FEATURE
Panagallaalla ti Israel Idiay Let-ang
KALPASAN ti pannakaispalda idiay Egipto, nagallaalla ti Israel iti 40 a tawen iti Sinai, nga iti kaaduan a tiempo adayo kadagiti mapagdaldaliasatan unay a ruta ti komersio. Maysa daydi a “dakkel ken nakaam-amak a let-ang, nga addaan kadagiti nagita a serpiente ken manggagama ken addaan iti mawaw a daga nga awanan danum.” (De 8:15) Apay a nagpasarda iti kastoy a pakarigatan?
Iti Bantay Sinai, inummong ni Jehova dagiti Israelita kalpasan ti ipapanawda manipud Egipto, intedna kadakuada ti linlintegna babaen ken Moises, ket inorganisarna ida nga agbalin a maysa a nasion. Kalpasan dayta nakastrekda koma iti Naikari a Daga iti las-ud ti ababa a tiempo, ngem saan a kasta ti napasamak. Apay? Iti laksid ti amin nga inaramid ni Jehova maipaay kadakuada, saanda a nangiparangarang iti pammati ket nagrebeldeda ken Moises, a dinutokan ti Dios a mangidaulo kadakuada. Ad-adda a pinatida ti dakes a damag maipapan iti Canaan agsipud ta tinarigagayanda ti maisubli idiay Egipto! (Nu 14:1-4) Nangyeg daytoy iti giddato a panangukom ni Jehova: Uppat a pulo a tawen ti palabsen sakbay a sumrek ti nasion iti Naikari a Daga. Iti dayta a tiempo, natayton dagiti awanan pammati a kameng dayta a kaputotan.
Ti kapadasan ti Israel idiay let-ang ket nabileg a pammakdaar kadagiti Kristiano itatta tapno liklikanda ti silo ti kinaawan pammati.—Heb 3:7-12.
MAPA: Panagallaalla ti Israel Idiay Let-ang
Manmano ken agaaddayo dagiti disso a nalangto ti mulmulana iti daytoy a daga a nadeskribir kas “awanan iti danum”
Maysa daydi a “dakkel ken nakaam-amak a let-ang” a nagallaallaan ti Israel iti 40 a tawen
Ti pangrugian ti Gulpo ti ʽAqaba. Nagkampo ditoy dagiti Israelita idi dandanin agpatingga ti 40 a tawen a kaaddada iti let-ang