MAPASARDENGTAYO TI PANAGWARAS TI GURA

3 | Lipatem ti Gura

Pannursuro ti Biblia:

“Pabaruenyo ti kinataoyo babaen ti panangbalbaliwyo iti panunotyo, tapno mapaneknekanyo iti bagiyo ti nasayaat, makaay-ayo, ken perpekto a pagayatan ti Dios.”—ROMA 12:2.

Ti Kaipapananna:

Importante iti Dios ti pampanunotentayo. (Jeremias 17:10) Saantayo nga agsao wenno agaramid iti aniaman a makasakit iti dadduma. Ngem saan nga umanay dayta. Ti gura ket mangrugi iti panunot ken puso. Isu a masapul a parutentayo ti aniaman a gura iti panunot ken riknatayo. No aramidentayo dayta, arigna ‘pabpabaruentayo’ ti kinataotayo ket mapasardengtayo ti panagwaras ti gura.

Ti Maaramidam:

Panunotem a naimbag no ania a talaga ti panangkitam iti dadduma—lalo kadagiti sabali ti pulina wenno naggapu iti sabali a nasion. Isaludsodmo iti bagim: ‘Ania ti pangibilangak kadakuada? Talaga kadi nga am-ammok ida? Wenno mangidumdumaak?’ Saanka nga agbuya wenno agbasa iti aniaman a mangitampok iti gura ken kinaranggas.

Matulongannatayo ti Sao ti Dios a manglaban iti gura iti puso ken panunottayo

Saan a kanayon a nalaka a kitaen ti pampanunot ken rikriknatayo a bukbukodtayo. Ngem matulongannatayo ti Sao ti Dios tapno mailasintayo dagiti “pampanunoten ken tarigagay ti pusotayo.” (Hebreo 4:12) Isu nga itultuloymo nga adalen ti Biblia. Kitaem no agpada ti isursurona ken ti panagpampanunotmo, ken ikagumaam nga itunos ti pampanunotmo iti isursuro ti Biblia. Matulongannatayo ti Sao ti Dios a manglaban iti arigna “natibker ti pannakapaderna” a gura iti panunot ken pusotayo.—2 Corinto 10:4, 5.

Kapadasan—STEPHEN

Binalbaliwanna ti Panagpampanunotna

Biktima ni Stephen ken ti pamiliana iti panangidumduma dagiti puraw. Gapu iti dayta, nakiraman iti maysa a grupo ti politika a mangilablaban iti kalintegan dagiti tattao babaen ti naranggas a panagprotesta. Imbaga ni Stephen: “Napankami nagbuya kadagiti gagayyemko iti pelikula maipapan iti pannakaparigat idi dagiti Africano nga adipen iti United States. Gapu iti dayta a kinaawan hustisia, permi ti pungtotmi, isu a kinabkabilmi dagiti puraw nga agtutubo iti dayta a pagsinean. Idi kuan, napankami iti lugar dagiti puraw tapno agbirok iti ad-adu pay a kabilenmi.”

Dakkel ti nagbalbaliwan ni Stephen idi nangrugi a makipagadal iti Biblia kadagiti Saksi ni Jehova. Inyestoriana: “Gapu ta adu ti nakitak a panangidumduma iti puli, talaga a nasdaawak idi makitak no kasano a tratuen dagiti Saksi dagiti kapammatianda. Kas pagarigan, idi nagabrod ti maysa a Saksi a puraw, impaaywanna dagiti annakna iti maysa a pamilia a black American. Pinagyan met ti maysa a pamilia a puraw ti maysa a black American nga agtutubo iti balayda gapu ta awan pagyananna.” Nakita ni Stephen kadagiti Saksi ni Jehova ti pudpudno nga ayat nga impakpakauna ni Jesus a pakakitaan iti pudno a Kristiano.—Juan 13:35.

Kasano a naisardeng ni Stephen ti kinaranggasna? Nakatulong kenkuana ti Roma 12:2. Imbagana: “Nabigbigko a masapul a balbaliwak ti panagpampanunotko tapno agbalinak a mannakikappia ken nakitak a dayta ti kasayaatan a wagas ti panagbiag.” Naragsaken ni Stephen ta awanen ti marikriknana a gura iti nasuroken nga 40 a tawen.