a naawatanna.
4. Ania ti makatulong tapno mausartayo a naimbag daytoy nagpateg nga alikamen?
4 Kabesaduenyo daytoy nagpateg nga alikamen. Usarenyo dayta iti amin a mayanatup a gundaway. Sakbay nga agadalkayo, ikabilanganyo ti iyad-adalanyo ken no ania ti kasayaatan a pannakirinnason kenkuana, nga usarenyo dagiti teksto iti leksion. (Prov. 15:28; Ara. 17:2, 3) Bayat nga umad-adu ti kapadasanyo ken lumalaingkayo, mabalin nga ibilangyonto daytoy a broshur kas maysa kadagiti paboritoyo nga alikamen a mangisuro iti kinapudno!