SIDDIM, NABABA A TANAP TI

Maysa a ginget nga innaig ti Kasuratan iti Asin (Natay) a Baybay. (Ge 14:3) Idi kaaldawan ni Abraham, sadiay a nakigubat ti rebelioso nga ar-ari ti Sodoma, Gomorra, Adma, Zeboiim, ken Zoar maibusor ken Ari Kedorlaomer ti Elam ken iti tallo a kaaliansana. Gapu ta naabak ti ar-ari ti Sodoma ken Gomorra, nagtalawda ngem natnag ti sumagmamano kadagiti buyotda iti ‘adu nga abut ti bitumen’ iti dayta a disso.​—Ge 14:4, 8-10.

Patien ti dadduma a ti Nababa a Tanap ti Siddim ket isu ti kasla luek a paset ti Natay a Baybay iti abagatan ti Peninsula ti Lisan. Patienda a daytoy ket nadam-eg a ginget idi damo ngem nalawag a limned idi agangay, nalabit gapu iti ginggined wenno gapu iti panagbalbaliw ti langa ti daga a resulta ti panangdadael ti Dios iti Sodoma, Gomorra, ken iti intero a Distrito. (Ge 19:24, 25) Iti daytoy a lugar, pasaray adda pay laeng bambanag a bitumen a tumpaw iti ababaw a dandanum.​—Kitaenyo ti ASIN A BAYBAY.