Kasanotayo a Mapabileg ti Pammatitayo iti Baro a Lubong a Kari ni Jehova?

1-2. Ania ti masapul nga aramidentayo bayat nga ur-urayentayo ti baro a lubong?

IPATPATEGTAYO ti kari ni Jehova a sukatanna daytoy a sistema ti bambanag iti nalinteg a baro a lubong. (2 Ped. 3:13) Uray ditay ammo no kaano a dumteng ti baro a lubong, ipakita dagiti ebidensia a saantayon nga aguray iti napapaut pay a tiempo.—Mat. 24:32-34, 36; Ara. 1:7.

² Ngem uray no kasano kabayagtayon iti kinapudno, masapultayo amin a patibkeren ti pammatitayo iti dayta a kari. Apay? Ngamin, uray ti nabileg a pammati ket mabalin a kumapuy. Kinapudnona, inawagan ni apostol Pablo ti kurang a pammati kas “ti basol a nalaka a mangisagud kadatayo.” (Heb. 12:1) Tapno saan a kumapuy ti pammatitayo, masapul a kanayon a panunotentayo dagiti ebidensia nga asidegen ti baro a lubong.—Heb. 11:1.

3. Ania ti pagsasaritaantayo iti daytoy nga artikulo?

³ Pagsasaritaantayo iti daytoy nga artikulo ti tallo nga aramidentayo tapno mapabileg ti pammatitayo iti baro a lubong nga inkari ni Jehova: (1) utoben ti subbot, (2) panunoten ti pannakabalin ni Jehova, ken (3) agbalin nga okupado kadagiti naespirituan nga aktibidad. Kalpasanna, pagsasaritaantayo no kasano a ti mensahe ni Jehova ken Habakuk ti mangpabileg iti pammatitayo ita. Ngem usigentayo nga umuna ti dadduma a situasion ita a kasapulan ti nabileg a pammati iti naikari a baro a lubong nga umas-asidegen.

DAGITI SITUASION A KASAPULAN TI NABILEG A PAMMATI

4. Ania dagiti desision a kasapulan ti nabileg a pammati?

⁴ Inaldaw nga agar-aramidtayo kadagiti desision a kasapulan ti nabileg a pammati. Kas pagarigan, agdesisiontayo maipapan kadagiti pakikaduaan, paglinglingayan, edukasion, panagasawa, annak, ken trabaho. Nasayaat no isaludsodtayo iti bagitayo: ‘Ipakpakita kadi dagiti desisionko a siguradoak a temporario laeng daytoy a sistema ken asidegen a sukatan ti baro a lubong ti Dios? Wenno ipakita kadi dagiti desisionko a naimpluensiaanak kadagiti tattao nga agbibiag a kas man la ni patay ti pagpatinggaan ti amin a banag?’ (Mat. 6:19, 20; Luc. 12:16-21) Makaaramidtayo kadagiti kasayaatan a desision no pabilgentayo ti pammatitayo nga asidegen ti baro a lubong.

5-6. Apay a kasapulantayo ti nabileg a pammati iti tiempo ti rigat? Iyilustrar.

⁵ Maipasangotayo met kadagiti suot a kasapulan ti nabileg a pammati. Baka maidadanes, agsakittayo iti nakaro, wenno mapasarantayo ti dadduma pay a suot a mangupay kadatayo. Iti damo, kasla maibturantayo ti suot. Ngem no bumayag dayta—kas iti masansan a mapasamak kadagiti suot—kasapulantayo ti nabileg a pammati tapno makapagibturtayo ken maitultuloytayo ti naragsak a panagserbi ken Jehova.—Roma 12:12; 1 Ped. 1:6, 7.

⁶ No masusuottayo, mabalin a mariknatayo a saanen a pulos a dumteng ti baro a lubong ni Jehova. Kaipapananna kadi a nakapuy ti pammatitayo? Saan met ketdi. Kitaentayo daytoy nga ilustrasion. No adu nga aldawen nga agtudtudo, baka ipagaruptayo a saanen nga aginit. Ngem sigurado nga aginitto met laeng. Kasta met, no permi ti pannakaupaytayo, mabalin a mariknatayo a saanen a pulos a dumteng ti baro a lubong. Ngem no nabileg ti pammatitayo, ammotayo a matungpalto dagiti kari ti Dios. (Sal. 94:3, 14, 15; Heb. 6:17-19) Gapu iti kasta a panagtalek, maitultuloytayo nga iyun-una iti biagtayo ti panagdaydayaw ken Jehova.

7. Ania ti masapul a liklikantayo?

⁷ Usigentayo ti maysa pay a pamay-an a kasapulan ti nabileg a pammati—ti trabaho a panangasaba. Adu a kaskasabaantayo ti saan a mamati a pumayso ti “naimbag a damag” maipapan iti asidegen a baro a lubong ti Dios. (Mat. 24:14; Ezek. 33:32) Ditay pulos kayat ti agduadua a kas kadakuada. Tapno maliklikantayo dayta, masapul nga itultuloytayo a pabilgen ti pammatitayo. Usigentayo ti tallo a pamay-an a maaramidtayo dayta.

UTOBENTAYO TI SUBBOT

8-9. Kasano a mapabileg ti pammatitayo no utobentayo ti subbot?

⁸ Ti maysa a pamay-an a mapabilegtayo ti pammatitayo ket no utobentayo ti subbot. Ti subbot ket maysa a garantia a pumaysonto dagiti kari ti Dios. No panunotentayo a naimbag ti rason a naipaay ti subbot ken no kasano kadakkel ti insakripisio ni Jehova, mapabileg ti pammatitayo a sigurado a matungpal ti kari ti Dios a biag nga agnanayon iti nasaysayaat a lubong. Apay a maibagatayo dayta?

⁹ Kasano kadi kadakkel ti insakripisio ni Jehova? Manipud langit, imbaon ni Jehova ditoy daga ti dungdungnguenna nga Anak, ti kasingedan a kaduana, tapno mayanak kas perpekto a tao. Bayat nga adda ni Jesus ditoy daga, inibturanna ti amin a kita ti rigat. Kalpasanna, nagsagaba iti naut-ot nga ipapatay. Talaga a nagdakkel ti insakripisio ni Jehova! Saan a pulos nga ipalubos ti nadungngo a Diostayo nga agsagaba ken matay ti Anakna tapno laeng maipaayna kadatayo ti nasaysayaat a kasasaad ngem nakaab-ababa met a biag. (Juan 3:16; 1 Ped. 1:18, 19) Gapu ta nagdakkel ti insakripisio ni Jehova, siguraduenna a pumaysonto ti biag nga agnanayon iti baro a lubong.

PANUNOTENTAYO TI PANNAKABALIN NI JEHOVA

10. Sigun iti Efeso 3:20, ania ti kabaelan ni Jehova nga aramiden?

¹⁰ Ti maikadua a pamay-an a mapabilegtayo ti pammatitayo ket no panunotentayo ti pannakabalin ni Jehova. Adda pannakabalinna a mangtungpal iti amin a karina. Para iti adu a tattao, imposible ti kari a biag nga agnanayon iti baro a lubong. Ngem masansan nga agkari ni Jehova kadagiti saan a pulos a maaramidan dagiti tattao. Ngamin, isu ti Mannakabalin-amin a Dios. (Job 42:2; Mar. 10:27) Ekspektarentayo kadi nga ordinario laeng dagiti karina?—Basaen ti Efeso 3:20.

11. Mangted iti maysa kadagiti ekstraordinario a kari ti Dios. (Kitaen ti kahon a “Dadduma Kadagiti Ekstraordinario a Kari a Natungpalen.”)

¹¹ Usigentayo ti dadduma kadagiti kasla imposible nga inkari ni Jehova kadagiti adipenna idi un-unana. Impasiguradona kada Abraham ken Sara a maaddaanda iti anak a lalaki uray no lakay ken baketda idin. (Gen. 17:15-17) Imbagana met ken Abraham a maipatawid kadagiti kaputotanna ti daga ti Canaan. Bayat ti adu a tawen, naadipen idiay Egipto dagiti Israelita a kaputotan ni Abraham. Kasla imposible idi ngaruden a pumayso dayta a kari. Ngem pimmayso. Idi agangay, impakaammo ni Jehova iti baket idin a ni Elisabet a maaddaan iti anak. Imbagana met iti birhen a ni Maria nga isu ti mangipasngay iti mismo nga Anakna, kas inkari ni Jehova rinibu a tawenen a nasaksakbay idiay hardin ti Eden—maysa manen a karina a natungpal!—Gen. 3:15.

12. Ania ti ipasigurado kadatayo ti Josue 23:14 ken Isaias 55:10, 11 maipapan iti pannakabalin ni Jehova?

¹² Bumileg ti pammatitayo iti pannakabalin ni Jehova a mangyeg iti baro a lubong no panunotentayo ti amin a karina a natungpalen. (Basaen ti Josue 23:14; Isaias 55:10, 11.) Iti kasta, matulongantayo ti dadduma a mangamiris a ti naikari a baro a lubong ket saan nga arapaap, wenno pantasia. Imbaga a mismo ni Jehova maipapan iti baro a langit ken baro a daga: “Mapagtalkan ken pudno dagitoy a sasao.”—Apoc. 21:1, 5.

AGBALINTAYO NGA OKUPADO KADAGITI NAESPIRITUAN NGA AKTIBIDAD

13. No makigimgimongtayo, kasano a mapabileg ti pammatitayo? Ilawlawag.

¹³ Ti maikatlo a pamay-an a mapabilegtayo ti pammatitayo ket no okupadotayo kadagiti naespirituan nga aktibidad. Kas pagarigan, usigentayo no kasanotayo a magunggonaan kadagiti gimong ti kongregasion. Adun a dekada nga agserserbi ni Anna iti nadumaduma a pribilehio iti amin-tiempo a ministerio. Imbagana: “Ti pannakigimong ti mangpabpabileg iti pammatik. Uray no ti agpalawag ket saan unay a nalaing a mangisuro wenno awan ti baro a maibagana, masansan nga adda latta mangngegko a makatulong tapno nalawlawag ti pannakaawatko kadagiti kinapudno iti Biblia, ket dayta ti mangpabpabileg iti pammatik.”b Sigurado nga ap-apresiarentayo met dagiti makapabileg iti pammati a komento dagiti kakabsat.—Roma 1:11, 12; 10:17.

14. Kasano a ti ministerio mapabilegna ti pammatitayo?

¹⁴ Mapabilegtayo met ti pammatitayo no makipasettayo iti tay-ak ti ministerio. (Heb. 10:23) Nasurok a 70 a tawenen nga agserserbi ni Barbara ken Jehova. Imbagana: “Kanayon a mapabpabileg ti pammatik iti panangasaba. No ad-adu ti gundawayko a mangipakaammo maipapan kadagiti nagsayaat a kari ni Jehova, lallalo nga agtalinaed a sibibiag ken nabileg ti pammatik.”

15. Kasano a ti personal a panagadal mapabilegna ti pammatitayo? (Kitaen met dagiti ladawan.)

¹⁵ Usigentayo ti sabali pay a naespirituan nga aktibidad a mangpabileg iti pammatitayo: ti personal a panagadal. Nakita ni Susan a makatulong ti eskediulna iti personal a panagadal. Imbagana: “Kada Domingo, adalek ti artikulo a maadal para iti Panagadal iti Pagwanawanan iti sumaruno a lawas. Kada Lunes ken Martes, agsaganaak para iti gimong iti tengnga ti lawas. Iti dadduma nga aldaw, adalek met ti proyektok iti personal a panagadalko.” Gapu ta kanayon a sursuroten ni Susan ti eskediulna para iti panagadal, kanayon a mapabpabileg ti pammatina. Ni met Irene, nga adun a dekada nga agserserbi iti sangalubongan a hedkuarter, nakitana a makapabileg iti pammati ti panangadal kadagiti padto ti Biblia. Imbagana: “Bilibak unay ta matungtungpal dagiti padto ni Jehova uray kadagiti kabassitan a detalye.”c

“SIGURADO A PUMUDNONTO”

16. Apay a ti impasigurado ni Jehova ken Habakuk ket agaplikar met kadatayo ita? (Hebreo 10:36, 37)

¹⁶ Nabayagen nga ur-urayen ti dadduma nga agserserbi ken Jehova ti panungpalan daytoy a sistema ti bambanag. Iti panangmatmat ti tao, mabalin a kasla nataktak ti pannakatungpal ti kari ti Dios. Ngem ammo ni Jehova ti marikrikna dagiti adipenna. Kinapudnona, impasiguradona ken propeta Habakuk: “Matungpalto pay laeng ti sirmata iti naikeddeng a tiempo, ken agal-alisto nga agpatingga, ket saanto a mapaay. Uray no mataktak, namnamaem a matungpal! Ta sigurado a pumudnonto. Saanto a maladaw!” (Hab. 2:3) Ni laeng kadi Habakuk ti nangipasiguraduan ti Dios iti dayta? Wenno agaplikar met kadatayo ita? Impaisurat ti Dios ken apostol Pablo dagita a sasao kadagiti Kristiano a mangur-uray met iti baro a lubong. (Basaen ti Hebreo 10:36, 37.) Wen, masiguradotayo nga uray no kasla mataktak ti naikari a pannakaisalakantayo, “sigurado a pumudnonto. Saanto a maladaw!”

17. Kasano nga inyaplikar ti maysa a sister ti pammagbaga ni Jehova ken Habakuk?

¹⁷ Iyap-aplikar ti adu nga agserserbi ken Jehova daytoy a pammagbaga ni Jehova: “Namnamaem a matungpal.” Kasta ti ar-aramiden ti dadduma iti adun a dekada. Kas pagarigan, ni Louise ket nangrugi nga agserbi ken Jehova idi 1939. Kastoy ti imbagana: “Impagarupko idi nga umayen ti Armagedon sakbay nga aggraduarak iti hayskul. Ngem saan a napasamak dayta. Iti panaglabas ti adu a tawen, nakatulong kaniak ti panagbasak kadagiti inawagak iti ‘salaysay maipapan kadagidiay agur-uray’—dagiti salaysay ti Biblia maipapan kada Noe, Abraham, Jose, ken dadduma pay a nagur-uray iti nabayag sakbay a naawatda ti gunggona nga inkari ni Jehova. Ti kanayon a panangnamnama a matungpal dagiti kari ti Dios ti nakatulong kaniak ken iti dadduma pay tapno kanayon a nakasentro ti panunotmi a sigurado nga asidegen ti baro a lubong.” Umanamong iti dayta ti adu a nabayagen nga agdaydayaw ken Jehova!

18. Kasano a ti panangobserbartayo iti nakaparsuaan pabilgenna ti pammatitayo iti um-umayen a baro a lubong?

¹⁸ Agpayso, awan pay ita ti baro a lubong. Ngem panunotem ti dadduma a banag nga adda itan kas kadagiti bitbituen, kaykayo, animal, ken padam a tattao. Awan ti agduadua a talaga nga adda amin dagita, uray no adda idi tiempo nga awan dagita. Adda dagitan gapu laeng ta pinarsua ida ni Jehova. (Gen. 1:1, 26, 27) Inkari met ti Diostayo a maaddanto ti baro a lubong. Tungpalennanto dayta a karina. Idiay baro a lubong, perpektonton ti salun-at dagiti tattao ken agbiagda nga agnanayon. Iti tiempo nga inkeddeng ti Dios, agpaypaysonton ti baro a lubong no kasano nga agpaypayso ita ti kaadda ti unibersotayo.—Isa. 65:17; Apoc. 21:3, 4.

19. Kasanom a mapabileg ti pammatim?

¹⁹ Bayat nga awan pay dayta, aramidem ti amin a kabaelam tapno bumileg ti pammatim. Kanayon nga apresiarem ti subbot. Panunotem ti pannakabalin ni Jehova. Agbalinka nga okupado kadagiti naespirituan nga aktibidad. No aramidem dagita, karamankanto kadagidiay “umawat kadagiti kari babaen ti pammati ken kinaanusda.”—Heb. 6:11, 12; Roma 5:5.