MAPASARDENGTAYO TI PANAGWARAS TI GURA
2 | Saanka nga Agibales
Pannursuro ti Biblia:
“Diyo subadan iti dakes dagiti agaramid kadakayo iti dakes. . . . Agingga a posible, aramidenyo ti amin a kabaelanyo a makikappia iti amin a tao. . . . Saanyo nga ibalesan ti bagiyo, . . . ta naisurat: ‘“Kukuak ti pammales; siakto ti agibales,” kuna ni Jehova.’”—ROMA 12:17-19.
Ti Kaipapananna:
Nupay normal laeng a makaungettayo no napasaktandatayo, saan a kayat ti Dios nga agibalestayo. Imbes ketdi, kayatna nga agan-anustayo ken urayentayo nga isu ti mangilinteg iti amin a banag.—Salmo 37:7, 10.
Ti Maaramidam:
No agibales ti imperpekto a tao, ad-adda la a kumaro ti gura. Isu a no adda nangpasakit kenka, dika agibalbales. Ikarigatam ti saan a makiapa ken kontrolem ti riknam. Iti dadduma a situasion, nasaysayaat no lipatem lattan ti napasamak. (Proverbio 19:11) Siempre, no makitam a makatulong, mabalin a solusionam ti problemam. Kas pagarigan, no biktimaka ti maysa a krimen, mabalinmo nga ireport kadagiti polis wenno dadduma pay nga adda iti autoridad.
No agibaleska, sika ti lugi
Kasanon no awan ti makitam a makatulong a solusion iti problemam? Wenno kasanon no naaramidmon ti amin tapno masolbarmo ti problemam iti nasayaat a pamay-an? Saanka nga agibales. Baka kumaro laeng ti situasion. Imbes ketdi, pasardengem ti panagwaras ti gura. Agtalekka iti pamay-an ti Dios a mangsolbar iti problema. “Agpannurayka kenkuana, ket tulongannakanto.”—Salmo 37:3-5.