Dagiti Pamay-an Tapno Mapalawam ti Ministeriom

IDI panawenen nga ibaon ni Jesus dagiti adalanna a mangikasaba iti Pagarian, kinunana kadakuada: “Adu ti anien ngem bassit ti agani.” Adu ti masapul nga aramiden, isu nga innayonna: “Ipakaasiyo ngarud iti Apo ti panagani a mangibaon kadagiti agani iti talonna.” (Mat. 9:37, 38) Imbaga ni Jesus kadagiti adalanna no kasano nga itungpalda ti ministerioda. Ipakita dagiti sasaona a naganat dayta. Kinunana: “Diyonto pay maileppas a kasabaan dagiti tattao kadagiti siudad ken ili ti Israel, dumtengton ti Anak ti tao.”​—Mat. 10:23.

² Adu met ita ti masapul nga aramiden iti ministerio. Dandanin ti panungpalan, isu a masapul a maikasaba ti naimbag a damag maipapan iti Pagarian! (Mar. 13:10) Yantangay ti intero a lubong ti teritoriatayo, nalawlawa ita ti pangasabaantayo ngem ti nangasabaan ni Jesus ken dagiti adalanna. Bassit met ti bilangtayo no idilig iti binilion a populasion ti lubong, ngem masiguradotayo ti tulong ni Jehova. Maikasaba ti naimbag a damag ti Pagarian iti intero a daga ken dumteng ti panungpalan iti eksakto a tiempo nga inkeddeng ni Jehova. Ipangpangrunatayo kadi ti Pagarian ti Dios tapno naan-anay a maitungpaltayo ti ministeriotayo? Ania dagiti ragragpatentayo a teokratiko a kalat tapno naan-anay a maitungpaltayo ti ministeriotayo?

³ Tapno ipakitana no ania ti kalikaguman ni Jehova kadagiti dedikado nga adipenna, kinuna ni Jesus: “Masapul nga ayatem ni Jehova a Diosmo iti amin a pusom ken amin a kararuam ken amin a panunotmo ken amin a pigsam.” (Mar. 12:30) Masapul nga agserbitayo iti Dios iti amin a kararua. Maipakita ti tunggal maysa kadatayo ti kauneg ti panagayattayo ken kapasnek ti dedikasiontayo ken Jehova no aramidentayo ti amin a kabaelantayo nga agserbi kenkuana. (2 Tim. 2:15) Adu nga oportunidad ti silulukat kadatayo, sigun iti kasasaad ken kabaelan ti tunggal maysa. Usigem ti sumagmamano kadagitoy ket ikeddengmo no ania dagiti teokratiko a kalat a ragpatem tapno maitungpalmo ti ministeriom.

PANAGSERBI KAS AGIBUMBUNANNAG ITI KONGREGASION

⁴ Amin nga umawat iti kinapudno ket adda pribilehiona a mangipakaammo iti naimbag a damag. Daytoy ti kangrunaan a trabaho nga impaaramid ni Jesus kadagiti adalanna. (Mat. 24:14; 28:19, 20) Ti adalan ni Jesu-Kristo ket gagangay nga ipakaammona iti sabsabali ti naimbag a damag apaman a maammuanna dayta. Kasta ti inaramid da Andres, Felipe, Cornelio, ken dadduma pay. (Juan 1:40, 41, 43-45; Ara. 10:1, 2, 24; 16:14, 15, 25-34) Kaipapanan kadi daytoy a mabalinen nga ipakaammo ti maysa a tao ti naimbag a damag sakbay pay a mabautisaran? Wen! No kualipikadon ti maysa kas di bautisado nga agibumbunannag iti kongregasion, mabalinnan ti makiraman a mangasaba iti binalaybalay. Kasta met, sigun iti abilidad ken kasasaadna, mabalinna ti makiraman iti dadduma pay a paset ti ministerio.

⁵ No nabautisaranen ti maysa nga agibumbunannag, kayatna la ketdi nga aramiden ti amin a kabaelanna a tumulong iti sabsabali a mangammo iti naimbag a damag. Adda pribilehio dagiti lallaki ken babbai a makiraman iti trabaho a panangasaba. Maysa a pribilehio ti maaddaan iti uray bassit laeng a paset iti panagrang-ay ti interes ti Pagarian ti Dios. Talaga a naragsak ti asinoman a mangpalawa iti ministeriona tapno maragpatna dagiti kanayonan a pribilehio iti panagserbi.

PANAGSERBI ITI LUGAR NGA ADDAAN DAKDAKKEL A PANAGKASAPULAN

⁶ Mabalin a masansan a mawanas ti teritoria ti kongregasionyo, isu a kanayon a makasabaan dagiti tattao. Tapno mapalawam ti ministeriom, mabalin a kayatmo ti umakar iti lugar nga addaan dakdakkel a panagkasapulan. (Ara. 16:9) No agserserbika kas maysa a panglakayen wenno ministerial nga adipen, mabalin nga adda kongregasion a makasapul iti tulongmo. Nalabit adda singasing ti manangaywan iti sirkito no kasanom a matulongan ti sabali a kongregasion iti sirkitoyo. No kayatmo ti agserbi iti sabali a lugar iti pagiliam, makaipaay ti sanga nga opisina iti makatulong nga impormasion.

⁷ Kayatmo kadi ti agserbi iti sabali a pagilian? No wen, nasken a panunotem a naimbag dayta. Apay a dimo pakisaritaan dayta kadagiti panglakayen iti kongregasionyo? Sigurado nga adda epekto kenka ti iyaakarmo ken ti asinoman a kaduam. (Luc. 14:28) Ngem no awan ti planom nga agbayag sadiay, nasaysayaat no agserbika laengen iti lugar nga agkasapulan iti pagiliam.

⁸ Iti dadduma a pagilian, dagiti kakabsat nga agserserbi kas manangaywan ket nabiitda pay iti kinapudno. Sipapalubos dagiti napakumbaba a kakabsat iti dayta a lugar a dagiti immakar nga aduan kapadasan a panglakayen ti mangidaulo iti kongregasion. No maysaka a panglakayen ken planom ti umakar iti kasta a pagilian, laglagipem koma a ti ipapanmo ket saan a tapno sukatam dagiti panglakayen sadiay no di ket, tapno agserbi a kaduada. Paregtaem ida a mangragpat ken mangawat kadagiti responsabilidad iti kongregasion. (1 Tim. 3:1) Agan-anuska no adda dagiti bambanag a saan a maar-aramid a kas iti maar-aramid iti pagiliam. Usarem ti kapadasam kas panglakayen a tumulong kadagiti kakabsat. Inton agangay, no kasapulan nga agawidkan iti pagiliam, kabaelanen dagiti panglakayen iti dayta a lugar nga aywanan ti kongregasion.

⁹ Sakbay nga ited kenka ti sanga nga opisina ti nagan dagiti kongregasion a mabalinmo a tulongan, masapul a mangted iti surat ti rekomendasion ti Komite ti Serbisio ti Kongregasion a nakaitimpuyogam. Kasapulan daytoy a surat uray no agserserbika kas panglakayen, ministerial nga adipen, payunir, wenno agibumbunannag. Ti surat ti rekomendasion ket ipatulod ti komite ti serbisio agraman ti saludsodmo iti sanga nga opisina maipapan iti pagilian a kayatmo a pagserbian.

PANANGASABA ITI SABALI A LENGGUAHE

¹⁰ Tapno mapalawam ti ministeriom, mabalin a kayatmo ti agsursuro iti sabali a lengguahe, agraman ti sign language. No kalatmo ti agsursuro a mangasaba iti sabali a lengguahe, apay a dika makisarita kadagiti panglakayen ken iti manangaywan iti sirkito? Mabalin a makaipaayda kadagiti singasing ken pammaregta. Babaen ti panangiwanwan ti sanga nga opisina, nangorganisar ti dadduma a sirkito kadagiti klase a panagadal iti sabali a lengguahe tapno masanay dagiti makabael nga agibumbunannag ken payunir a mangasaba iti sabali a lengguahe.

PANAGSERBI KAS PAYUNIR

¹¹ Masapul nga ammo ti amin nga agibumbunannag ti kualipikasion dagiti agserbi kas auxiliary, regular, ken special pioneer ken ti dadduma pay nga amin-tiempo a panagserbi. Ti payunir ket masapul a mapagulidanan ken bautisado a Kristiano nga ipalubos ti kasasaadna a mangbusbos iti espesipiko nga oras a mangikasaba iti naimbag a damag. Ti Komite ti Serbisio ti Kongregasion ti mangaprobar iti aplikasion dagiti auxiliary ken regular pioneer, idinto ta ti sanga nga opisina ti mangdutok kadagiti special pioneer.

¹² Mabalin a maaprobaran dagiti auxiliary pioneer nga agserbi iti maysa a bulan, iti agsasaruno a bulan, wenno agtultuloy, sigun iti kasasaadda. Adu nga agibumbunannag iti Pagarian ti maragragsakan nga agserbi kas auxiliary pioneer kadagiti naisangsangayan a gundaway, kas iti panawen ti Memorial wenno ibibisita ti manangaywan iti sirkito. Agpayunir ti dadduma kadagiti bulan ti bakasion. Mabalin a kayat dagiti ages-eskuela a bautisado nga agibumbunannag ti ag-auxiliary pioneer kadagiti panawen ti bakasion. Mabalin a kayat dagiti agibumbunannag ti ag-auxiliary pioneer a ragpatenda ti nakissayan nga oras a makalikaguman tunggal Marso ken Abril ken bayat ti ibibisita ti manangaywan iti sirkito. Aniaman ti kasasaadmo, no nadalus ti moral a takdermo ken nasayaat ti kababalinmo, kabaelam a ragpaten ti oras a makalikaguman, ken makapag-auxiliary pioneer-ka iti maysa wenno ad-adu pay a bulan, maragsakan dagiti panglakayen a mangikabilangan iti aplikasionmo iti daytoy a pribilehio.

¹³ Tapno agbalinka a kualipikado kas regular pioneer, masapul a kabaelam a ragpaten ti tinawen a makalikaguman nga oras. Kas regular pioneer, kayatmo la ketdi ti makitinnulong iti kongregasionmo. Dagiti naregta a payunir ket bendision iti kongregasion, a mangparayray iti tarigagay a makiraman iti ministerio ken mangparegta pay ketdi iti dadduma nga agpayunir. Ngem sakbay nga agaplikarka kas regular pioneer, masapul a mapagulidananka nga agibumbunannag ken nabautisarankan iti napalabas nga innem a bulan.

¹⁴ Gagangay a mapili dagiti special pioneer manipud kadagiti regular pioneer a napaneknekan nga epektibo iti ministerio. Masapul a kabaelanda ti agserbi iti sadinoman a pangibaonan kadakuada ti sanga nga opisina. Masansan a maibaonda iti naiputputong a lugar, a pakasarakanda kadagiti interesado ken mangbuangayda kadagiti baro a kongregasion. No dadduma, maibaon dagiti special pioneer kadagiti kongregasion nga agkasapulan iti tulong tapno mawanas ti teritoriada. Dadduma kadagiti special pioneer nga agserserbi kas panglakayen ket maibaon a tumulong kadagiti babassit a kongregasion, uray no saan a kasapulan ti ad-adu a manangaskasaba. Adda maawat dagiti special pioneer a kalkalainganna nga allowance para kadagiti masapsapulda. Adda met dagiti madutokan kas temporario nga special pioneer.

DAGITI MISIONERO

¹⁵ Ti Service Committee ti Bagi a Manarawidwid ti mangdutok kadagiti misionero sa ibaon ida ti Komite ti Sangay nga agserbi kadagiti lugar a dakkel ti populasionna. Adu ti maaramidanda tapno nasayaat ti pannakaorganisar ti trabaho a panangasaba ken dagiti aktibidad ti kongregasion. Masansan a masanay dagiti misionero iti School for Kingdom Evangelizers. Maipaayanda iti pagyanan ken makaawatda iti kalkalainganna nga allowance para kadagiti masapsapulda.

PANAGSERBI ITI SIRKITO

¹⁶ Ti Bagi a Manarawidwid ti mangdutok kadagiti manangaywan iti sirkito. Ngem sakbay a madutokanda, masanayda nga umuna ken agserbida kas suno a manangaywan iti sirkito. Ipatpateg dagitoy a lallaki ti ministerio ken dagiti kakabsatda. Naregtada a payunir, napasnekda nga estudiante iti Biblia, ken nalaing a pumapalawag ken mannursuro. Ipakpakitada ti bunga ti espiritu, balanse, nainkalintegan, ken mannakaawatda. No addan asawa ti maysa a kabsat, ti asawana a payunir ket mapagulidanan ti kababalin ken pannakilangenna. Epektibo a mangasaba. Kas Kristiano nga asawa a babai, ammona a rumbeng nga agpasakup iti asawana, saan nga agbalin a pannakangiwat ni lakayna wenno isu ti ad-adda nga agsasao. Gapu ta adu ti nakaeskediul nga aramiden dagiti manangaywan iti sirkito ken dagiti assawada, masapul a nasalun-at dagidiay mangragpat iti daytoy a pribilehio. Saan a mabalin nga agaplay dagiti payunir tapno agbalin a manangaywan iti sirkito. Imbes ketdi, ibagada iti manangaywan iti sirkito a kayatda ti agserbi iti kasta a pribilehio. Kalpasanna, mangted met ti manangaywan iti sirkito kadagiti makatulong a singasing.

DAGITI TEOKRATIKO NGA ESKUELAAN

¹⁷ School for Kingdom Evangelizers: Adda dagiti panagkasapulan iti ad-adu pay nga ebanghelisador iti Pagarian tapno mawanas dagiti teritoria a manmano a makasabaan ken matulongan dagiti kongregasion a bumileg iti naespirituan. Gapuna, mabalin nga agaplay dagiti awanan asawa a kakabsat a lallaki ken babbai, ken dagiti agassawa tapno umawatda iti espesial a pannakasanay iti School for Kingdom Evangelizers. Apaman a nagturposdan, maibaonda nga agserbi kas regular pioneer iti lugar a dakdakkel ti pakasapulan iti pagilianda. Ngem dagiti sidadaan nga agserbi ket mabalin a maikkanda iti pribilehio iti pagilianda wenno maibaonda iti sabali a pagilian. Adda ti sumagmamano a maibaon kas temporario wenno permanente nga special pioneer. Dagiti payunir a mayat nga ageskuela, maammuanda dagiti kualipikasion no tumabunoda iti miting a maaramid iti rehional a kombension.

¹⁸ Watchtower Bible School of Gilead: Dagiti awanan asawa a kakabsat a lallaki, babbai, ken agassawa a mapili nga ageskuela ket ammoda ti agsao iti Ingles ken agserserbi iti espesial nga amin-tiempo. Kabaelanda a pasayaaten ken pabilgen ti pannakaorganisar ti trabaho a panangasaba ken ti sangay. Maragragsakanda nga agserbi kadagiti kakabsatda ken naayatda a tumulong iti sabsabali nga agsursuro ken mangyaplikar iti panangiwanwan ti Biblia ken ti organisasion ti Dios. Ti Komite ti Sangay iti dayta a pagilian ti mangpili kadagiti agadal a mangipasa iti aplikasion. Dagiti nagturpos iti eskuelaan ket maibaonda nga agserbi iti tay-ak wenno iti sanga nga opisina iti sabali a pagilian wenno iti mismo a pagilianda.

PANAGSERBI ITI BETHEL

¹⁹ Naisangsangayan a pribilehio ti agserbi iti Bethel. Ti sao a Bethel kaipapananna ti “Balay ti Dios,” ken maitutop dayta a pangawag iti daytoy a sentro ti teokratiko nga aktibidad. Napateg ti trabaho dagiti kakabsat nga agserserbi iti Bethel gapu ta mainaig amin dagita iti panagaramid, panagipatarus, ken panagiwaras iti literatura a naibatay iti Biblia. Ti panagserbida ket nakapatpateg iti Bagi a Manarawidwid a mangidadaulo ken mangiwanwanwan kadagiti kongregasion iti intero a daga. Adu a Bethelite nga agserserbi kas agipatpatarus ti aggigian ken agtrabtrabaho iti lugar a sakup ti sangay a pakaus-usaran ti lengguahe nga ipatpatarusda. Makatulong daytoy kadakuada tapno inaldaw a mangngegda ti lengguaheda. Maammuanda met no maawatan met laeng dagiti tattao ti sasao nga inusarda iti publikasion nga impatarusda.

²⁰ Kaaduanna a nadagsen ti trabaho iti Bethel. Gapuna, dagidiay maayaban nga agserbi ket dedikado ken bautisado a kakabsat a lallaki, agtutubo, nasalun-at, ken napigsa. No adda panagkasapulan iti sangay a mangiwanwanwan iti pagilian nga ayanmo ken kayatmo ti agserbi iti Bethel, maammuam dagiti kualipikasion manipud kadagiti panglakayen iti kongregasionmo.

TRABAHO A PANAGIBANGON

²¹ Kas iti trabaho a panagibangon iti templo ni Solomon, maibilang a sagrado a panagserbi ti panagibangon kadagiti pasilidad ti organisasion. (1 Ar. 8:13-18) Talaga a nakaregregta ti adu a kakabsat ta us-usarenda ti tiempo ken sanikuada a tumulong iti daytoy a trabaho.

²² Kabaelam kadi ti tumulong? No maysaka a bautisado nga agibumbunannag ken situtulokka a tumulong iti kasta a trabaho, apresiaren unay dayta dagiti kakabsat a lallaki a mangiwanwanwan iti trabaho a panagibangon iti lugaryo. Sidadaanda met a mangsanay kenka uray bassit pay ti kapadasam. Apay a dimo ibaga kadagiti panglakayen iti kongregasionyo a kayatmo ti tumulong? Dadduma a kualipikado ken bautisado nga agibumbunannag ket nagboluntario payen iti trabaho a panagibangon kadagiti pasilidad ti organisasion iti sabali a pagilian.

²³ Adu dagiti gundawaymo a makiraman iti trabaho a panagibangon. Dagiti nasayaat ti espiritualidadna a bautisado nga agibumbunannag nga addaan iti paglaingan ken kabaelanna ti tumulong iti maibangbangon a proyekto nga asideg iti lugarda ket mabalin nga agserbi kas Local Design/Construction volunteer. Kabaelan met ti dadduma ti tumulong iti proyekto iti adayo a lugar iti sumagmamano a tiempo ket dutokan ida ti sanga nga opisina nga agserbi kas construction volunteer iti dua a lawas wenno agingga iti tallo a bulan. Construction servant ti awag kadagiti madutokan nga agserbi iti nabaybayag a tiempo. Expatriate construction servant met ti awag kadagiti construction servant nga agserbi iti sabali a pagilian. Ti Construction Group a buklen dagiti construction servant ken construction volunteer ti mangidaulo iti tunggal proyekto a maibangon. Tulongan ida dagiti Local Design/Construction volunteer ken dagiti boluntario manipud kadagiti lokal a kongregasion. No malpasen ti maysa a proyekto, umalis ti Construction Group iti sabali manen a proyekto nga adda iti sakup ti teritoria ti sangay.

ANIA DAGITI NAESPIRITUAN A KALATMO?

²⁴ No indedikarmon ti biagmo ken Jehova, sigurado a kayatmo ti agserbi kenkuana iti agnanayon. Ngem ania dagiti naespirituan a kalatmo bayat nga agserserbika? Makatulong kenka dagiti naespirituan a kalat tapno mausarmo a naimbag ti pigsam ken sanikuam. (1 Cor. 9:26) Makatulong kenka dagita a kalat tapno rumang-ayka iti naespirituan ken maipamaysam dagiti napatpateg a banag bayat a ragragpatem dagiti kanayonan a pribilehio iti panagserbi.​—Fil. 1:10; 1 Tim. 4:15, 16.

²⁵ Nangipakita ni apostol Pablo iti nasayaat nga ulidan a tuladentayo iti panagserbitayo iti Dios. (1 Cor. 11:1) Inaramid ni Pablo ti amin a kabaelanna nga agserbi ken Jehova. Nabigbigna nga impaayan ni Jehova iti adu a pribilehio iti panagserbi. Insurat ni Pablo kadagiti kakabsat idiay Corinto: “Naluktan kaniak ti dakkel a ruangan a mangaramid iti ad-adu pay.” Pudno met kadi dayta kadatayo? Wen, adu ti gundawaytayo nga agserbi ken Jehova a kadua ti kongregasion, nangruna iti panangikasaba iti naimbag a damag maipapan iti Pagarian. Ngem kas ken Pablo, ti iseserrek iti dayta a “dakkel a ruangan” ramanenna ti panangsaranget iti ‘adu a bumusbusor.’ (1 Cor. 16:9) Situtulok ni Pablo a mangdisiplina iti bagina. Paliiwem ti kinunana: “Dandanogek ti bagik ken ad-adipenek.” (1 Cor. 9:24-27) Kasta met laeng kadi ti panangmatmattayo?

²⁶ Maparegta ti tunggal maysa a mangragpat kadagiti teokratiko a kalat sigun iti kasasaadna. Adu ita ti agserserbi iti amin-tiempo gapu ta pinagbalinda dayta a kalat idi ubingda pay. Iparparegtan dayta dagiti nagannakda ken ti dadduma a kakabsat uray no ubingda pay. Gapuna, tagtagiragsakenda ti nakasaysayaat a karera iti panagserbi ken Jehova nga awan a pulos ti pagbabawyanda. (Prov. 10:22) Ti dadduma pay a napateg a kalat ket ti linawas a pannakiraman iti ministerio, panangirugi ken panangikondukta iti panagadal iti Biblia, wenno ad-adu a panawen nga agsagana kadagiti gimong. Ti napateg ket agtalinaedtayo a natibker ken naan-anay nga itungpaltayo ti ministeriotayo. No aramidentayo dayta, maidaydayawtayo ni Jehova ken maragpattayo ti kangrunaan a kalattayo, ti agserbi kenkuana iti agnanayon.​—Luc. 13:24; 1 Tim. 4:7b, 8.