ELIEL

[Ti Diosko ket Dios].

1. Maysa kadagiti pannakaulo ti kagudua a tribu ni Manases. Kas iti dadduma pay a pannakaulo, ni Eliel ket maingel, nabileg a tao, agdindinamag a lalaki.​—1Cr 5:24.

2. Maysa a Levita iti pamilia dagiti Cohatita ken inapo ni mammadto Samuel. (1Cr 6:33, 34) Nabatad a naawagan iti Eliu iti 1 Samuel 1:1 ken Eliab iti 1 Cronicas 6:27.

3. Kaputotan ni Simei iti tribu ni Benjamin.​—1Cr 8:1, 20, 21.

4. Kaputotan ni Sasac iti tribu ni Benjamin.​—1Cr 8:1, 22, 25.

5. Maysa a Mahavita, a maysa kadagiti nabileg a lallaki ni David.​—1Cr 11:26, 46.

6. Maysa pay kadagiti nabileg a lallaki ni David.​—1Cr 11:26, 47.

7. Maysa a Gadita, a maysa kadagiti nasiglat, natured, nabileg a lallaki a nangisina iti bagbagida tapno dumasig ken David bayat a mapengpengdan pay laeng idi ni David gapu ken Ari Saul. Ti kababassitan kadagitoy a Gadita ket nadeskribir a katupagna ti sangagasut, ket ti kadadakkelan katupagna ti sangaribu.​—1Cr 12:1, 8, 11, 14.

8. Anak ni Hebron; maysa kadagiti pannakaulo a Levita a pinili ni David a mangyeg iti Lakasa idiay Jerusalem.​—1Cr 15:9, 11, 12.

9. Maysa a Levita a komisionado iti dasig ni Conanias, nga isu idi ti agay-aywan iti “kontribusion ken ti apagkapullo ken ti nasantuan a bambanag” idi kaaldawan ni Ari Ezekias.​—2Cr 31:11-13.