SIMEON

[manipud Heb. a sao a ti kaipapananna ket “denggen; imdengan”].

1. Ti maikadua kadagiti 12 nga annak ni Jacob; napanaganan iti kasta agsipud ta kinuna ni Lea nga inana: “Ni Jehova immimdeng, a magurguraak idi ket ngarud intedna met kaniak daytoy.”​—Ge 29:32, 33; 35:23-26; 48:5; Ex 1:1-4; 1Cr 2:1, 2.

Idi nagpakarso ni amana a Jacob iti asideg ti Siquem, impakita ni Simeon ken ti adingenna a ni Levi ti pungtotda nga agibales nupay nakaro ken naulpit unay. Nupay saan nga ammo ken awan pammalubos ti amada, bukbukodda ti nagibales maipaay ti dayaw ti in-inaudi a kabsatda a ni Dina babaen ti panangpapatayda kadagiti Siquemita, a dayta ti nangyeg iti pannakalaksid ti intero a pamilia ni Jacob.​—Ge 34:1-31.

Idi agangay, karaman manen ni Simeon iti dakes nga aramid idi implanoda nga agkakabsat ti panangpapatayda ken Jose. (Ge 37:12-28, 36) Saan a naibaga no ni Simeon, kas maikadua a kalakayan, ti nangidaulo iti daytoy a panangisikat iti biag ni Jose. Kalpasan ti sumagmamano a tawen, idi maysan ni Jose nga administrador iti taraon iti Egipto ken sinubokna dagiti kakabsatna, ni Simeon ti pinili ni Jose a maparautan ken maibalud agingga a ti dadduma pay a kakabsatna maiyegda ni Benjamin iti Egipto.​—Ge 42:14-24, 34-36; 43:15, 23.

Sakbay unay ti ipapatay ni Jacob, idi bembendisionanna ti annakna, nalagipna ti kinaranggas da Simeon ken Levi mainaig kadagiti Siquemita adun a tawen ti napalabas, ket kunkunana: “Dagiti igamda a pangpapatay gamgamigam ti kinaranggas. Iti nasinged a bunggoyda dika umay, O kararuak. Iti kongregasionda dika makikaykaysa, O pagannayasak, agsipud ta iti ungetda pinapatayda dagiti lallaki, ket iti kinamanangipapilitda linugpida dagiti toro. Mailunod koma ti ungetda, agsipud ta naulpit, ken ti rungsotda, agsipud ta agtignay a sigugubsang. Bingbingayek koma ida iti Jacob ket iwarawarak koma ida iti Israel.” (Ge 49:5-7) Gapuna, inikkat ni Jacob ti aniaman a namnamaen ni Simeon a panangawat iti kalintegan ti kinainauna a napukaw ti laklakay a kabsatna a ni Ruben. Naaddaan ni Simeon iti innem nga annak, ti maysa ket manipud iti babai a Canaanita. Kas naipadto, ti bingay ti tribu ni Simeon ket saan a naikaykaysa iti bingay ni Levi, no di ket ‘naiwarawara’ dagitoy a dua; kasta met, ti bingay ni Simeon ket nabingbingay kas naipasngat a siudsiudad iti teritoria ti Juda.​—Ge 46:10; Ex 6:15; 1Cr 4:24; Jos 19:1.

2. Ti tribu ti Israel a nagtaud iti pampamilia ti innem nga annak ni Simeon: da Jemuel, Jamin, Ohad, Jaquin, Zohar, ken Shaul. (Ge 46:10; Ex 6:15) Bayat ti panagdaliasat ti Israel idiay let-ang, nagaabay a nagkampo ti tribu ni Simeon, Ruben, ken Gad iti abagatan ti tabernakulo, ket ti Ruben ti nangidaulo iti daytoy a tallo a tribu a benneg. Iti panagmartsada, kastoy met laeng ti urnos dagitoy a tribu, a ni Selumiel ti nagserbi kas panguluen ti pakarso ken ti buyot ti Simeon.​—Nu 1:4, 6; 2:10-15; 10:18-20.

Ibabassit ti Populasion ti Tribu. Idi tiempo ti umuna a panagsensus makatawen kalpasan ti Ipapanaw iti Egipto, ti tribu ni Simeon ket nagdagup iti 59,300 a nabaneg a lallaki a 20 ti tawenda nga agpangato a makabael nga agserbi iti militaria. (Nu 1:1-3, 22, 23) Nupay kasta, kalpasan ti agarup 39 a tawen, ipalgak ti maikadua a panagsensus a dakkel ti naksay iti tribu, nga adda laengen 22,200 a mabalin nga agserbi iti militaria. Ti dagup ti naksay ket nasurok a 62 porsiento, ti kadakkelan a porsiento no idilig iti napadasan ti aniaman a dadduma pay a tribu.​—Nu 26:1, 2, 12-14.

Saan a dinakamat ni Moises ti nagan ni Simeon iti pammakada a pamendisionna iti Israel. Saanna a kayat a sawen daytoy a saan a nabendisionan ti tribu, ta nairaman dayta iti ngudo ti sapasap a pamendision. (De 33:6-24, 29) Ti Simeon ti umuna a nadakamat a tribu a naituding nga agtakder idiay Bantay Gerizim mainaig kadagiti maisawang a bendision.​—De 27:11, 12.

Awan duadua a naikabilangan ti bimmassit a bilang ti Simeon idi maituding ti teritoria ti tunggal tribu iti Naikari a Daga; saan a naikkan ti tribu iti naisina a bingay, no di ket naikkan kadagiti siudad iti mismo nga uneg ti teritoria ti Juda. Iti kastoy a pamay-an, natungpal ti padto ni Jacob idi matmatayen, nga insawangna nasurok a 200 a tawen ti napalabas. (Nu 34:16-20; Jos 19:1-9; idiligyo ti Ge 49:5-7.) Nagtinnulong ti Simeon ken Juda a nangala iti daytoy a teritoria manipud kadagiti Canaanita. (Uk 1:1-3, 17) Adda met dagiti nailasin a naipasngat a siudad iti tawid ti Simeon nga agpaay iti tribu ni Levi.​—Jos 21:4, 9, 10; 1Cr 6:64, 65.

Nadakamat iti Pakasaritaan ti Biblia iti Naud-udi a Tiempo. Pasaray nadakamat dagiti Simeonita iti pakasaritaan ti Israel idi agangay​—idi tiempo ni David (1Cr 4:24-31; 12:23, 25; 27:16), idi kaaldawan ni Asa (2Cr 15:8, 9), ken idi tiempo ni Josias (2Cr 34:1-3, 6, 7). Daytoy naud-udi a natukoy a narelihiosuan a reporma ni Josias ket mangipakita a nupay adda ti Simeon iti uneg ti teritoria ti Juda, kaskasdi a nakiraman dayta iti politika ken relihion ti makin-amianan a pagarian. Agparang nga idi kaaldawan ni Ezekias, pinarmek ti 500 a Simeonita dagiti natda nga Amalekita sa simmublatda a nagnaed iti lugar dagita a tattao.​—1Cr 4:41-43.

Nadakamat ti nagan ti Simeon agraman ti dadduma pay a tribu ti Israel kadagiti naimpadtuan a libro ti Ezequiel ken Apocalipsis. Ti immarantiddog a teritoria a naituding iti Simeon kas naibalabala iti Naikari a Daga a nasirmata ni Ezequiel ket adda iti nagbaetan dagiti teritoria ti Benjamin ken Isacar, iti abagatan ti “nasantuan a kontribusion.” Ngem ti ruangan a naituding iti Simeon iti abagatan ti nasantuan a siudad ket naikadua kadagiti ruangan a naipanagan iti Isacar ken Zabulon. (Eze 48:21-25, 28, 33) Iti sirmata iti Apocalipsis kapitulo 7 mainaig iti 144,000 a naselioan, ti tribu ni Simeon ti maikapito a nailista.​—Apo 7:7.

3. Maysa nga inapo ni Maria nga ina ni Jesus.​—Lu 3:30.

4. Ti nalinteg ken managbuteng-Dios a lakay a simrek iti templo iti mismo nga aldaw nga inserrek sadiay da Jose ken Maria ti ubing a ni Jesus. Impalgak ti Dios ken Simeon a sakbay ti ipapatayna makitana ti Kristo. Iti kasta, inubbana ti maladaga, binenditona ni Jehova, ket bayat nga adda kenkuana ti nasantuan nga espiritu, imbagana iti ina ti ubing: “Daytoy ket naikabil a maipaay iti pannakapasag ken iti pannakaibangon manen ti adu iti Israel.” Impadto met ni Simeon nga agleddaangto iti kasta unay ni Maria, nga arigna sinalput ti kampilan, gapu iti nakas-ang nga ipapatay daytoy nga anakna.​—Lu 2:22, 25-35.

5. Ti porma ti nagan ni Simon (Pedro) a naminsan nga inusar ni Santiago iti sanguanan dagiti apostol ken lallakay idiay Jerusalem.​—Ara 15:14.

6. Maysa kadagiti mammadto ken mannursuro iti kongregasion idiay Antioquia, Siria, a nangipatay iti imada kada Bernabe ken Pablo kalpasan nga intuding ti nasantuan nga espiritu nga agserbi a misionero dagitoy a dua a lallaki. Ti Latin nga awag ken Simeon ket Niger.​—Ara 13:1-3.