Tulongantayo a Dagus Dagiti “Addaan iti Umiso a Kababalin”

1. Ania ti reaksion dagiti tattao no ikasabatayo kadakuada ti kinapudno? (Ara. 13:​47, 48; 16:​14, 15)

IDI umuna a siglo, dagus nga inawat ti adu a tattao ti kinapudno apaman a nangngegda dayta. (Basaen ti Aramid 13:​47, 48; 16:​14, 15.) Ita, adda met dagiti maragsakan uray no damoda pay laeng a mangngeg ti naimbag a damag. Adda met dagidiay saan nga interesado iti damo, ngem inton agangay, awatenda met laeng dayta ken agserbida ken Jehova. Ania ti masapul nga aramidentayo no makasaraktayo kadagiti “addaan iti umiso a kababalin” no mangaskasabatayo?

2. Ania ti pagpadaan ti trabahotayo a panagaramid iti adalan iti trabaho ti maysa a mannalon?

² Kitaentayo daytoy nga ilustrasion. Ti trabahotayo a panagaramid iti adalan ket mayarig iti trabaho ti maysa a mannalon. No naluomen ti bunga ti mulana, burasenna a dagus dayta. Ngem itultuloynanto latta a sibugan ti dadduma pay a mulana a saan pay a naluom ti bungana ken parukaenna ti daga a nakaimulaanda. Kasta met la ti panagaramid iti adalan. No adda nasarakantayo nga interesado, dagus a tulongantayo tapno agbalin nga adalan ni Kristo. Ket bayat nga ar-aramidentayo dayta, itultuloytayo latta a tulongan dagiti arigna saan pay a naluom, wenno saan pay a nakasagana nga umawat iti kinapudno. (Juan 4:​35, 36) Ania ti makatulong tapno maammuantayo no nakasaganan ti maysa wenno kasapulanna pay ti tiempo? Makatulong ti pannakatarus. Pagsasaritaantayo itan dagiti mabalintayo nga aramiden iti damo a pannakisaritatayo tapno matulongantayo dagiti interesado. Pagsasaritaantayo met no kasanotayo a matulongan ida nga agtultuloy a rumang-ay.

NO MAKASARAKTAYO ITI INTERESADO

3. Ania ti masapul nga aramidentayo no makasaraktayo iti interesado? (1 Corinto 9:26)

³ No makasaraktayo iti interesado, kayattayo a tulongan a dagus a mangam-ammo ken Jehova ken agbalin a gayyemna. Ania ngarud ti aramidentayo? Iti damo pay la a pannakisaritatayo, awisentayon nga agpayadal iti Biblia ken makigimong.—Basaen ti 1 Corinto 9:26.

4. Mangyestoriaka iti kapadasan maipapan iti maysa a kayatna a dagus ti agpayadal iti Biblia.

⁴ Awisentayo nga agadal. No dadduma, adda dagiti dagus a kayatda ti agpayadal iti Biblia. Kas pagarigan, maysa a Huebes, adda agtutubo a babai idiay Canada nga immasideg iti cart ken nangala iti broshur nga Agbiagka a Naragsak iti Agnanayon! Imbaga ti sister nga agka-cart a malaksid iti dayta a broshur, mabalinna met ti agpayadal iti Biblia nga awan bayadanna. Interesado ti agtutubo a babai ket intedna ti cell phone number-na. Kamalmanna, tineks dayta a babai ti sister. Dinamagna no kaanoda nga agadal. Idi imbaga ti sister no mabalinna ti mapan iti ngudo ti lawas, insaludsod ti babai: “No ngay inton bigat laengen ta awan obrak?” Nagadalda iti dayta a Biernes. Ken saan la a dayta. Nakigimong payen iti dayta met la a ngudo ti lawas. Nagpartak ti panagrang-ayna!

5. Ania ti makatulong tapno ammotayo no kaano ti kasayaatan a tiempo nga iyawistayo ti panagadal iti Biblia? (Kitaen met dagiti ladawan.)

⁵ Siempre, ditay ekspektaren nga amin a makasabaantayo ket kas iti nadakamat nga agtutubo a babai a kayatna a dagus ti agpayadal iti Biblia. Dadduma ti agkasapulan iti ad-adu pay a tiempo. Mabalintayo nga irugi ti saritaan iti topiko a paginteresan ti maysa. Ngem no agtalinaedtayo a positibo ken itultuloytayo nga ipakita ti personal nga interes, di agbayag, baka kayatnanto met laengen ti agpayadal iti Biblia. Ania ti mabalintayo nga ibaga no iyawistayo ti panagadal? Kitaentayo ti suhestion dagiti kakabsat nga epektibo a mangirugi iti panangyadal iti Biblia.

6. Ania dagiti mabalintayo nga ibaga tapno awaten ti kasarsaritatayo ti panagadal iti Biblia?

⁶ Imbaga dagiti agibumbunannag ken dagiti payunir a napagsaludsodan nga iti dadduma a lugar, nasaysayaat no saantayo nga usaren dagiti termino a kas iti “panagadal,” “Bible study,” wenno “suruandaka” no iyawistayo ti panagadal. Nakitada a maymayat no usarentayo ti sasao a kas iti “panagsasarita,” “panagiinnestoria,” ken “panangammo iti ibagbaga ti Biblia.” Tapno kayatnatayonto manen a kasarita, mabalintayo nga ibaga, “Ammom, adda nagmayat a sungbat ti Biblia maipapan kadagiti napateg a saludsodtayo iti biag” wenno “Ti Biblia ket saan laeng a maipapan iti relihion. Adu pay ti maitulongna iti inaldaw a panagbiagtayo.” Mabalintayo pay nga inayon: “Mabiit laeng ti panagsasaritatayo. Uray 10 wenno 15 minutes laeng, adun ti maammuam.” Saantayo a masapul nga usaren ti sasao nga “appointment” wenno “kada lawas.” Ngamin, baka mariknada no kua nga obligadoda a makisarita kadatayo.

7. Kaano a nakombinsir ti dadduma a talaga a nabirokandan ti kinapudno? (1 Corinto 14:​23-25)

⁷ Awisentayo a makigimong. Idi panawen ni apostol Pablo, nakombinsir ti dadduma a talaga a nabirokandan ti kinapudno idi damoda ti makigimong. (Basaen ti 1 Corinto 14:​23-25.) Masansan a kasta met la ita. Kaaduanna a naparpartak ti panagrang-ay dagiti kabbaro no mangrugidan a makigimong. Kaanom ngarud nga awisen ida a makigimong? Kinapudnona, iti leksion 10 ti libro nga Agbiagka a Naragsak iti Agnanayon!, iyaw-awisna iti interesado a makigimong. Ngem saanen a kasapulan nga urayem pay a maadalyo dayta a leksion ti libro sakbay nga awisem. Iti damo pay la a panagsaritayo, awisemon a dagus. Mabalinmo pay ketdin a dakamaten ti tema ti palawag publiko wenno dagiti punto a maadal iti Pagwanawanan iti dayta a lawas.

8. Ania ti mabalintayo nga ibaga no awisentayo ti maysa nga interesado a makigimong? (Isaias 54:13)

⁸ No awisentayo ti maysa nga interesado a makigimong, ilawlawagtayo no kasano a naiduma ti gimongtayo iti dadduma a relihion. Kas pagarigan, adda ti mayad-adalan a damona ti makigimong iti ngudo ti lawas. Insaludsodna iti mangyad-adal kenkuana bayat ti Panagadal iti Pagwanawanan: “Apay, am-ammo daydiay mangidadaulo ti amin a naganyo?” Inlawlawag ti sister nga ikagkagumaantayo nga am-ammuen ti amin a nagan dagiti kakongregasiontayo. Nakita ti mayad-adalan a naidumduma ti gimongtayo iti maar-aramid iti relihionna. (Basaen ti Isaias 54:13.) Ibagatayo nga aggigimongtayo tapno agdaydayawtayo ken Jehova, agsursurotayo maipapan kenkuana, ken agpipinnaregtatayo. (Heb. 2:12; 10:​24, 25) Dayta ti rason nga organisado dagiti gimongtayo ken adu ti masursurotayo kadagita. Awan met ti aniaman a maar-aramid a ritual wenno serseremonia. (1 Cor. 14:40) Simple laeng met ti disenio dagiti Kingdom Hall-tayo ken nalawag, isu a mas komportabletayo nga agsursuro. Ibagatayo met a neutraltayo iti politika ken saantayo a pagsasaritaan ti maipapan iti dayta. Ditay met makibibiang kadagiti isyu iti daytoy a lubong. Posible a makatulong iti iyad-adalantayo no nasaksakbay nga ipabuyatayo ti video nga Ania ti Maar-aramid iti Kingdom Hall? Iti kasta, addan pamalatpatanna inton makigimong.

9-10. No awisentayo ti maysa nga interesado, ania ti mabalintayo nga ibaga tapno saanna a marikna a pilpilitentayo a makigimong? (Kitaen met ti ladawan.)

⁹ Adda dagiti agpangadua a makigimong ta pampanunotenda a pilitentayo ida nga agbalin a Saksi ni Jehova. Isu nga ipasiguradotayo a maragsakantayo no adda dagiti bisita ken saantayo a pilpiliten ti asinoman a makipartisipar. Maawis ti amin a pamilia agraman dagiti addaan kadagiti babassit nga annak. Kadagiti gimongtayo, saan met a maisina dagiti ubbing tapno masuruan. Agkakatugaw dagiti nagannak ken annakda tapno agkakaduada nga agsursuro. Gapu iti dayta, ammo dagiti nagannak a natalged dagiti annakda ken ammoda no ania ti maisursuro kadakuada. (Deut. 31:12) Saantayo met nga agkolkolekta wenno agdawdawat iti donasion. Imbes ketdi, sursurotentayo ti bilin ni Jesus: “Inawatyo nga awan bayadna, itedyo nga awan bayadna.” (Mat. 10:8) Adda pay. Mabalinmo met nga ilawlawag iti maysa nga interesado a saanna a kasapulan ti agbado iti nangina. Ngamin, ti napateg iti Dios ket ti puso, saan ketdi a ti itsura wenno langa.—1 Sam. 16:7.

¹⁰ No makigimong ti maysa, aramidentayo ti amin a kabaelantayo tapno mariknana a maragsakantayo iti kaaddana. Iyam-ammotayo kadagiti panglakayen ken iti dadduma pay a kakabsat. No ngamin mariknana a mannakigayyemtayo, mas komportable ti riknana ken dakdakkel ti posibilidad a makigimongto manen. No manarimaan ti gimong, mabalintayo nga ipakita ti Bibliatayo no awan Bibliana. Makatulong dayta tapno masurotanna ti maipalpalawag wenno ti ad-adalentayo.

NO NAIRUGIN TI PANAGADAL ITI BIBLIA

11. Kasanotayo a maipakita nga ikabkabilangantayo ti oras ken eskediul ti iyad-adalantayo?

¹¹ Ania dagiti masapul a laglagipentayo no mangyadaltayo iti Biblia? Ikabilangantayo ti oras ken eskediul ti iyad-adalantayo. Kas pagarigan, no makitulagtayo iti oras, masapul a tungpalentayo dayta ken sapsapaentayo ti mapan, uray no managladladaw ti kaaduan a tattao iti lugartayo. Kanayonanna, nasaysayaat no ababa laeng ti damo a panagadaltayo. Sigun iti dadduma a kakabsat nga adu ti study-da, nasaysayaat no saan a lumbes iti oras a nagtulagantayo ti pannakisaritatayo iti mayad-adalan, uray no kayatna a maammuan ti ad-adu pay. Ken daytoy pay: Saan koma a datayo ti makaadu nga agsao. Bay-antayo met ti iyad-adalantayo nga iyebkasna ti pampanunoten ken marikriknana.—Prov. 10:19.

12. Ania koma ti panggeptayo uray iti rugrugi pay laeng ti panagadal?

¹² Uray iti rugrugi pay laeng ti panagadal, ti koman panggeptayo ket tulongantayo ti mayad-adalan a mangam-ammo ken mangayat kada Jehova ken Jesus. Maaramidtayo dayta no agpokustayo iti Biblia, saan ketdi nga iti ammo wenno iti pampanunotentayo. (Ara. 10:​25, 26) Nagsayaat nga ulidan ni apostol Pablo iti dayta a banag. Idi nangisuro kadagiti tattao, masansan a nagpokus isuna ken Jesu-Kristo, daydiay imbaon ni Jehova a mangtulong kadatayo a mangammo ken mangayat Kenkuana. (1 Cor. 2:​1, 2) Impaganetget met ni Pablo ti kinapateg ti panangtulong kadagiti mayad-adalan a mangpatanor kadagiti nagsayaat a kualidad a nayarig iti balitok, pirak, ken napateg a batbato. (1 Cor. 3:​11-15) Karaman kadagita a kualidad ti pammati, sirib, pannakatarus, ken panagbuteng ken Jehova. (Sal. 19:​9, 10; Prov. 3:​13-15; 1 Ped. 1:7) Matuladtayo met ti pamay-an ni apostol Pablo no tulongantayo dagiti iyad-adalantayo a maaddaan iti natibker a pammati ken suminged iti nadungngo a nailangitan nga Amatayo.—2 Cor. 1:24.

13. Kasanotayo nga agbalin a naanus ken mannakaawat kadagiti iyad-adalantayo? (2 Corinto 10:​4, 5) (Kitaen met ti ladawan.)

¹³ Matuladtayo met ti pamay-an ni Jesus iti panangisuro no agbalintayo a naanus ken mannakaawat. Kasano? Liklikantayo ti agsaludsod iti iyad-adalantayo iti mabalin a mangpabain kenkuana. No marigatan a mangawat iti maysa a punto, baka nasaysayaat no subliantayto laengen. Saantayo nga ipilit ti maysa a pannursuro ti Biblia no saanna pay a kabaelan nga akseptaren dayta. Baka kasapulanna pay ti ad-adu a tiempo tapno agramut iti pusona ti kinapudno. (Juan 16:12; Col. 2:​6, 7) Inyarig ti Biblia dagiti ulbod a pannursuro iti natibker ti pannakapaderna a bambanag nga ikagkagumaantayo a rebbaen. (Basaen ti 2 Corinto 10:​4, 5; kitaen met ti study note nga “overturning strongly entrenched things.”) Mabalin a saan a nalaka iti maysa nga iyad-adalan a tallikudan a dagus dagiti nabayagen a patpatienna. No kasta, masapul a tulongantayo pay ti iyad-adalantayo a maaddaan iti natibker a relasion ken Jehova. Iti kasta, nalaklakananton a tallikudan dagita.—Sal. 91:9.

NO MAKIGIMONGEN DAGITI KABBARO

14. Ania koma ti panangtratotayo kadagiti damdamoda ti makigimong?

¹⁴ Kayat ni Jehova a patas ti panangtratotayo iti amin a tattao sadinoman ti naggapuanda, aniaman ti kulturada, wenno kasasaadda iti biag. (Sant. 2:​1-4, 9) Kasanotayo ngarud a maipakita ti ayat kadagiti damdamoda ti makigimong?

15-16. Kasanotayo a maiparikna kadagiti damdamoda ti makigimong a maragsakantayo iti kaaddada?

¹⁵ Adda dagiti umay makigimong gapu laeng ta kayatda a maammuan no ania ti mapaspasamak kadagiti gimongtayo. Adda met dagiti umay gapu ta imparegta dagiti am-ammoda iti sabali a lugar a makigimongda. Isu a no adda makitatayo a damona ti makigimong, dagus nga asitgantayo. Agbalintayo met a mannakigayyem, ngem saan koma a sobra ta baka alusiisen. Awisentayo a makikatugaw kadatayo. Iranudtayo met ti Bibliatayo ken dagiti publikasion nga us-usarentayo iti panagadal, wenno ikkantayo iti bukodna a kopia. Kanayonanna, ikabilangantayo ti rikriknana. Kas pagarigan, adda idi lalaki a napan nakigimong. Ngem madandanagan gapu ta naiduma ti badona iti amin. Imbagana dayta iti brother a nangabrasa kenkuana. Imbaga ti brother a saan nga agdanag ta ordinario met la a tattao dagiti Saksi ni Jehova. Ita, bautisadon dayta a lalaki. Ngem saanna latta a malipatan ti imbaga dayta a brother. Nupay kasta, adda masapul a laglagipentayo: Agpayso a kayattayo nga ipakita ti personal nga interes, ngem agannadtayo tapno saantayo a makaibaga wenno agsaludsod iti mangpabain wenno personal unay.—1 Ped. 4:15.

¹⁶ Adda pay maaramidtayo tapno nalag-an ti rikna dagiti bisitatayo. Agbalintayo koma a naannad no agsasaritatayo, agkomento, ken no agpasettayo. Agannadtayo kadagiti ibagatayo maipapan kadagiti saan a Saksi wenno kadagiti patpatienda. Liklikantayo met dagiti makaitibkol wenno makainsulto. (Tito 2:8; 3:2) Kas pagarigan, ditay pulos uyawen wenno tagibassiten ti patpatienda. (2 Cor. 6:3) Nangnangruna koma a laglagipen daytoy dagiti brother a mangipapaay iti palawag publiko. Masapul a laglagipenda a saan a Saksi ti amin nga agdengdengngeg kadakuada. Isu nga ilawlawagda dagiti sasao wenno termino a saan a pamiliar iti publiko.

17. Ania koma ti panggeptayo no makasaraktayo kadagiti “addaan iti umiso a kababalin” ?

¹⁷ Bayat ti panaglabas ti aldaw, lallalo pay koma nga iyapuratayo ti trabahotayo a panangaramid iti adalan. Itultuloytayo a biroken dagiti “addaan iti umiso a kababalin nga umawat iti agnanayon a biag.” (Ara. 13:48) Dagus met nga awisentayo ida nga agadal iti Biblia ken makigimong. Iti kasta, matulongantayo ida a mangrugi a magna iti ‘dalan nga agturong iti biag.’—Mat. 7:14.