Panangirugi Kadagiti Panangyadal iti Broshur a Kalikaguman
1 Ipakita dagiti report iti intero a lubong a ti broshur nga Ania ti Kalikaguman ti Dios Kadatayo? ket nabileg nga alikamen iti panangisuro iti kinapudno kadagiti tattao. Iti linawas, rinibu a panagadal iti Biblia ti mairugrugi iti daytoy a broshur. Naballigi aya ti panangusaryo iti broshur a Kalikaguman iti panangirugi ken panangikonduktayo iti panagadal iti Biblia?
2 Nupay ammo ti kaaduan a nalaka nga ipaima ti broshur, saan nga ammo ti dadduma no aniat’ ibagada tapno mairugi ti panagadal. Ania dagiti epektibo a metodo nga ar-aramiden ti dadduma iti panangirugi kadagiti panangyadal iti Biblia babaen ti broshur a Kalikaguman? Makatulong unay dagitoy a singasing.
3 Itukonyo ti Panangidemostra iti Panagadal: Imbes nga itukontay lattan ti panagadal iti Biblia iti bumalay kabayatan ti damo nga ibibisita wenno panagsarungkar, mabalin nga idemostratayo no kasano ti pannakaikondukta ti panagadal iti Biblia. Daytoy ti mangikkat iti misterio ken panagamak ti adu a bumalay a mangpampanunot iti kaipapanan ti sao a “panagadal.” Apaman a masursurotay nga idemostra dayta, makitatayto a babaen ti simple nga introduksion, mairugitayo a dagus ti panagadal.
4 Ti Panagsagana Isu ti Tulbek: Ti kinarayraytayo a mangirugi kadagiti panangyadal iti Biblia ket direkta a nainaig iti nasayaat a panagsaganatayo. Ti nasakbay a panagsagana tulongannatayo a mangparmek iti aniaman a panagalikakatayo a makiraman iti trabaho a panangyadal iti Biblia. Babaen ti mamin-adu a panangensayotay iti presentasiontayo, maparang-aytay ti pannakisaritatayo, a kabaelantay ti makisarita a natural ken iti bukodtayo a sasao. Tulongannatayo daytoy nga agbalin a kalmado ken nalaglag-an pay ti rikna ti bumalay.
5 No agen-ensayokayo, makatulong no orasanyo ti presentasionyo tapno maibagayo iti bumalay no kasano kapaut ti panangidemostra iti panagadal. Kalpasan a makiam-ammo, kuna ti maysa a kabsat: “Immayak tapno ipakitak kadakayo ti libre a programami a panangyadal iti Biblia. Maidemostra dayta iti agarup lima a minuto. Mabalinkay kadi a kasarita iti lima a minuto?” Mabalin nga idemostra iti agarup lima a minuto ti Leksion 1 iti broshur a Kalikaguman. Siempre, sumagmamano laeng a kasuratan ti mabasa no kastoy ti kabiitna, ngem mapadasanen ti bumalay ti damo a panagadalna babaen ti panangileppas iti umuna a leksion iti sumagmamano a minuto. Kalpasanna ibagayo kenkuana nga inton ituloyyo nga adalen ti Leksion 2, mangbusboskayo laeng iti 15 a minuto.
6 Napaneknekan nga Epektibo ti Sumaganad a Presentasion:
◼ “Kayatko nga idemostra kadakayo ti nakasimsimple ngem napartak a kurso a panagadal iti Biblia iti pagtaengan babaen iti daytoy a broshur nga Ania ti Kalikaguman ti Dios Kadatayo? Napaneknekan dagiti adu nga iti 15 laeng a minuto iti kada lawas, iti las-ud ti 16 a lawas, nabirokanda dagiti makapnek a Nainkasuratan a sungbat dagitoy a napapateg a saludsod iti Biblia.” Ipakita iti apagbiit dagiti linaonna. Iturongyo iti Leksion 1, sa kunaenyo: “No maipaayandakami iti agarup lima a minuto, kayatmi nga ipakita kadakayo no kasano a maaramid daytoy. Ti Leksion 1 ket napauluan iti ‘No kasanoyo a Maammuan ti Kalikaguman ti Dios.’” Kalpasanna basaenyo dagiti tallo a saludsod, sayo ilawlawag dagiti numero iti parentesis. Basaenyo ti parapo 1, sa ipakitayo iti bumalay no kasano a biroken ti sungbat. Mabalin nga ipabasa ti parapo 2 iti bumalay. Kalpasanna kunaenyo: “Maibasar iti daytoy nga impormasion, kasanoyo a sungbatan daytoy a saludsod? [Basaenyo manen ti saludsod, sa palubosanyo nga agkomento ti bumalay.] No kitaenyo, addada kasuratan iti kada parapo. Dagitoy ti mangiturong iti atensiontayo iti sungbat ti Biblia kadagitoy a saludsod. Kas pagarigan, basaentayo ti 2 Timoteo 3:16, 17 ket kitaentayo no sumuporta dayta iti sungbatyo mainaig iti autor ti Biblia.” Kalpasan a mabasa ti parapo 3, mausig ti saludsod, ken mabasa ti Juan 17:3, iturongyo ti atension ti bumalay iti nagun-odna a pannakaammo babaen ti panangrepaso iti Leksion 1. Kalpasanna mabalinyo nga iturong iti Leksion 2 sa basaenyo ti maudi a saludsod, “Ania ti dua a pamay-an a maam-ammotayo ti Dios?” Sayo isaludsod: “Kaanonto a mabalinka a sarungkaran iti agarup 15 a minuto tapno maituloyta ti Leksion 2 ken birokenta ti sungbat?”
7 Nasken a taginayonen a simple ti saritaan ken ikagumaanyo a komendaran ti bumalay. No iyurnosyo ti sumaganad nga isasarungkar, imbes a saludsodenyo no kayatna nga itultuloy, paregtaenyo ketdi a kastanto met laeng ti aramidenna iti sumaganad a leksion. Ibagayo a segseggaanyo ti sumubli. Intukon ti dadduma nga agibumbunannag ti panagadal iti telepono no narigat ti eskediul. Mabalinyo met a paregtaen ti estudiante nga idalimanekna ti broshur iti natalged ken kombeniente a lugar tapno madadaan nga usaren iti sumaganad nga ibibisitayo.
8 Determinadokayo Koma: Idinto ta ti panagsagana ti tulbek iti balligi, determinadotay koma a mangaramid iti dayta. Narigat ti mangisuro iti maysa a leksion iti sumagmamano laeng a minuto, isu a determinadokayo koma a mangensayo iti presentasion a mamin-adu tapno nasayud ti panagsaoyo inton idemostrayo ti panagadal. Ikagumaanyo nga idemostra ti panagadal iti tunggal makasabaanyo iti binalaybalay, iti impormal, ken iti telepono. No marigatankayo a mangirugi iti panangyadal iti Biblia, dikay maupay. Tapno agballigi a mangirugi kadagiti panangyadal iti Biblia kasapulan ti determinasion ken napasnek a tarigagay a mangiburay iti kinapudno kadagiti sabsabali.—Gal. 6:9.
9 Babaen ti panangyaplikar kadagitoy a singasing, maaddaankay met iti pribilehio a tumulong iti sabali a magna iti dalan nga agturong iti biag, babaen ti panangirugi ken panangikondukta iti panagadal iti Biblia iti broshur a Kalikaguman.—Mat. 7:14.