Umadanika iti Dios
“Kitaenna No Ania ti Puso”
MABALIN a makaallilaw ti langa. Saan a kanayon nga ipalgak ti makinruar a langa no ania ti adda iti kaunggan ti maysa a tao wenno ti linaon ti pusona. Adda pagannayasan ti tao a mangukom sigun iti makinruar a langa. Pagyamanantayo ta saan laeng a ti makinruar a langa ti kitkitaen ni Jehova a Dios. Naibatad dayta iti sasao a nailanad iti 1 Samuel 16:1-12.
Iladawam ti eksena. Idi mangpulot wenno mangpili ni Jehova iti kabbaro nga ari iti nasion ti Israel, kinunana ken propeta Samuel: “Ibaonkanto ken Jesse a Betlehemita, agsipud ta impaayak ti bagik iti maysa nga ari iti annakna.” (Bersikulo 1) Saan nga innaganan ni Jehova daydiay pinilina no di ket imbagana laeng a maysa kadagiti annak ni Jesse. Idi agturturongen ni Samuel idiay Betlehem, mabalin a mapampanunotna, ‘Kasanok ngata a maammuan no asino kadagiti annak ni Jesse daydiay pinili ni Jehova?’
Idi nakagteng ni Samuel idiay Betlehem, inyurnosna a makilanglang kenkuana ni Jesse ken dagiti annakna para iti pannangan mainaig iti panagidaton. Idi sumrek ti inauna nga anak a ni Eliab, dagus a nadlaw ni Samuel ti kinataerna. Impagarup ni Samuel a maikari la unay ni Eliab nga agbalin nga ari gapu iti taktakderna, isu a kinunana iti panunotna: “Sigurado a daydiay pinulotanna adda iti sanguanan ni Jehova.”—Bersikulo 6.
Nupay kasta, naiduma ti panangmatmat ni Jehova. Kinunana ken Samuel: “Dika kitaen ti langana ken ti kangato ti taktakderna, ta isu linaksidko.” (Bersikulo 7) Saan a naatrakar ni Jehova iti kinatayag ken kinataer ni Eliab. Makita amin ni Jehova ti aniaman a banag maipapan iti maysa a tao, agraman ti makin-uneg a kinatao a pakasarakan iti pudpudno a kinapintas.
Inlawlawag ni Jehova ken ni Samuel: “Ta saan nga iti wagas nga ikikita ti tao [ti wagas nga ikikita ti Dios], agsipud ta ti maysa laeng a tao kitaenna no ania ti agparang kadagiti mata; ngem no maipapan ken Jehova, kitaenna no ania ti puso.” (Bersikulo 7) Wen, ti puso ti napateg ken Jehova—ti makin-uneg a kinatao, ti pagtataudan ti pampanunot, kababalin, ken rikrikna ti maysa a tao. “Ti manangsukimat kadagiti puso” saanna a pinili ni Eliab—uray ti simmaruno nga innem nga annak ni Jesse a napan iti sango ni Samuel.—Proverbio 17:3.
Adda pay maysa nga anak ni Jesse, ti buridek a ni David, nga ‘agpapaarab kadagiti karnero.’ (Bersikulo 11) Naayaban ngarud ni David manipud tay-ak a mapan ken Samuel. Kalpasanna, kinuna ni Jehova ken ni Samuel: “Tumakderka, pulotam, ta isu daytoy!” (Bersikulo 12) Agpayso a ni David ket “agtutubo a napintas dagiti matana ken nataer ti langana.” Ngem ti panagpuspusona ti talaga a makaay-ayo iti Dios.—1 Samuel 13:14.
Kasta unay ti panangipangpangruna ti lubong iti makinruar a kinapintas, ngem makaliwliwa a maammuan a saan nga agpapaimpluensia ni Jehova a Dios iti makinruar a langa. Saan a napateg kenkuana no kasano ti kinatayagmo, wenno no matmatandaka man ti sabsabali kas nataer wenno napintas. Ti kinataom wenno ti panagpuspusom ti napateg ken Jehova. Saan kadi a ti pannakaammom iti dayta tignayennaka a mangpatanor kadagiti galad a mamagbalin kenka a napintas iti panangmatmat ti Dios?