Nakaro a Panaglayus—Ania ti Ibaga ti Biblia?

Iti intero a lubong, adu ti maap-apektaran iti nakaro a layus. Kitaenyo dagitoy a report:

• “Iti napalabas nga al-aldaw, napadasan ti kabesera ti China ti kakaruan pay laeng a panagtudo iti uneg ti 140 a tawen. . . . Manipud Sabado agingga iti Mierkoles, nairekord ti 744.8 millimeters (29.3 inches) a tudo.”—AP News, Agosto 2, 2023.

• “Huebes ti maikadua nga aldaw ti panangdalapus ti bagyo a Khanun iti Japan. Gapu iti nakapigpigsa a tudo ken angin, dua ti natay. . . . Manamnama nga umabut iti 0.6 meters (2 feet) a tudo ti ibuyat ti bagyo iti kabambantayan a tengnga ti Taiwan.”—Deutsche Welle, Agosto 3, 2023.

• “Ti panaglayus [iti Nova Scotia] iti napalabas a ngudo ti lawas ket gapu iti nakapigpigsa a tudo iti rehion ti Canada nga adda iti kosta ti Atlantic. Dayta pay laeng ti kapigsaan a panagtudo iti dayta a lugar iti uneg ti 50 a tawen.”—BBC News, Hulio 24, 2023.

Ania ti ibaga ti Biblia maipapan kadagita a pasamak?

Pagilasinan iti “maudi nga al-aldaw”

Ipakita ti Biblia nga agbibiagtayon iti tiempo a maaw-awagan iti “maudi nga al-aldaw.” (2 Timoteo 3:1) Impadto ni Jesus nga iti panawentayo, makakitatayo kadagiti “nakabutbuteng a buya,” wenno nakaam-amak a pasamak. (Lucas 21:11) Ti panagbaliw ti klima ti maysa kadagiti kangrunaan a rason no apay a narigrigaten a mapakadaan, nasansansan, ken nakarkaron dagiti saan a nasayaat a paniempo.

Adda namnama

Ibaga ti Biblia a ti adu a nakabutbuteng a pasamak ita ditoy daga ipakitada ketdi nga adda namnama. Kasano? Imbaga ni Jesus: “Inton makitayo a mapaspasamaken dagitoy a banag, masiguradoyo nga asidegen ti Pagarian ti Dios.”—Lucas 21:31; Mateo 24:3.

Ipakita dagiti mapaspasamak ita nga asidegen a naan-anay a kontrolen ti Pagarian ti Dios dagiti puersa ti nakaparsuaan, a pakairamanan ti water cycle.—Job 36:27, 28; Salmo 107:29.

Tapno maammuam ti ad-adu pay no kasanonto a tarimaanen ti Pagarian ti Dios ti dagatayo, kitaem ti artikulo nga “Asino ti Makapasardeng iti Pannakaperdi ti Daga?”