EDER

1. Kaputotan ni Berias a kameng ti tribu ni Benjamin; nagnaed idiay Jerusalem.​—1Cr 8:1, 15, 16, 28.

2. Kaputotan ni Musi a kameng ti Levita a pamilia ni Merari; naituding iti maysa a panagserbi idi tiempo ni David.​—1Cr 23:21, 23-25; 24:30.

3. Maysa a siudad iti makin-abagatan a paset ti Juda. (Jos 15:21) Yantangay dagiti Hebreo a konsonante iti nagan nga “Eder” ket kapadpada dagiti konsonante iti “Arad” no mapagsinnukat dagiti dua a konsonantena, ken yantangay iti Septuagint (Vatican Manuscript No. 1209) nailanad ti “Ara” imbes nga “Eder” iti daytoy a teksto, kaaduan nga eskolar kunaenda a ti Eder isu met laeng ti Arad (Tel ʽArad), agarup 28 km (17 mi) iti daya ti Beer-seba.

4. [Pangen]. Maysa a torre nga asideg iti nagtoldaan ni Jacob (Israel) kalpasan ti ipapatay ni Raquel. Nupay saan nga ammo ti eksakto nga ayanna, nalawag nga adda idi dayta iti maysa a disso iti nagbaetan ti Betlehem ken Hebron. Ti nagan nga Eder ipasimudaagna a nagpaay ti torre kas salinong dagiti pastor ken nagserbi kas pagwanawanan a nangsiputanda kadagiti arbanda. (Ge 35:19, 21, 27) Bayat ti panagtolda sadiay ni Jacob, ‘tinabbaawan ni Ruben ti idda ni Jacob’ idi nakidenna ken Bilha a kamalala ni amana.​—Ge 35:22; 49:3, 4.

Ti Hebreo a sasao a naipatarus ditoy a “torre ti Eder” (migh·dal-ʽeʹdher) ket isu met laeng ti inusar ni Mikias (4:8) idi dinakamatna ti “torre ti pangen.” Daytoy a sasao mabalin a tumukoy iti nagan ti disso a nagpakarsuan ni Jacob ken nausar mainaig iti pannakaisubli ti ‘agsagkisagking’ nga ili ni Jehova. (Mik 4:7) Iti pannakaisubli ti “Sion,” mabantayanda a kasla manipud iti “torre” a pagsiputan, iti kasta masaluadanda manipud sabali pay a peggad. Ti kasta a pangngarig ket tumunos iti dadduma pay a panamagpadis nga adda iti padto ni Mikias; tinukoyna ti Mesias kas maysa nga ‘agipaspastor’ (Mik 5:2-4), ket ti ili ni Jehova tinukoyna kas ti “arban ti tawid [ti Dios].”​—Mik 7:14.