Apay nga Agbutengkayo iti Pudno a Dios Itan?

“Agbutengka iti pudno a Dios ket salimetmetam dagiti bilbilinna. Ta daytoy isu ti dagup ti rebbeng ti tao.”​—ECLESIASTES 12:13.

1, 2. Apay a maikanatad ti umiso a panagbuteng iti Dios?

TI NASALUN-AT ken nadayaw a panagbuteng iti Dios ket pagimbagan ti tao. Wen, nupay adu dagiti natauan a buteng a makapadanag, makadangran pay ketdi iti kinataotayo, nasayaat kadatayo ti agbuteng ken Jehova a Dios.​—Salmo 112:1; Eclesiastes 8:12.

² Ammo ti Namarsua daytoy. Gapu iti ayatna kadagiti parsuana, binilinna dagiti amin nga agbuteng ken agdayawda kenkuana. Mabasatayo: “Nakitak ti sabali pay nga anghel a tumaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag kadagidiay agnaed iti daga, ken iti tunggal nasion ken tribo ken pagsasao ken ili, a kunkunana iti natbag a timek: ‘Agbutengkayo iti Dios ket ipaayyo kenkuana ti dayag, agsipud ta ti oras ti panangukomna dimtengen, ket ngarud agdaydayawkayo iti Daydiay nangaramid iti langit ken iti daga.’”​—Apocalipsis 14:6, 7.

3. Aniat’ inaramid ti Namarsua agpaay kadagiti immuna a nagannaktayo?

³ Di pagduaduaan a rumbeng nga ipangagtay ti Namarsua kadagiti amin a banag, ti Gubuayan ti biag, ta isu ti makinkukua kadatayo ken iti daytoy a planeta. (Salmo 24:1) Kas panangipakita iti naindaklan nga ayatna, inikkan ni Jehova dagiti naindagaan nga annakna iti biag ken impaayanna ida iti nakaskasdaaw a lugar a pagyanan​—maysa a nagpintas a paraiso. Ngem daytoy a nakaskasdaaw a sagut ket kondisional. Maikuna a naited daytoy kas banag nga aywanan. Nasken idi nga aywanan dagiti immuna a nagannak kadatayo ti pagtaenganda ken isaknapda dayta agingga a matagitauan ken maiturayanda ti intero a daga. Naaddaanda iti pribilehio ken annongen kadagiti animal iti daga, tumatayab, ken ikan​—amin a sabsabali pay a sibibiag a parsua a makalangenda ken kadagiti annakda ditoy daga. Gapu iti daytoy dakkel nga annongen [a naitalek kenkuana], manungsungbat ti tao.

4. Aniat’ inaramid ti tao iti parsua ti Dios?

⁴ Iti laksid dayta a nakasaysayaat a pangrugian, kitaenyo ti panangmulit ti tao iti nakapimpintas a naindagaan a pagtaenganna! Tinulawan dagiti tattao ti daga a mangipakpakita iti nakaro a di panangraem iti kalintegan ti Dios kas agtagikua iti daytoy a gameng. Ti pannakamulit ket pagpeggadenna ti biag ti nakaad-adu a kita ti animal, tumatayab, ken ikan. Saan nga ipalubos ti nalinteg ken naayat a Diostayo nga agnanayon daytoy. Ti pannakadadael ti daga kalikagumanna ti panangsingir, a panggapuan dagiti adu nga agbuteng. Iti sabali a bangir, kadagidiay siraraem nga agkammatalek iti Dios, makaliwliwa a maammuan no aniantot’ mapasamak. Mangukomto ni Jehova, ket mataginayonto ti daga. Pudno a naimbag a damag daytoy iti amin a nasingpet a tattao ditoy daga.

5, 6. Kasanonto ti panagtignay ni Jehova iti inaramid ti tao iti parsuana?

⁵ Siasino ti aramatento ti Dios a mangibanag iti panangukomna? Ni Jesu-Kristo, a naitronon kas Ari iti nailangitan a Pagarian ti Dios. Babaen iti dayta a nailangitan nga Anak, pagpatinggaento ni Jehova ti agdama a narugit, rebelioso a sistema. (2 Tesalonica 1:6-9; Apocalipsis 19:11) Iti kastoy a pamay-an bang-arannanto dagidiay agbuteng kenkuana ken, maigiddato iti dayta, pannakaispal ken pannakataginayon ti naindagaan a pagtaengantayo.

⁶ Kasanonto a mapasamak daytoy? Dakamaten ti Biblia ti umad-adani a dakkel a rigat nga agturong iti gubat ti Armagedon. (Apocalipsis 7:14; 16:16) Daytoyto ti panangukom ti Dios iti daytoy namulitan a sistema ti bambanag ken kadagiti manangmulitna. Addanto kadi tattao a makalasat? Adda! Isudanto dagidiay addaan iti panagraem, nadayaw a panagbuteng iti Dios, saan ket a dagidiay addaan iti makapakullayaw, di nasalun-at a panagbuteng kenkuana. Maisalakandanto.​—Proverbio 2:21, 22.

Nakaskasdaaw a Parangarang ti Pannakabalin

7. Apay a bimmallaet ti Dios maigapu iti Israel idi kaaldawan ni Moises?

⁷ Daytoy a dramatiko a tignay ni Jehova a Dios ket nailadawan iti naindaklan nga aramidna agpaay kadagiti agdaydayaw kenkuana agarup 1,500 a tawen sakbay ti Kadawyan a Panawentayo. Tinagabo ti nabileg unay a buyot ti Egipto dagiti Israelita a nakipagnaed, nga insayangkatna pay ketdi, iti panangibilin ti agturayna, ni Faraon, ti pannakapapatay dagiti amin a kayyanak a lallaki nga Israelita. Nagballigi ti Dios maibusor iti Egipto idi winayawayaanna ti Israel manipud iti nadangkok a napolitikaan a sistema, wen, wayawaya manipud iti nasion a namulitan iti panagdaydayaw kadagiti adu a didiosen.

8, 9. Kasanot’ panagtignay ni Moises ken dagiti Israelita iti ibaballaet ti Dios?

⁸ Nailanad iti Exodo kapitulo 15 ti tignay ti Israel iti pannakawayawaya daytoy manipud Egipto. Ti pananganag iti daytoy a salaysay tulongannatayo a mangtarus no kasano a maisalakan dagiti Kristiano iti agdama a sistema a namulitan iti naespirituan ken pisikal. Usigentay ti Exodo kapitulo 15, nga ipamaysatayo kadagiti napili a bersikulo tapno maammuantayo no apay a rumbeng a pilientayo ti agbuteng ken Jehova, ti pudno a Dios. Irugitayo iti Ex 15 bersikulo 1 ken 2:

⁹ “Idin kinanta ni Moises ken dagiti annak ti Israel daytoy a kanta ken Jehova ket sinaoda a kunada: ‘Kantaak ni Jehova, ta nagballigin a sidadayag. Ti kabayo ken ti nagsakay intappuakna iti baybay. Ni Jehova isu ti pigsak ken ti bilegko, ta isu ti nagbalin a salakanko.’”

10. Aniat’ nangituggod iti panangdadael ti Dios iti buyot ti Egipto?

¹⁰ Pagaammo dagiti tattao iti aglikmut ti lubong ti salaysay no kasanot’ panangwayawaya ni Jehova iti Israel manipud Egipto. Nangyeg kadagiti saplit iti dayta a nabileg a pannakabalin ti lubong agingga a pinalubosan ni Faraon a pumanaw dagiti Israelita idi agangay. Ngem kalpasanna, kinamat dagiti buyot ni Faraon daytoy awan gawayna nga umili ket agparang a kasla awan paglisianda iti igid ti Nalabaga a Baybay. Nupay kasla mapukaw koman a dagus dagiti annak ti Israel daytoy nabiit pay a wayawayada, adda banag a pampanunoten ni Jehova. Simimilagro a nanglukat iti dalan iti baybay ket pinalasatna a sitatalged ti ilina. Idi simmurot dagiti Egipcio, pinagtangepna ti Nalabaga a Baybay ket inlemmesna ni Faraon ken dagiti buyotna.​—Exodo 14:1-31.

11. Aniat’ imbunga ti panagtignay ti Dios maibusor iti Egipto?

¹¹ Ti panangtalipupos ni Jehova kadagiti buyot ti Egipto isut’ nangitan-ok kenkuana iti imatang dagiti agdaydayaw kenkuana ken nakailatakan ti naganna. (Josue 2:9, 10; 4:23, 24) Wen, ti naganna ket naitan-ok iti ngatuen dagiti awan gawayna, ulbod a didiosen ti Egipto, a napaneknekan a dida kabaelan nga isalakan dagiti agdaydayaw kadakuada. Ti panagtalek kadagiti didiosenda ken iti tao ken iti bileg ti militar ket nagbanag iti napait a pannakapaay. (Salmo 146:3) Di ngad pakasdaawan a natignay dagiti Israelita nga agkanta kadagiti pammadayaw a nangyanninaw iti nasalun-at a panagbuteng iti sibibiag a Dios, a sibibileg a nangisalakan iti ilina!

12, 13. Aniat’ maadaltayo iti panagballigi ti Dios idiay Nalabaga a Baybay?

¹² Umasping iti dayta, bigbigentay koma nga awan kadagiti ulbod a didiosen iti kaaldawantayo ken awan nabileg a pagilian, uray pay addaan kadagiti nuklear nga armas, ti makabalin a makipada ken Jehova. Kabaelanna ken isalakannanto ti ilina. “Aramidenna kas pagayatanna iti buyot ti langit ken kadagiti agnaed iti daga. Ket awan ti manglapped iti imana wenno agkuna kenkuana, ‘Ania ti aramidem?’” (Daniel 4:35) No maawatantay a naan-anay dagitoy a sasao, matignaytayo met nga agkanta a siraragsak iti pakaidayawanna.

¹³ Kastoy ti tuloy ti kanta ti panagballigi idiay Nalabaga a Baybay: “Ni Jehova isu ti mananggubat. Jehova ti naganna.” No kasta, daytoy di maparmek a Mannakidangadang ket saan a pinutar ti arapaap ti tao. Adda naganna! Isu ‘Daydiay mamagbalin,’ ti Naindaklan a Managaramid, Daydiay ‘nga agnagan Jehova, . . . ti Kangatuan a mangringbaw iti amin a daga.’ (Exodo 3:14; 15:3-5; Salmo 83:18) Dikay kadi umanamong a nainsiriban koma kadagidiay nga Egipcio idi un-unana a maaddaan iti nainkalintegan ken nadayaw a panagbuteng iti Mannakabalin-amin imbes a busorenda?

14. Kasano a naipakita ti kinapateg ti nadiosan a panagbuteng idiay Nalabaga a Baybay?

¹⁴ Kas Nangdisenio iti daga, ti Nangaramid iti baybay ket addaan iti naan-anay a bileg kadagiti danum. (Exodo 15:8) Babaen met iti panangaramatna iti bilegna iti angin, naaramidna ti kasla imposible. Binisngayna ti nakaun-uneg a danum ken sinurngina ti turong daytoy tapno makapataud iti dalan a napaintaran iti danum a pagnaan ti ilina. Sirmataenyo ti pasamak: minilion a tonelada a danum ti baybay ti napempen iti nakangatngato kadagiti agsinnumbangir a pader, a nangpataud iti makasalaknib a paglibasan ti Israel. Wen, nasalakniban dagidiay nangiparangarang iti nasalun-at a panagbuteng iti Dios. Kalpasanna, pinagsubli ni Jehova ti danum a kasla maysa a dakkel a layus, a nangipalned kadagiti buyot ni Faraon ken amin nga alikamenda. Anian a pannakaiparangarang ti nadiosan a pannakabalin a nangartap kadagiti awan mamaayna a didiosen ken bileg ti natauan a buyot! Awan duadua, ni Jehova ti rumbeng a pagbutngan, saan kadi?​—Exodo 14:21, 22, 28; 15:8.

Panangipakita ti Panagbutengtayo iti Dios

15. Aniat’ rumbeng nga epekto kadatayo ti nabileg a panangisalakan ti Dios?

¹⁵ No koma ta nakatakdertayo a sitatalged a kadua ni Moises, sigurado a natignaytayo koma nga agkanta: “Asino ti pumadpad kenka, O Jehova, kadagiti didios? Asino ti pumadpad kenka a nagloriaan iti kinasanto? Daydiay rumbeng a pagbutngan a buyogen dagiti kanta a pagdayaw, Daydiay agar-aramid kadagiti datdatlag.” (Exodo 15:11) Naikallangogan dagiti kasta a karirikna iti sinigsiglo manipud idin. Iti maudi a libro ti Biblia, inladawan ni apostol Juan ti maysa a bunggoy dagiti matalek a napulotan nga adipen ti Dios: “Kankantaenda ti kanta ni Moises nga adipen ti Dios ken ti kanta ti Kordero.” Ania daytoy naindaklan a kanta? “Naindaklan ken nakaskasdaaw dagiti aramidmo, Jehova a Dios, a Mannakabalin-amin. Nalinteg ken napudno dagiti dalanmo, Ari ti kinaagnanayon. Siasinonto ti pudno a di agbuteng kenka, Jehova, ken mangpadayag iti naganmo, agsipud ta siksika ti nasungdo?”​—Apocalipsis 15:2-4.

16, 17. Ania a nakaskasdaaw a pasamak ti makitkitatay a maar-aramid itatta?

¹⁶ Isu a kas met laeng itatta, adda dagiti nawayawayaan a managdaydayaw a mangapresiar saan laeng a kadagiti pinarsua ti Dios no di pay ket kadagiti bilinna. Nawayawayaan iti naespirituan dagiti tattao iti amin a nasion, a naisinada iti daytoy namulitan a lubong agsipud ta binigbig ken inyaplikarda dagiti nalinteg a bilin ti Dios. Tinawen, ginasut a ribu dagiti agliblibas iti daytoy rinuker a lubong tapno makipagnaed iti nadalus, nalinteg nga organisasion dagiti agdaydayaw ken Jehova. Din agbayag, kalpasan a maibanag ti nakaro a panangukom ti Dios iti ulbod a relihion ken iti amin a dadduma pay a paset daytoy dakes a sistema, agbiagdanto nga agnanayon iti nalinteg a baro a lubong.

¹⁷ Maitunos iti Apocalipsis 14:6, 7, mangmangngeg itan ti sangatauan ti pammakdaar a mensahe ti panangukom nga ipakpakaammo dagiti Saksi ni Jehova iti sidong ti panangiwanwan dagiti anghel. Iti nasurok a 230 a pagilian idi napan a tawen, agarup lima a milion a Saksi ti nangiwaragawag iti naimbag a damag ti Pagarian ti Dios ken ti oras ti panangukomna. Tapno maisuroda dagiti padada a tattao agpaay iti pannakaisalakan, sumarsarungkar a regular dagiti Saksi iti pagtaengan dagiti tattao, a mangidadaulo iti libre a panangadal iti Biblia. Gapuna, ginasut a ribu iti tinawen ti makasursuro a naan-anay iti nainsiriban a panagbuteng iti pudno a Dios, nga idedikarda ti biagda kenkuana, ken mabautisaran. Anian a makaparagsak ta nasursuro dagiti kasta a tattao ti agbuteng iti pudno a Dios!​—Lucas 1:49-51; Aramid 9:31; idiligyo ti Hebreo 11:7.

18. Aniat’ mangipakita a nairaman dagiti anghel iti panangasabatayo?

¹⁸ Agpayso kadi a nairaman dagiti anghel iti daytoy trabaho a panangasaba? Bueno, talaga nga agparang a nabatad a ti angheliko a panangiwanwan ti masansan a nangiturong kadagiti Saksi ni Jehova iti pagtaengan a yan ti mariribukan a kararua, nga agkarkararag maipaay iti naespirituan a tulong! Kas pagarigan, mangaskasaba ti dua a Saksi ni Jehova a kinuyog ti bassit nga ubing iti maysa a puro ti Caribe. Idi agmatuonen, naikeddeng dagiti dua a nataengan nga agawiddan. Ngem karkarna ti panagregget ti ubing a mapan iti sumaruno a balay. Idi makitana a saanen a kayat dagiti nataengan ti mapan, napan nga is-isuna ket nagtuktok. Linuktan ti maysa nga agtutubo a babai ti ruangan. Idi nakita daytoy dagiti nataengan, inasitgan ken kinasaritada ti babai. Pinastrekna ida, nga inlawlawagna nga idi mangngegna ti panagtuktok iti ruangan, apagpag-isu nga ikarkararagna a mangibaon ti Dios kadagiti Saksi a mangisuro kenkuana iti Biblia. Nayurnos ti panangyadal iti Biblia.

19. Aniat’ mabalin a madakamattayo kas gunggona iti panagbuteng iti Dios?

¹⁹ Bayat a simamatalek nga idanontayo ti mensahe ti panangukom ti Dios, isurotay met dagiti nalinteg a bilinna. No mayaplikar dagitoy iti kabibiag dagiti tattao, agresulta daytoy agpadpada kadagiti pisikal ken naespirituan a bendision. Kas pagarigan, nakabatbatad ti panangkondenar ti Biblia iti amin a seksual nga imoralidad. (Roma 1:26, 27, 32) Nasaknap itatta iti lubong ti di pannakaikaskaso dagiti nadiosan a pagalagadan. Aniat’ imbungana? Pannakarakrak ti panagasawa. Iyaadu ti kinadakes. Panagraira ti makabaldado a saksakit a mayakar babaen ti sekso, a nakasaksaknapen iti daytoy maika-20 a siglo. Kinapudnona, ti nakabutbuteng a sakit nga AIDS ket nangnangruna a maisaksaknap babaen ti seksual nga imoralidad. Ngem saan aya a ti nadayaw a panagbuteng iti Dios ket napaneknekan a dakkel a salaknib kadagiti pudno a managdaydayaw?​—2 Corinto 7:1; Filipos 2:12; kitaenyo met ti Aramid 15:28, 29.

Dagiti Resulta ti Panagbuteng iti Dios Itan

20. Aniat’ mangipakita nga ammo dagiti dadduma ti pakasarsaritaan dagiti Saksi ni Jehova?

²⁰ Aglaplapusanan dagiti bendision kadagidiay agbuteng iti Dios ken mangtungtungpal kadagiti bilinna. Usigenyo ti pasamak a mangipakita iti dumakdakkel a pannakabigbig iti kinapudno a dagiti Saksi ni Jehova ket buklenda ti natalna a panagkakabsat dagiti natakneng a Kristiano. Nagnaed ti adu a Saksi, a delegado iti internasional a kombension idiay Sud America, iti maysa a hotel a naaramat met iti maysa a rabii iti taripnong dagiti saan a Saksi a pagparangan ti presidente ti pagilian. Bayat a sipapartak a kinuyog dagiti guardia ti presidente iti elevator, simrek ti maysa a Saksi a dina ammo no asino ti adda iti elevator, a nakakigtotan dagiti guardia! Idi nabigbigna ti inaramidna, nagpadispensar ti Saksi iti bigla nga iseserrekna. Impakitana ti convention badge-na a mangipakpakita nga isu ket maysa a Saksi ket kinunana a saan a mamagpeggad iti presidente. Siiisem a kinuna ti maysa a guardia: “No amin a tattao ket kas kadagiti Saksi ni Jehova, saantay koman a kasapulan ti kastoy a panangguardia.”​—Isaias 2:2-4.

21. Ania dagiti pagpilian a silulukat kadagiti tattao itatta?

²¹ Daytoy ti kita ti tattao nga ur-urnongen ken isagsagana itan ni Jehova nga ‘aggapu iti dakkel a rigat’ a mamagpatingga iti daytoy a sistema. (Apocalipsis 7:9, 10, 14) Ti kasta a pannakaisalakan ket saan laeng a maiparparna. Tapno makalasat, ti maysa a tao masapul nga agbuteng ken Jehova, bigbigenna kas ti nainkalintegan a Soberano, ken agdedikar kenkuana. Nupay kasta, ti kinapudno ket, kaaduan a tattao saandanto nga ipakita dayta a panagbuteng a mangipasigurado iti pannakasalaknib. (Salmo 2:1-6) Sigun kadagiti amin a magun-odan a pammaneknek, ti Agturay a pinili ni Jehova, ni Jesu-Kristo, agturturayen kas Ari sipud pay iti napeggad a tawen 1914. Kaipapanan daytoy a maib-ibusen ti nabatbati a tiempo para kadagiti tattao tapno mangpatanor ken mangiparangarang iti nasalun-at a panagbuteng ken Jehova. Nupay kasta, ti Namarsua kadatayo palpalubosanna dagiti indibidual, uray dagiti addaan iti natan-ok a saad, tapno agtignay: “Ita ngarud agmasiribkayo, O dakayo ar-ari; masursuruankayo, dakayo uk-ukom ditoy daga. Agserbikayo a sibubuteng ken Jehova, ket agragsakkayo a sikikintayeg. Agepenyo ti anak, tapno di agpungtot, ket mapukawkayo iti dalan, ta ti pungtotna nganngani a sumged. Nagasat amin dagidiay a kumamang kenkuana.”​—Salmo 2:7-12.

22. Aniat’ masakbayan dagidiay agbuteng iti Dios itan?

²² Sapay koma ta karamantayto kadagidiay mangidayaw iti Namarsua kadatayo kas Daydiay nangispal kadatayo. Nupay kasta, kalikaguman daytoy nga agbutengtay iti pudno a Dios itan! (Idiligyo ti Salmo 2:11; Hebreo 12:28; 1 Pedro 1:17.) Masapul nga itultuloytay nga adalen dagiti nalinteg a bilinna ken pagtulnogan ida. Ti kanta ni Moises ken ti Kordero, a nailanad iti Apocalipsis 15:3, 4, madanonnanton ti tampokna inton pukawen ni Jehova amin a kinadakes ditoy daga ken rugianna nga agasan ti tao ken ti naindagaan a taengna kadagiti makamulit nga epekto ti basol. Kalpasanna, iti amin a pusotayo, ikantatayto: “Naindaklan ken nakaskasdaaw dagiti aramidmo, Jehova a Dios, a Mannakabalin-amin. Nalinteg ken napudno dagiti dalanmo, Ari ti kinaagnanayon. Siasinonto ti pudno a di agbuteng kenka, Jehova, ken mangpadayag iti naganmo?”

Malagipyo Pay Kadi?

◻ Apay a maikari ni Jehova iti nasalun-at a panagbutengtayo?

◻ Aniat’ naiparangarang kadagiti aramid ti Dios idiay Nalabaga a Baybay?

◻ Ania dagiti gunggona nga itden ti nadayaw a panagbuteng ken Jehova?

◻ Aniat’ masakbayan dagidiay agbuteng iti pudno a Dios itan?