PAGGAMAYAN

Narabaw ken kaaduanna a babagkaten a sukog-malukong a basehas. Gagangay a naaramid iti kayo ngem no dadduma damili wenno naaramid iti bronse. Mapaglaok iti dayta ti arina ken danum sa mapagbalin a bellaay. No agaramidda idi iti nalebaduraan a tinapay, gagangay a lebaduraanda ti masa babaen ti panangilaokda iti dayta ti naalsem a bellaay a naala manipud iti kaudian a panaglutoda iti tinapay. Bay-anda nga umalsa ti masa iti paggamayan sakbay a lutuenda. (Ge 18:6; 1Sm 28:24) Ti gagangay a pamay-an isu ti pananggamay iti bellaay babaen iti ima, nupay no dadduma usaren met dagiti Egipcio ti saksakada, no gamayenda ti bellaay iti dakkel a paggamayan.​—Os 7:4.

Nagduduma ti kadakkel ti paggamayan a malukong. Nupay kasta, ti masansan a naar-aramat a kita ti damili ket malukong nga aganay 25 cm (10 pul.) ti diametrona ken agarup 8 cm (3 pul.) ti kaunegna.

Napateg a paset ti taraon dagiti Hebreo ti tinapay ken isu ti kanayon a lutlutuenda. Isu a nakapatpateg unay kadagiti Israelita ti paggamayan ken iti sabsabali pay a tattao idi ugma. Dagiti tukak a nagwaras iti Egipto bayat ti maikadua a saplit nga impagteng ni Jehova idi kaaldawan ni Moises simrekda kadagiti pagtaengan ken napanda pay kadagiti paggamayan. (Ex 8:3) Idi sigaganat a pumampanawen dagiti Israelita manipud Egipto, “inawit[da] ti bellaay nga arinada sakbay idi a malebaduraan, a dagiti paggamayanda a nabungon kadagiti kagayda adda iti abagada.” (Ex 12:33, 34) Yantangay ti paggamayan ket napateg idi nga alikamen iti pagtaengan, a masapul iti pannakaisagana ti ‘inaldaw a tinapay,’ ti panangbendision ni Jehova iti dayta nabatad nga impamatmatna a sigurado nga aglaplapusanan ti taraon iti pagtaengan, idinto ta ti panangilunodna iti dayta irepresentarna ti bisin.​—De 28:1, 2, 5, 15, 17.