No Kasanoka a Makapag-adjust iti Baro a Kongregasionmo

Naipasango da Nicolas ken Céline iti naiduma a karit. Inawatda ti asaynment manipud iti sangay ti France nga umakarda iti baro a kongregasion. Inyestoriada: “Eksaytedkami idi damo. Ngem idi kuan, narigatankami ta mailiwkami metten kadagiti gagayyemmi. Saanmi pay unay a ka-close dagiti kakabsat iti baro a kongregasionmi.”a Uray adda dagiti pakarigatan, kasanoka latta nga agbalin a naragsak ken adu ti magapuanam uray sabalin ti kongregasionmo? Ania ti maitulong ti dadduma? Ken ania dagiti naespirituan a bendision a mabalin a maawatmo ken maitedmo iti baro a kongregasionmo?

UPPAT A PRINSIPIO A MAKATULONG KENKA NGA AG-ADJUST

1. Agpannurayka ken Jehova. (Sal. 37:5) Pinanawan ni Kazumi a taga-Japan ti kongregasion a nakaitimpuyoganna iti 20 a tawen idi nayakar ni lakayna iti trabaho. Kasano a ‘nagpaidalan ken Jehova’? Imbagana: “Maulit-ulit nga imbagak ken Jehova ti amin a pagdandanagak, pakalidlidayak, ken pakaburburiborak. Kada aramidek dayta, papigsaennak.”

Kasanoka a mas makapagpannuray ken Jehova? No kasano a kasapulan a masibugan ken maabunuan ti mula tapno dumakkel, kasta met ti pammatitayo. Masapul nga arigna masibugan ken maabunuan dayta tapno tumibker. Inutob ti nadakamaten a ni Nicolas ti ulidan da Abraham, Jesus, ken Pablo, a nagadu ti insakripisioda tapno maaramidda ti pagayatan ti Dios. Dayta ti timmulong ken Nicolas a mas agtalek a tulongan isuna ni Jehova. No regular nga adalem ti Biblia, matulongannaka dayta nga ag-adjust iti aniaman a panagbalbaliw iti biagmo ken makasursuroka met kadagiti naespirituan a gameng a mabalinmo nga usaren a mangparegta kadagiti kakabsat iti baro a kongregasionmo.

2. Dika agikompara. (Ecl. 7:10) Ni Jules a taga-Benin ket masapul nga ag-adjust iti naiduma unay a kultura idi immakar iti United States. “Panagriknak idi damo ket masapul nga iyestoriak ti intero a kabibiagko iti tunggal tao a maam-ammok, ngem naiduma dayta iti nakairuamak.” Gapu ta naiduma dayta iti nakairuamanna, insinsinana ti bagina kadagiti kakabsat. Ngem idi mas naam-ammonan dagiti kakabsat, nagbalbaliw ti panangmatmatna. Imbagana: “Nabigbigko a sadinoman ti ayantayo, agpapada laeng ti amin a tattao. Agdudumatayo laeng iti pamay-an nga agsao ken agtignay. Isu a nagpateg nga awatentayo dagiti tattao uray naiduma ti personalidadda kadatayo.” Masapul ngarud a ditay ikomkompara ti dati a kongregasiontayo iti baron a kongregasiontayo. Kas iti imbaga ti maysa a payunir a sister a ni Anne-Lise: “Immakarak tapno makasursuroak iti baro a bambanag, saan a gapu ta namnamaek nga amin a napanawak iti dati a kongregasionko ket isu met laeng ti masangpetak iti baro a kongregasionko.”

Masapul met a saan nga ikompara dagiti panglakayen ti dati a kongregasionda iti baro a kongregasionda. Saan a gapu ta naiduma ti pamay-an dagiti panglakayen iti immakaram a kongregasion a mangasikaso iti bambanag ket kamalin ti ar-aramidenda. Isu a nasayaat nga ammuem ti ad-adu pay maipapan iti kasasaad ti lugarda sakbay a mangtedka iti suhestion. (Ecl. 3:​1, 7b) Nasaysayaat nga isurom ida babaen ti ulidanmo, imbes nga ipilitmo kadakuada nga agpanunotda a kas kenka.—2 Cor. 1:24.

3. Agbalinka a busy iti baro a kongregasionmo. (Fil. 1:27) Agpayso a natrabaho ti umakar ken adu a tiempo ti mabusbosmo. Ngem napateg a makigimongka a dagus iti baro a kongregasionmo iti in person, agingga a posible. Apay? Ngamin, no saandaka a makitkita dagiti baro a kakongregasionmo wenno no manmanodaka a makita, kasanodaka a matulongan? Kas pagarigan, ni Lucinda ken ti dua a babbalasangna ket immakar iti dakkel a siudad iti South Africa. Imbagana: “Pinaregtadak dagiti gagayyemko nga agbalinak a busy kadagiti aktibidad iti kongregasion, a makikaduaak kadagiti kakabsat iti ministerio, ken agkomentoak kadagiti gimong. Imbagami met kadagiti kakabsat a mabalinda nga usaren ti balaymi a pagtataripnongan sakbay ti panangasaba.”

No ‘makidanggayka’ kadagiti kakabsat kadagiti aktibidad ti baro a kongregasionmo, mapabilegmo ti pammatim ken ‘ti pammati ti dadduma iti naimbag a damag.’ Ni Anne-Lise a nadakamat itay ket pinaregta dagiti panglakayen a padasenna ti makikadua kadagiti kakabsat a mangasaba. Ti resultana? “Dagus a nabigbigko a nagdakkel ti maitulong dayta kaniak tapno nalaklakaak a maka-adjust,” imbagana. Kasta met, no agboluntarioka kadagiti aktibidad a kas iti panagdalus ken panangmantener iti Kingdom Hall, ipakpakitam nga ibilbilangmon a kongregasionmo ti immakaram. No kanayon a makiramanka kadagiti aktibidad ti baro a kongregasionmo, nalaklaka nga iyasideg dagiti kakabsat ti bagida kenka, ken mariknam a pasetkan iti baro a naespirituan a pamiliam.

4. Agbirokka iti baro a gagayyem. (2 Cor. 6:​11-13) Ti kasayaatan a pamay-an tapno makabirokka kadagiti gagayyem ket ti panangipakitam iti personal nga interes. Isu a mangiwayaka iti tiempo sakbay ken kalpasan ti gimongyo nga umasideg iti dadduma ken am-ammuen ida. Ikagumaam a kabesaduen ti naganda. No ngamin mannakigayyemka, nalakaka a maas-asitgan, ken no matandaanam ti nagan dagiti tattao, mas kayatdaka met a maam-ammo ken posible a maaddaanka iti nasayaat a gagayyem.

Imbes nga agpammarangka tapno laeng kayatdaka dagiti kakabsat iti baro a kongregasionmo, bay-am ketdi a maam-ammoda no siasinoka a talaga. Adda masursurotayo iti imbaga ni Lucinda, “Adu dagiti gagayyemmi ita a nagbalin a nadekket kadakami gapu ta dakami ti immuna a nangimbitar kadakuada iti balaymi.”

“AWATENYO TI MAYSA KEN MAYSA”

Mabalin a makapa-stress iti dadduma ti sumrek iti Kingdom Hall nga awan a pulos ti am-ammoda. Isu a kasanom a matulongan dagiti immakar iti kongregasionyo? Imparegta ni apostol Pablo: “Awatenyo ti maysa ken maysa kas iti panangawat kadakayo ti Kristo.” (Roma 15:7) Matulad dagiti panglakayen ni Kristo no tulonganda dagiti barbaro a makarikna a pasetdan iti baro a kongregasionda. (Kitaen ti kahon a “No Kasanoka nga Agballigi iti Panagakarmo.”) Ngem adda maaramidan ti amin, agraman dagiti ubbing, tapno marikna dagiti kaak-akar nga adda gagayyemda iti baro a kongregasionda.

Tapno matulongantayo dagiti kaak-akar iti kongregasiontayo, mabalin a datayo ti umuna a mangawis kadakuada iti balaytayo ken tulongantayo ida iti praktikal a pamay-an. Kas pagarigan, tinulongan ti maysa a sister ti sabali pay a sister a kaak-akar iti kongregasionda. Impasiarna iti ilida ken insurona no kasano ti ag-commute. Gapu iti dayta, natukay ti rikna ti sister ken natulongan nga ag-adjust.

GUNDAWAY A RUMANG-AY

Bayat a dumakdakkel ti dudon, mamin-adu nga aglupos sakbay a makatayab. Kasta met, no umakarka iti baro a kongregasion, kasapulam met ti arigna mamin-adu nga aglupos tapno maikkat dagiti pagdandanagam a mabalin a manglaplapped kenka nga arigna agtayab iti panagserbi ken Jehova. “Nagmayat a training ti panagakar,” imbaga ni Nicolas ken Céline. “Gapu ta kasapulanmi ti makibagay kadagiti tattao iti immakaranmi ken iti sabalin nga aglawlaw, nasursuromi dagiti baro a kualidad.” Imbaga ni Jean-Charles, a nadakamat iti rugrugi, no kasano a nakatulong iti pamiliana ti panagakarda: “Gapu iti dayta a panagbalbaliw, natulongan dagiti annakmi a rumang-ay ken agbalin a nadekdekket pay ken Jehova iti baro a kongregasionmi. Kalpasan laeng ti sumagmamano a bulan, nagpaseten ti balasangmi iti gimong iti tengnga ti lawas, ken nagpa-unbaptized publisher metten ti baromi.”

Kasano ngay no saan nga ipalubos ti kasasaadmo ti umakar, kas pagarigan, iti lugar a dakdakkel ti panagkasapulanna? Uray no saanka nga umakar iti kongregasion, mabalin a mariknam latta a kasla immakarka no iyaplikarmo dagiti suhestion a nadakamat iti daytoy nga artikulo. Agpannurayka ken Jehova, naan-anay a makipasetka kadagiti aktibidad ti kongregasion babaen ti pannakikaduam iti dadduma iti ministerio, ken mangbirokka kadagiti baro a gagayyem wenno palagdaem ti relasionmo kadagiti datin a gagayyemmo. Adda kadi praktikal a maitulongmo kadagiti kabbaro wenno kadagiti agkasapulan? No adda, sigurado a rumang-ayka iti naespirituan gapu ta ti ayat ti pakabigbigan dagiti pudno a Kristiano. (Juan 13:35) Masiguradom a ‘maragsakan unay ti Dios kadagita a datonmo.’—Heb. 13:16.

Nupay adda dagiti pakarigatan, adu a Kristiano ti nagballigi iti panagakarda iti baro a kongregasion—isu nga agballigika met! “Nakapagpalawaak gapu ta immakarak iti kongregasion,” imbaga ni Anne-Lise. Kombinsido met itan ni Kazumi a gapu iti panagakarna, ‘napadasanna ti tulong ni Jehova iti naidumduma a pamay-an.’ Komusta ngay met ni Jules? Imbagana: “Tinulongandak dagiti baro a gagayyemko tapno diak unay maikawa idi immakarak. Mariknak itan a pasetak iti baro a kongregasionko, isu a marigatanakto la ketdi no kas pagarigan ta pumanawak.”