Mangrugi iti Marso 1 ti Kampania a Mangipakaammo iti Memorial
1. Kaano nga irugitayo ti kampania a mangyawis iti Memorial, ken apay a napapaut ti kampania iti daytoy a tawen?
1 Inton Biernes, Marso 1, mangruginton ti tinawen a kampaniatayo a mangawis kadagiti tattao a tumabuno iti Memorial. Maangay ti Memorial inton Marso 26. Kayatna a sawen a napapaut ita ti kampania no idilig kadagiti napalabas a tawen, isu nga ad-adu a tattao ti maikkan iti gundaway a makaawat iti imbitasion, nangnangruna no nalawa ti teritoria ti kongregasion a makinsakup iti lugar a pagnanaedanda.
2. Ania dagiti urnos iti panangala kadagiti kopia ti imbitasion ken iti panangwanas iti teritoria?
2 Pagbalinen nga Organisado: Mangted dagiti panglakayen iti instruksion no kasano a wanasen ti teritoria, kasta met no rumbeng a mangibatitayo kadagiti imbitasion kadagiti pagtaengan nga awan dagiti bumalayna. No nawanasen ti teritoriayo ket adda pay nabati nga imbitasion, mabalinyo nga iwaras dagita no mangasabakayo iti publiko. Siguraduen ti manangaywan iti serbisio nga adda suplay ti namarkaan nga imbitasion iti pagalaan iti literatura wenno magasin tapno adda usaren dagiti agibumbunannag, ngem saan a mairuar a mamimpinsan dagiti imbitasion. Mangalatayo laeng iti imbitasion a kabaelantayo nga iwaras iti makalawas.
3. Ania ti laglagipentayo no agiwarastayo iti imbitasion?
3 Ania ti Ibagatayo? Nasaysayaat no ababa laeng ti ibagatayo tapno ad-adu ti maikkantayo iti imbitasion. Adda iti panid 4 ti pagtuladan a presentasion a mabalintayo nga ibagay iti teritoriatayo. Siempre, saan a kasapulan nga agdardarastayo no ti bumalay ket mannakigayyem wenno adu ti saludsodna. No agiwarastayo iti imbitasion kadagiti ngudo ti lawas, mabalintayo met nga itukon dagiti magasin no maitutop. Inton Marso 2, ipamaysatayo ti agiwaras kadagiti imbitasion, saan ket nga iti panangirugi kadagiti panangyadal iti Biblia.
4. Apay a sireregta a makiramantayo iti kampania?
4 Namnamaentayo nga adu ti makiraman kadatayo a tumabuno iti Memorial. Mailawlawag iti palawag no siasino a talaga ni Jesus. (1 Cor. 11:26) Mailawlawag pay no kasano a makatulong kadatayo ti ipapatayna. (Roma 6:23) Ken maitampok no apay a napateg a laglagipentayo ni Jesus. (Juan 17:3) Sapay koma ta sireregta a makiramantayo iti daytoy a kampania!