Inusar Kadi ti Dios ti Ebolusion a Mangpataud iti Nagduduma a Kita ti Biag?

Ti sungbat ti Biblia

Saan. Nalawag nga ibaga ti Biblia a pinarsua ti Dios dagiti tattao ken ti nagduduma a ‘kita’ ti animal ken mula.a (Genesis 1:12, 21, 25, 27; Apocalipsis 4:11) Kunana a ti intero a pamilia ti tao ket nagtaud kada Adan ken Eva, ti immuna a nagannaktayo. (Genesis 3:20; 4:1) Saan a suportaran ti Biblia ti teoria nga inusar ti Dios ti ebolusion a mangpataud iti nagduduma a kita ti biag, a maaw-awagan no dadduma iti theistic evolution. Ngem ti agpayso, saan a kontraen ti Biblia ti ibagbaga ti siensia nga adda panagduduma iti tunggal kita ti biag.b

• Inusar kadi ti Dios ti ebolusion?

• Maitunos kadi ti ebolusion iti Biblia?

• Makuna kadi nga ebolusion ti abilidad dagiti mula ken animal nga agbaliw tapno laeng malasatanda ti kasasaad ti aglawlaw?

Inusar kadi ti Dios ti ebolusion?

Ti termino a “theistic evolution” ket tumukoy iti nagduduma a kapanunotan. Sigun iti Encyclopædia Britannica, tumukoy dayta a termino iti ideya a ti maysa nga inusar ti Dios a mangpataud kadagiti sibibiag a parsua ket ti proseso a dagiti laeng kapigsaan ti matedda (natural selection).

Mabalin met a ramanen ti theistic evolution dagiti sumaganad a kapanunotan:

• Iti nakabaybayagen a tiempo, maymaysa a banag ti nagtaudan ti amin a sibibiag nga organismo.

• Ti maysa a kita ti biag ket makapagbalin nga interamente a naiduma a kita ti biag. Daytoy a kapanunotan ket maawagan no dadduma iti macroevolution.

• Ti Dios ti makin-aramid kadagitoy a proseso.

Maitunos kadi ti ebolusion iti Biblia?

Ipakpakita ti theistic evolution a saan nga amin nga ibagbaga ti Biblia maipapan iti panamarsua iti Genesis ket umiso. Nupay kasta, tinukoy ni Jesus a ti salaysay iti Genesis ket pudpudno a pasamak. (Genesis 1:26, 27; 2:18-24; Mateo 19:4-6) Ibaga ti Biblia a sakbay nga immay ni Jesus ditoy daga, nagbiag idiay langit a kadua ti Dios ken tinulonganna ti Dios a mangpaadda iti “amin a banag.” (Juan 1:3) Gapuna, ti ideya nga inusar ti Dios ti ebolusion a mangpaadda iti nagduduma a kita ti biag ket saan a maitunos iti isursuro ti Biblia.

Makuna kadi nga ebolusion ti abilidad dagiti mula ken animal nga agbaliw tapno laeng malasatanda ti kasasaad ti aglawlaw?

Saan nga ilawlawag ti Biblia no mano a kakikita ti posible a tumaud iti maysa a kita ti biag. Saanna met a kontraen ti kinapudno a ti nagduduma a kita ti animal ken mula a pinarsua ti Dios ket mabalin nga agbaliw gapu iti panagtipon ti agduma a klase wenno panagbalbaliw ti aglawlaw. Nupay patien ti dadduma a dayta ket maysa a porma ti ebolusion, awan ti tumaud a baro a kita ti biag.