Maiwaras Inton Enero ti Kingdom News No. 38!
1. Ania dagiti saludsod dagiti tattao maipapan kadagiti natay, ken kasano a masungbatan dagita inton Enero?
1 Ti patay ket kabusor ti amin a tao, aniaman ti patpatienda. (1 Cor. 15:26) Adu ti mangpampanunot no sadino ti ayan dagiti natay ken no makitadanto ngata manen ida. Gapuna, dagiti kongregasion iti intero a lubong ket makipasetto iti makabulan a panagiwaras iti Kingdom News No. 38 a napauluan, Talaga Kadi nga Agbiagto Manen Dagiti Natay? Iti Pilipinas, mangrugi daytoy nga espesial a kampania inton Enero 1, 2014. Kalpasan daytoy a kampania, ti Kingdom News No. 38 ket mausarto iti ministerio kas tract.
2. Kasano ti pannakadisenio ti Kingdom News No. 38?
2 No Kasano ti Pannakadiseniona: Ti Kingdom News No. 38 ket makulpi a paatiddog tapno makita iti sangona ti makapainteres a paulo ken ti sasao a “Panagkunam . . . wen? saan? siguro?” No ukraden ti bumalay, mabasana ti sungbat ti Biblia iti saludsod a pannakapaulo ti Kingdom News ken no kasano a makagunggona kenkuana ti kari ti Biblia. Makitana met no apay a rumbeng a mamati iti Biblia. Iti likud ti Kingdom News, adda makapainteres a saludsod a pagpanunotanna ken mangawis kenkuana a mangammo iti ad-adu pay.
3. Kasano nga iwaras ti Kingdom News No. 38?
3 No Kasano nga Iwaras: Daytoy a kampania ket kas met laeng iti kampania a panagiwaras kadagiti imbitasion iti Memorial ken kombension distrito. Mangipaay dagiti panglakayen iti instruksion no kasano a mawanas ti teritoriayo, maitunos iti surat a napetsaan iti Abril 1, 2013. Dagiti kongregasion a bassit ti teritoriana ket mabalin a tumulong kadagiti kabangibangda a kongregasion nga addaan iti nalawlawa a teritoria. No mangalakayo iti suplayyo iti Kingdom News No. 38, laglagipenyo a ti laeng kasapulanyo iti makalawas ti alaenyo. Kabayatan ti kampania, mabalin ti agiwaras kadagiti kopia bayat ti publiko a panangasaba no nawanasen ti teritoriayo babaen ti panagbalaybalay. No naibusen ti suplayyo sakbay nga agngudo ti bulan, ipaimayo ti literatura a tukon iti dayta a bulan. Iti umuna a Sabado, ipamaysatayo ti makiraman iti espesial a kampania imbes nga iti panangirugi kadagiti panangyadal iti Biblia. Kadagiti ngudo ti lawas, mabalintayo met nga ipaima dagiti magasin no maitutop. Iplamplanoyo kadin ti makiraman a naan-anay iti daytoy nga espesial a kampania?