Sungbatan Kadi ni Jehova Dagiti Kararagko?

1-2. Apay a posible a mapanunottayo a saan a sungsungbatan ni Jehova dagiti kararagtayo?

“AGRAGSAKKA unay ken Jehova, ket itednanto kenka dagiti tarigagay ti pusom.” (Sal. 37:4) Nagsayaat ketdin a kari! Ngem masapul kadi a namnamaentayo a sungbatan a dagus ni Jehova ti amin a kiddawtayo? Apay a maisaludsodtayo dayta? Kitaentayo dagitoy a situasion. Ikarkararag ti maysa a balasang a sister a makapageskuela koma iti School for Kingdom Evangelizers. Limmabas ti sumagmamano a tawen ngem saan pay latta a naawis. Maysa nga agtutubo a brother ti mangikarkararag ken Jehova nga umimbag ti nakaro a sakitna tapno ad-adu ti maitulongna iti kongregasion. Ngem saan nga immimbag. Ikarkararag dagiti Kristiano a nagannak nga agtalinaed iti kinapudno ti anakda. Ngem inkeddeng ti anakda ti sumardeng nga agserbi ken Jehova.

² Baka adda metten ti kiniddawmo ken Jehova, ngem saanmo pay a naawat dayta. Kas resultana, baka mapanunotmo a sungsungbatan ni Jehova ti kararag ti dadduma ngem dina sungsungbatan dagiti kararagmo. Wenno baka mapanunotmo a di la ket ta nakaaramidka iti kamali. Kasta ti narikna ti sister a ni Janice.b Kayatda nga agassawa ti agserbi iti Bethel isu nga inkararagda dayta. Imbagana: “Ti ammok ket maayabankami a dagus idiay Bethel.” Ngem limmabas ti adu a bulan ken tawen, ket saanda pay latta a naayaban. Imbaga ni Janice: “Nalidayan ken naburiboranak. Napanunotko a baka adda naaramidko a saan a nagustuan ni Jehova. Namin-adu metten nga espesipiko nga inkararagko dayta. Apay ngata a dina sinungbatan?”

3. Ania ti usigentayo iti daytoy nga artikulo?

³ Baka mapanunottayo no dadduma, ‘Talaga kadi a dengdenggen ni Jehova dagiti kararagtayo?’ Napanunot met dayta idin ti dadduma a matalek a tattao. (Job 30:20; Sal. 22:2; Hab. 1:2) Ania ti pakakombinsiram a talaga a sungbatan ni Jehova dagiti kararagmo? (Sal. 65:2) Tapno masungbatan dayta, masapul a sungbatantayo nga umuna dagitoy: (1) Ania ti manamnamatayo ken Jehova? (2) Ania ti namnamaen kadatayo ni Jehova? (3) Apay a mabalin a masapul a baliwantayo ti dadduma a kiddawtayo?

ANIA TI MANAMNAMATAYO KEN JEHOVA?

4. Sigun iti Jeremias 29:​12, ania ti ikarkari ni Jehova nga aramidenna?

⁴ Ikarkari ni Jehova a denggenna dagiti kararagtayo. (Basaen ti Jeremias 29:12.) Ay-ayaten ti Diostayo dagiti matalek nga agserserbi kenkuana, isu a dina pulos iyaleng-aleng dagiti kararagda. (Sal. 10:17; 37:28) Ngem saan a kayat a sawen dayta a patganna ti amin a kiddawtayo. Baka masapul pay laeng nga aguraytayo agingga a dumteng ti baro a lubong sakbay a maawattayo ti dadduma a kidkiddawentayo.

5. Ania ti ikabkabilangan ni Jehova no dengdenggenna dagiti kararagtayo? Ilawlawag.

⁵ Ikabkabilangan ni Jehova ti panggepna no dengdenggenna dagiti kararagtayo. (Isa. 55:​8, 9) Karaman iti dayta a panggepna ket mapno ti daga kadagiti lallaki ken babbai a siraragsak ken agkaykaysa nga agpapaituray kenkuana. Ngem parparuaren ni Satanas a naragragsak kano dagiti tattao no isuda a mismo ti mangituray iti bagida. (Gen. 3:​1-5) Tapno paneknekan ni Jehova nga ulbod ti Diablo, impalubosna nga iturayan dagiti tattao ti bagida. Nupay kasta, adu kadagiti problematayo ita ket gapu iti panangituray ti tao. (Ecl. 8:9) Ammotayo a saan pay la nga ita nga ikkaten ni Jehova ti amin a problema. No ita ngamin nga aramidenna dayta, baka panunoten ti dadduma a kaya dagiti tattao nga iturayan ti bagida ken kayada a solbaren dagiti problema ti sangatauan.

6. Apay a masapul a kombinsidotayo a kanayon a naayat ken patas ti ar-aramiden ni Jehova?

⁶ Mabalin nga agduduma ti pamay-an ni Jehova a mangsungbat kadagiti agpapada a kiddaw. Kas pagarigan, idi nagsakit iti nakaro ni Ari Ezekias, nagpakpakaasi a paimbagen ni Jehova. Kas sungbat, pinaimbag ni Jehova. (2 Ar. 20:​1-6) Iti sabali a bangir, idi nagpakpakaasi ni apostol Pablo nga ikkaten ni Jehova ti “siit ti lasag” a mapaspasaranna, a posible a maysa a sakit, saan nga inikkat ni Jehova ti problemana. (2 Cor. 12:​7-9) Usigentayo met ti napasamak kada apostol Santiago ken Pedro. Agpada a kayat ni Ari Herodes a patayen ida. Ti kongregasion inkararaganda ni Pedro ket posible nga uray met ni Santiago. Isuna laeng ta natay ni Santiago, ngem insalakan ti maysa nga anghel ni Pedro. (Ara. 12:​1-11) Mabalin a maisaludsodtayo, ‘Apay a ni Pedro laeng ti insalakan ni Jehova?’ Saan nga ibaga ti Biblia ti sungbat.c Ngem masiguradotayo a “nalinteg ti amin nga aramid [ni Jehova].” (Deut. 32:4) Ken ammotayo nga agpada nga ay-ayaten ni Jehova da Pedro ken Santiago. (Apoc. 21:14) No dadduma, mabalin a saan a sungbatan ni Jehova dagiti kararagtayo iti pamay-an a namnamaentayo. Ngem gapu ta agtalektayo a kanayon a naayat ken patas ti panangsungbat ni Jehova kadagiti kararagtayo, saantayo a kuestionaran ti pilienna a pamay-an a mangsungbat kadagita.—Job 33:13.

7. Ania ti ikagkagumaantayo a liklikan, ken apay?

⁷ Ikagumaantayo a liklikan nga ikompara ti situasiontayo iti situasion ti sabsabali. Kas pagarigan, mabalin nga adda espesipiko a dawdawatentayo ken Jehova ngem saanna a pinatgan dayta. Idi kuan, naammuantayo nga adda maysa a mangikarkararag iti isu met laeng a kiddaw, ket kasla pinatgan ni Jehova dayta. Kasta ti napadasan ti sister a ni Anna. Inkararagna a malasatan koma ni lakayna a ni Matthew ti kanserna. Tatta, adda met dua a babbaket a sister nga addaan met laeng iti kanser. Sipapasnek nga inkararagan ni Anna ni Matthew ken ti dua a sister. Immimbag ti dua a sister ngem natay ni Matthew. Idi damo, napanunotna a tinulongan ni Jehova dagiti sister isu nga immimbagda. Ket no kasta, apay a saan a nasungbatan ti kararagna nga umimbag ni lakayna? Siempre, ditay ammo no kasano nga immimbag ti dua a sister. Ngem ammotayo nga adda permanente a solusion ni Jehova iti amin a panagsagsagabatayo, ken kailiwna a pagungaren dagiti natayen a gagayyemna.​—Job 14:15.

8. (a) Sigun iti Isaias 43:​2, kasanonatayo a tultulongan ni Jehova? (b) Kasano a makatulong ti kararag no maipasangotayo kadagiti narigat a pannubok? (Kitaen ti video a Matulongannatayo ti Kararag nga Agibtur.)

⁸ Kanayon a tulongannatayo ni Jehova. Kas ti naayat nga Amatayo, saan a kayat ni Jehova a makitkitanatayo a marigrigatan. (Isa. 63:9) Ngem saannatayo nga iliklik iti amin a pakasuotantayo, a nayarig kadagiti karayan wenno apuy. (Basaen ti Isaias 43:2.) Nupay kasta, ikarkarina a tulongannatayo tapno ‘malasatantayo’ dagita. Ken aniaman a pakasuotan ti pakaipaspasanguantayo ita, kanayon a siguraduenna nga agtalinaed a natibker ti relasiontayo kenkuana. Ipaay met ni Jehova ti nabileg a nasantuan nga espirituna tapno makapagibturtayo. (Luc. 11:13; Fil. 4:13) Kas resultana, makapagtalektayo a kanayon a maawattayo ti eksakto a kasapulantayo tapno makapagibtur ken makapagtalinaedtayo a matalek kenkuana.d

ANIA TI NAMNAMAEN KADATAYO NI JEHOVA?

9. Maitunos iti Santiago 1:​6, 7, apay a masapul nga agtalektayo a tulongannatayo ni Jehova?

⁹ Namnamaen ni Jehova nga agtalektayo kenkuana. (Heb. 11:6) No dadduma, kasla nagrigat a malasatan dagiti pakarigatantayo. Mabalin pay ketdi a mangrugitayon nga agduadua no tulongannatayo met laeng ni Jehova. Ngem ipaspasigurado ti Biblia nga iti tulong ti pannakabalin ti Dios, ‘malagtotayo ti pader.’ (Sal. 18:29) Isu nga imbes nga agduaduatayo, agkararagtayo ketdi nga addaan iti nabileg a pammati nga agtalektayo a sungbatan ni Jehova dagiti kararagtayo.​—Basaen ti Santiago 1:​6, 7.

10. Iyilustrar no kasanotayo a makapagtignay maitunos kadagiti kararagtayo.

¹⁰ Namnamaen ni Jehova nga agtignaytayo maitunos kadagiti kararagtayo. Kas pagarigan, mabalin nga ikararag ti maysa a brother ken Jehova a tulonganna a makapagbakasion iti sekular a trabahona tapno makaatender iti rehional a kombension. Ania ti mabalin a sungbat ni Jehova iti dayta a kararag? Mabalin a paturedenna ti brother tapno makapagpakada iti boss-na. Ngem kasapulan latta ti brother ti umasideg iti boss-na tapno agpakada. Baka masapul pay ketdi a maulit-ulit nga aramidenna dayta. Mabalin pay ketdi a kiddawenna a makisinnukat lattan iti oras ti trabaho iti sabali nga empleado. Ken no kasapulan, mabalin pay ketdi nga ibagana nga awan lattan ti bayad ti day off-na.

11. Apay a masapul nga ulit-ulitentayo nga ikararag dagiti pakaseknantayo?

¹¹ Namnamaen ni Jehova a maulit-ulit nga ikararagtayo kenkuana dagiti pakaseknantayo. (1 Tes. 5:17) Ipakita ti imbaga ni Jesus a dadduma kadagiti kiddawtayo ket saan a dagus a mapatgan. (Luc. 11:9) Isu a ditay sumuksuko! Agkararagtayo a sipapasnek ken maulit-ulit. (Luc. 18:​1-7) No itultuloytayo nga ikararag ken Jehova ti maysa a banag, ipakpakitatayo a seriosotayo iti ikarkararagtayo. Ipakpakitatayo met a mamatitayo a kabaelannatayo a tulongan.

APAY A MABALIN A MASAPUL A BALIWANTAYO TI DADDUMA A KIDDAWTAYO?

12. (a) Ania ti masapul nga isaludsodtayo iti bagitayo maipapan kadagiti kiddawtayo, ken apay? (b) Kasanotayo a masigurado nga ipakita dagiti kararagtayo a resrespetuentayo ni Jehova? (Kitaen ti kahon a “Dagiti Kadi Kiddawko Ipakitana a Raraemek ni Jehova?”)

¹² No saan a masungbatan ti ikarkararagtayo, mabalin nga isaludsodtayo iti bagitayo ti tallo a saludsod. Ti umuna ket, ‘Umiso kadi ti ikarkararagko?’ Kaaduanna a pampanunotentayo nga ammotayo ti kasayaatan para kadatayo. Ngem dagiti banag a kidkiddawentayo ket mabalin a saan met gayam a ti kasayaatan para kadatayo. No ikarkararagtayo ti maysa a problema, mabalin nga adda nasaysayaat a solusion ngem iti kidkiddawentayo. Ken dadduma nga ikarkararagtayo ket mabalin a saan a maitunos iti pagayatan ni Jehova. (1 Juan 5:14) Kas pagarigan, usigentayo ti kiddaw dagiti nagannak a nadakamat itay. Ikarkararagda ken Jehova nga agtalinaed koma ti anakda iti kinapudno. Umiso dayta a kiddaw. Ngem saan a piliten ni Jehova ti asinoman nga agserbi kenkuana. Kayatna nga amintayo, karaman dagiti annaktayo, ket pilientayo ti agdaydayaw kenkuana. (Deut. 10:​12, 13; 30:​19, 20) Isu a ti ikararag koma dagiti nagannak ken Jehova ket tulonganna ida a mangdanon iti puso ti anakda tapno matignay a mangayat ken Jehova ken agbalin a gayyemna.—Prov. 22:6; Efe. 6:4.

13. Sigun iti Hebreo 4:​16, kaano a tulongannatayo ni Jehova? Ilawlawag.

¹³ Ti maikadua a saludsod ket, ‘Tiempo kadin tapno patgan ni Jehova ti kiddawko?’ Mabalin a mariknatayo a masapul a masungbatan a dagus dagiti kararagtayo. Ngem kinaagpaysuanna, ammo ni Jehova ti kasayaatan a tiempo a tumulong. (Basaen ti Hebreo 4:16.) No saantayo a maawat a dagus ti kidkiddawentayo, mabalin a mapanunottayo a ti sungbat ni Jehova ket ‘Saan.’ Ngem baka ti talaga a sungbatna ket ‘Saan pay nga ita.’ Kas pagarigan, subliantayo ti agtutubo a brother a nangikararag a maagasan koma ti sakitna. No simimilagro a pinaimbag ni Jehova, baka irason ni Satanas nga agtultuloy laeng nga agserserbi ti brother ken Jehova gapu ta immimbag. (Job 1:​9-11; 2:4) Kasta met, addan ti tiempo nga inkeddeng ni Jehova tapno paimbagenna ti amin a sakit. (Isa. 33:24; Apoc. 21:​3, 4) Bayat a saan pay a dimteng dayta, saantayo a namnamaen a simimilagro nga umimbag dagiti sakittayo. Isu a mabalin a kiddawen ti brother ken Jehova a pabilgenna ken ikkanna iti talna ti panunot tapno maibturanna ti sakitna ken maitultuloyna ti simamatalek a panagserbi iti Dios.​—Sal. 29:11.

14. Ania ti masursurom iti kapadasan ni Janice?

¹⁴ Lagipentayo ti kapadasan ni Janice, a nangikararag a makapagserbi koma iti Bethel. Lima a tawen ti limmabas sakbay a naawatanna no kasano a sinungbatan ni Jehova ti kararagna. Imbagana: “Inusar ni Jehova dayta a tiempo tapno isuronak iti adu a banag ken tapno tulongannak nga agbalin a nasaysayaat a Kristiano. Masapul a dumakkel pay ti panagtalekko kenkuana. Masapul a parang-ayek ti personal a panagadalko. Ken masapul a sursuruek ti agbalin a naragsak, aniaman ti situasion.” Idi kuan, naawis ni Janice ken ni lakayna nga agserbi iti sirkito. No subliananna ti napalabas, imbaga ni Janice: “Sinungbatan ni Jehova dagiti kararagko, ngem iti pamay-an a diak ninamnama. Nabayag met bassit sakbay a nakitak a nagpintas ti sungbat ni Jehova iti kararagko. Agyamyamanak ta nariknak ti ayat ken kinaimbagna.”

15. Apay a no dadduma, nasaysayaat a saan unay nga espesipiko dagiti kararagtayo? (Kitaen met dagiti ladawan.)

¹⁵ Ti maikatlo a saludsod ket,‘Espesipiko kadi unay ti ikarkararagko?’ Nasayaat no espesipikotayo kadagiti ikarkararagtayo. Ngem no dadduma, mabalin a nasaysayaat no saan unay nga espesipiko dagiti kararagtayo tapno maammuantayo no ania ti kayat ni Jehova para kadatayo. Usigentayo ti kapadasan ti balasang a sister a mangikarkararag a makapageskuela koma iti School for Kingdom Evangelizers. Kayatna ti ageskuela tapno makapagserbi iti lugar a dakdakkel ti panagkasapulanna. Isu a bayat nga ikarkararagna a maawis koma nga ageskuela, mabalinna a kiddawen ken Jehova a tulonganna a mangkita kadagiti gundaway tapno mapalawana ti ministeriona. (Ara. 16:​9, 10) Kalpasanna, agtignay maitunos iti kararagna babaen ti panangdamagna iti manangaywan iti sirkito no adda asideg a kongregasion nga agkasapulan iti ad-adu pay a payunir. Wenno mabalinna ti agsurat iti sanga nga opisina tapno agdamag no sadino ti agkasapulan iti ad-adu pay nga agibumbunannag iti Pagarian.e

16. Ania koma ti pakakombinsirantayo?

¹⁶ Kas naadaltayo, kombinsidotayo a sungbatan ni Jehova dagiti kararagtayo iti naayat ken patas a pamay-an. (Sal. 4:3; Isa. 30:18) No dadduma, saan a masungbatan dagiti kararagtayo iti pamay-an a namnamaentayo. Ngem saan a pulos nga iyaleng-aleng ni Jehova dagiti kararagtayo. Ay-ayatennatayo unay. Ken saannatayo a pulos a baybay-an. (Sal. 9:10) Isu a ‘kanayon nga agtalektayo kenkuana,’ nga ibukboktayo kenkuana ti linaon ti pusotayo iti kararag.—Sal. 62:8.