Nagkaykaysa iti Sidong ti Wagayway ti Ayat

“Ket nangnangruna ngem ti isuamin, adda koma kadakayo mel laeng ti nasged nga ayat.“​—1 PEDRO 4:8.

1. Ania a kita ti ayat ti makitkitatayo iti ili ti Dios itatta, ket aniat’ iwarwaragawag dagiti napulotan a Kristiano nanipud pay 1922?

MAKITKITATAY aya dayta a kita ti ayat iti ili ti Dios itatta? Pudno a kasta! Daytoy ti ayat a naisentro iti panangbigbig ken panangsuportar iti kinasoberano ni Jehova, kas ti panangsuportar ni David iti dayta. Nangnangruna nanipud tawen 1922, dagiti napulotan a kakabsat ni Jesu-Kristo, “ti Anak ni David,” ti mangiwarwaragawagen iti intero a daga a ti Pagarian ti Dios ket adtoyen ket dagiti kampeon ti manangirurumen a panagturay ni Satanas ti naipasangon iti pannakaikisap babaen iti Ukom a dinutokan ti Dios, nga isu ni Jesu-Kristo.​—Mateo 21:15, 42-44; Apocalipsis 19:11, 19-21.

2. Apay a mabalin nga awagan ni David a ‘maysa a lalaki a mayannurot iti puso ni Jehova’?

² Ni David ket ‘maysa a lalaki a mayannurot iti puso ni Jehova.’ Nabatad daytoy iti panagayatna ken Jehova ken iti kinalintegna​​—kababalin nga uray ni takrot nga Ari Saul binigbigna nga ik-ikutan ni David​—wen, kadagiti kualidadna a kinaawan-buteng, amin-puso a debosion ken Jehova, nalaing a mangidaulo, ken napakumbaba a panagpasakop iti nateokratikuan nga urnos.​—1 Samuel 13:14; 16:7, 11-13; 17:33-36; 24:9, 10, 17.

3. Aniat’ kababalin ni Jonathan ken ni David, ken apay?

³ Kalpasan ti panagballigina ken ni Goliat, nagparang manen ni David ken ni Saul. Iti dayta a nagparang manen ti maysa pay a managayat ti kinalinteg. Isu ni Jonathan, inaunaan nga anak ni Ari Saul. “Ket naaramid idi a [ni David] nagibusanna ti pannakisasaona ken Saul, a ti kararua ni Jonathan naisinggalut idi kararua ni David, ket ni Jonathan nagayat kenkuana a kas iti kararuana met laeng. (1 Samuel 18:1) Imbes a ti nailasagan a kinamaingel ken laingna iti pallatibong, ti ketdi bumarbara a kinaregta ni David a malinisan ti nagan ti Dios manipud pannakaumsi, ti kinaawan-agumna, ken ti naan-anay a panagpannurayna ken Jehova ti nakaallukoy iti naimpusuan a kinadekket ni Jonathan.​—Idiligyo ti Salmo 8:1, 9; 9:1, 2.

4. Aniat’ inaramid ni Jonathan kas panangbigbig a ni David isu daydiay napulotan nga agbalin nga ari?

⁴ Nupay ni Jonathan ket agarup 30 años a natataengan ngem ni David, isut’ nakipagkaykaysa kadua daytoy agtutubo a guerrero iti naunday a singgalut ti pannakigayyem. “Idin da Jonathan ken ni David nangaramidda iti maysa a tulag, agsipud ta isu nagayat kenkuana a kas iti kararuana met laeng. Ket ni Jonathan inuksobna di lambonna nga adda idi kenkuana, ket intedna ken David, ken ti pagan-anayna, uray pay ti kampilanna met laeng ken ti baina ken ti barikesna.” (1 Samuel 18:4) Anian a naisalsalumina a panangiparangarang ti panangbigbig iti biang ni Jonathan! Kadawyanna a ni Jonathan isu komat’ agtawid ni Saul. Ngem isut’ nangiyebkas ti nabara, naprinsipiuan a panagayat ken David ken panagpasakop kenkuana kas daydiay napulotan nga agbalin nga ari, daydiay kangatuan iti isuamin a desidido a mangitandudo ti nagan ken kinasoberano ni Jehova.​—2 Samuel 7:18-24; 1 Cronicas 29:10-13.

5. Aniat’ binigbig ni Jonathan no maipapan iti teokratiko a pannakigubat?

⁵ Ni Jonathan mismo ti maysa met a mannakidangadang a maipaay iti kinalinteg. Isut’ nagkuna nga “awan mangiapped ken Jehova iti panangisalakanna iti pannakaaramat iti adu wenno bassit.” Apay? Gapu ta nabigbig ni Jonathan nga adda a kanayon ti pannakasapul a biruken ti nadiosan a panangiwanwan iti panagballigi iti nateokratikuan a pannakigubat. Idi ni Jonathan nakaaramid ti di inggagara a basol nga isut’ nangsentensiaan ni Saul kenkuana ti ipapatay, sipapakumbaba nga inawatna ti pannusa. Siraragsak, dagiti umili ti nangsubbot kenkuana.​—1 Samuel 14:6, 9, 10, 24, 27, 43-45.

Panangiyebkas ti Nasungdo nga Ayat

6. Kasano a ti nasungdo nga ayat ni Jonathan inispalna ni David?

⁶ Ni Saul nagimunanna ti kinatan-ok ni David kas mannakigubat ket gapu itoy insikatna ti panangpapatay kenkuana, ngem ditoy a simrek ti nasungdo a panagayat ni Jonathan! Kuna ti salaysay: “Ngem ni Jonathan, nga anak a lalaki ni Saul, nagayat unay ken David. Ket ni Jonathan imbagana ken David, a kinunana: ‘Ni Saul nga amak agsapul iti panangpapatayna kenka. Gapuna ita, agdawatak kenka nga aluadam ta bagim iti bigat ket agtaengka iti maysa a nalimed a lugar ket agiemmengka.’” Iti dayta nga okasion, ni Jonathan inamo-amona ni Saul, gapuna naispal ni David. Ngem ti ad-adda pay a panagballigi ni David a “nakigubat kadagiti Filisteos ket pinatayna ida iti dakkel a panangpapatay” ti nangriing manen iti gura ni Saul. Gapuna naikeddengna manen ti panangpapatay ken David, gapuna a nagtalaw ni David.​—1 Samuel 19:1-10.

7. Idi nakita ni Jonathan ni pugante a David, aniat’ kinunada iti maysa ken maysa a nangpatalged ti maysa a tulag?

⁷ Idi agangay, ni pugante a David nagsarakda manen ken ni Jonathan, a nagkuna: “Iti uray aniaman a kalikaguman ta kararuam, isu ti aramidekto met laeng a maipaay kenka.” Pinatalgedan manen dagiti dua ti tulagda iti imatang ni Jehova, ket inkari ni David a dinanto pulos pugsaten ti naayat a kinamanangaasi iti sangakabbalayan ni Jonathan​—maysa a kari a simamatalek a sinalimetmetanna. “Gapuna ni Jonathan pinagsapatana manen ni David gapu iti ayat nga ipaayna kenkuana; ta isu inayatna a kas iti kararuana met laeng.”​—1 Samuel 20:4-17; 2 Samuel 21:7.

8. Apay a sililimed a nagsarak da Jonathan ken David iti away, ket aniat’ napasamak iti dayta nga okasion?

⁸ Ngem timmangken ni Ari Saul iti pingetna a mangpapatay ken David. Ni Saul ginayangna pay ti mismo nga anakna a Jonathan idi daytoy ti nagsao a maipaay ken ni David! Gapuna ni Jonathan ti nakipagkinnita ken David a sililimed idiay away. “Ni David, . . . nagpakleb iti rupana iti daga ket nagruknoy iti namitio; ket isuda naginnagekda ti maysa ken maysa ket nagsangit ti maysa ken maysa, agingga ni David napalpalalo. Ket ni Jonathan kinunana ken David: ‘Inka a sitatalna, gapu ta kas insapatata nga agpadpada iti nagan ni Jehova, a kinuna, “Ni Jehova addanto iti baetta ken ti putotko ken iti putotmo iti agnanayon.”’” Gapuna nagsinada, ket nagbalin a pugante ni David idiay let-ang ti Zif.​—1 Samuel 20:41, 42.

9, 10. (a) Kasanot’ ad-adda pay a panangparegta ni Jonathan ken ni David iti nalabit maudin a panagsarak dagiti dua? (b) Idi a napatay dagiti Filisteos da Jonathan ken Saul, ania a dung-aw ti pinutar ni David, ket kasanona a tinampokan dayta?

⁹ Siaayat, ni Jonathan intultuloyna a pinaregta ni David. Kas kunaen ti rekord: “Ket ni Jonathan nga anak ni Saul timmakder ket napan ken David idiay Hores, ket pinapigsana ti imana iti Dios. Ket isu kinunana kenkuana: Dika agbuteng; ta ti ima ni Saul nga amak dinakanto masarakan, ket sikanto ti agari iti Israel, ket siakto ti maikadua kenka; ket ni Saul nga amak ammona met dayta.’ Ket isuda a dua nagaramidda iti maysa a tulag iti sango ni Jehova.” ​—1 Samuel 23:15-18.

¹⁰ Agparang, a kasla dayta ti maudi a panagkita da David ken ti nasungdo a kaduana a ni Jonathan. Iti kamaudiananna, idi agpadpada a napapatay da Jonathan ken Saul iti pannakigubatda kadagiti Filisteos, nangputar ni David ti dung-aw, a “Ti Ba-i.” Iti dayta inyebkasna ti panagraemna ken Saul kas pinulotan ni Jehova ngem tinampokanna ti kantana kadagiti sasao a: “Ni Jonathan napapatay iti tapaw dagiti nangato a dissom! Mapaladingitak a gapu kenka, kabsatko a Jonathan, makaay-ayoka unay idi kaniak. Ti ayatmo kaniak idi nakaskasdaaw a ringbawan ti ayat dagiti babbai. Amangan a pannakapasag ti maingel ken ti pannakapukaw dagiti ig-igam ti gubat!” (2 Samuel 1:18, 21, 25-27) Idin napulotan ni David ti maikapamindua, kas ari ti Juda.

Dagiti Moderno-Aldaw a Katupagna

11, 12. (a) Ania a kita ti ayat ti impakita da David ken Jonathan? (b) Aniat’ inyanniniwan ti nasged nga ayat da David ken Jonathan?

¹¹ Yantangay “amin a Kasuratan nga impaltiing ti Dios isu met ti naimbag a pakasursuruan,” aniat’ maadaltayo manipud ti salaysay maipapan ken ni David ken Jonathan? (2 Timoteo 3:16) Naammuantayo nga adda ti ayat a “nakaskasdaaw . . . [ngem] ti ayat dagiti babbai.” Pudno, “ti ayat dagiti babbai” ti mabalin a nakaay-ayat ken makapnek no maannurot ti linlinteg ni Jehova maipapan iti panagasawa. (Mateo 19:6, 9; Hebreo 13:4) Ngem ni David ken Jonathan impakitada ti nasaysayaat pay nga aspeto ti ayat, maitunos iti bilin a: “Denggem, O Israel: ni Jehova a Diostayo isu ti maymaysa a Jehova. Ket sika ayatemto ni Jehova a Diosmo iti isuamin a pusom ken iti isuamin a kararuam ken iti isuamin a kabaelam.”​— Deuteronomio 6:4, 5.

¹² Nagkaykaysa da David ken Jonathan iti panangiyebkas iti dayta nga ayat tapno maikkat amin a pakaumsian iti nagan ni Jehova nga isut’ imbunton dagiti kabkabusorna iti dayta. Iti panangaramidda iti daytoy, napatanorda ‘ti nasged nga ayat iti maysa ken maysa.’ (1 Pedro 4:8) Ti panagkadua a tinagiragsakda iti daytoy a pamay-an ket linab-awanna ti naibilin idiay Levitico 19:18: “Ayatem ti padam a tao a kas ita bagim.” Pudno unay, inyanniniwan dayta ti kita ti ayat nga impamatmat ni Jesus iti “baro a bilin, . . . tapno agayan-ayatkayo iti maysa ken maysa; kas iti panagayatko kadakayo, kasta met agayan-ayatkayo koma iti maysa ken maysa.” Ti ayat ni Jesus ket managsakripisio saan laeng nga iti naan-anay a panagpasakopna iti pagayatan ni Jehova no di ket kasta met iti kinatulokna a “mangted ti biagna gapu kadagiti gagayyemna.”​—Juan 13:34; 15:13.

Ti Sangsangkamaysa nga “Arban”

13. Ania a grupo dagiti manangiwaragawag ti Pagarian ti nagparang iti eksena nangnangruna nanipud 1935, ket ania a panagkaykaysa ti adda kadakuada ken dagiti napulotan a Kristiano?

¹³ Dagiti napulotan a Kristiano ti “bassit nga ipastoran” ti nangibaklay ti kadagsenan a paset iti bakal a pannakisango iti moderno-aldaw a Goliat. Nanipud 1935, nupay kasta, isudat’ kinaduaanen ti sabali pay ken dakdakkel a “pagtaraknan” dagiti manangiwaragawag ti Pagarian. Dagitoy “sabsabali a karnero” ti nakipagkaykaysa a kadua ti natda kadagiti napulotan a “karnero” kas “maymaysa nga arban” iti sidong ti “maymaysa a pastor,” “ti Anak ni David,” iti naisangsangayan unay a singgalut ti naayat a panagkaykaysa​—kas daydiay adda idi ken ni Jonathan ken David.​—Lucas 12:32; Juan 10:16; Ezequiel 37:24.

14. Aniat’ katupag ti gakat ni Saul a mangpapatay ken David, ken ti siaayat a panangidasig ni Jonathan ti bagina ken ni David?

¹⁴ Ket bayat a daytoy bunggoy a Jonathan ti mangrugrugi a dumakdakkel nga agbalin a dakkel nga umariwekwek, bimtak ti Gubat Sangalubongan II, a gapu itoy agpadpada ti napulotan ken ti kakaduada ket nasuotda ti uray la. Dagidiay ket tawtawen ti nakaro a pannakaidadanes, a masansan sugsugsogan dagiti klero. Katupag daytoy dagiti gakat ni Saul a mangpapatay ken napulotan a David ket, iti kamaudiananna, ni Jonathan idi a siaayat nga indasigna ti bagina ken ni David. Anian a nasged nga ayat ti impakita dagiti klase David ken Jonathan iti maysa ken maysa kabayatan dayta a tiempo! Ti pangngarig ni Jesus idiay Mateo 25:35-40 ti masansan addaan literal a kaitungpalanna.a

15. (a) Ania a kurso nga innala dagiti Saksi ti maisupadi iti innala ti moderno a klase Saul? (b) Aniat’ mabalin a katupag itatta ti “dakes nga espiritu a naggapu ken Jehova” a nangriribuk ken Ari Saul?

¹⁵ Anian ti pannakaigiddiat dagiti manangsalimetmet kinatarnawna a Saksi ni Jehova iti kurso ti moderno a klase Saul! Dagiti Saksi, a “saanda a paset ti lubong,” nagtulnogda a sapasap iti bilin ni Jesus nga “agayan-ayatda iti maysa ken maysa.” (Juan 15:17-19) Iti kasumbangirna, kadagiti dua a sangalubongan a gubat dagiti klero ti Kakristianuan iti agsumbangir a dasig nagkararagda iti “diosda” a maipaay iti panagballigi, bayat a minilmilion a soldado ti napappapatay babaen kadagiti karelihionda met laeng iti dadduma a nasnasion. Ti “dakes nga espiritu a naggapu ken Jehova” a nangriribuk ken Saul ti mabalin katupagna la unay ti resulta ti panangibukbok dagiti anghel kadagiti saplit ti Apocalipsis kapitulo 8. Nalawag a ti nasantuan nga espiritu ni Jehova awan kadagiti klero ti Kakristianuan.​—1 Samuel 16:14; 18:10-12; 19:10; 20:32-34.

16. (a) Kasano nga inusar dagiti klero ti dua a sangalubongan a gubat a nangirurumen ti ili ni Jehova? (b) Kadagiti nabiit pay a tawtawen, apay a maikuna a ti moderno-aldaw a Saul intultuloyda nga an-anupan ti ili ti Dios?

¹⁶ Idi 1918 inusar dagiti klero ti rigat ti gubat a mangallukoy kadagiti napolitikaan a pannakabalin ti Estados Unidos nga agtignay a maibusor kadagiti responsable nga opisiales ti Watch Tower Society ket kamaudiananna imbaludda ida. (Dagitoy nga Estudiante ti Biblia ti naabsuelto a naan-anay iti kamaudiananna.) Bayat ti maikadua a gubat sangalubongan, naparitan dagiti Saksi ni Jehova iti sakop dagiti agtuturay nga Axis ken iti kaaduan a pagilian ti British Commonwealth, masansan kas resulta ti narelihiusuan a panangpilit. Kas pangarigan, anagenyo ti adda iti ngato a kopia ti surat nga insurat ti Arsobispo ti Sydney (nagbalin a kardinal iti kamaudiananna) kasanguanan la unay ti pannakaparit dagiti Saksi ni Jehova idiay Australia. Idi ti pannakaiparit ket nausig iti Nangato a Korte ti Australia, ti hues a nangdengngeg, ni Mr. Justice Starke, ti nangiladawan iti dayta kas “di nainkalintegan, di rasonable ken mangirurumen.” Ti pannakaiparit ket naikkat idi Hunio 14, 1943, ket ti gobierno nagbayad kadagiti daños. Kadagiti nabiit pay a tawen, ti narelihiusuan a panangparigat ti sumagmamano a gobierno idiay Africa ken Asia ti nangibunga iti narungsot a panangirurumen kadagiti Saksi ni Jehova. Gapuna ti moderno-aldaw a Saul​—dagiti klero ti Kakristianuan​—ti nagtultuloy a mangan-anup iti ili ti Dios.

17. (a) Kasanot’ panangsango dagiti Saksi kadagiti agtultuloy a politiko-relihiuso a panangpilpilit? (b) Aniat’ indemostra ti sangalubongan a panagkaykaysa dagiti Saksi?

¹⁷ Bayat ti 1980’s, kasano ti panangsango dagiti Saksi ni Jehova ti agtultuloy a politiko-relihiuso a panangpilpilit? Kas met laeng ti panangsango ni David ken Goliat, ken panangsango da David ken Jonathan ken ni Ari Saul! Awan butengda ken determinadoda a mangsalimetmet ti kinatarnawda maipapan iti isyu ti kinasoberano, ta ammoda nga agballiginto ti Pagarian ti Dios. (Daniel 2:44) Iti imatang ti pannakaidadanes, addaanda ti panagkaykaysa, a mangparparegta ti maysa ken maysa iti internasional a singgalut ti ayat a di pay nakitkita ti lubong nanipud pay idi. Kas dagiti neutral iti tiempo ti gubat, saanda nga ibuybuyat ti dara dagiti kapammatianda iti sabali a nasnasion. (Mikias 4:3, 5) Gapuna indemostrada nga isuda ti grupo a tuktukoyen ni Jesus idi a kinunana: “Gapu itoy mailasindanto a dakayo ti adalak, no adda ayatyo iti maysa ken maysa.” (Juan 13:35) Kas sangalubongan a panagkakabsat, dagiti Saksi ni Jehova ‘kinawesanda ti bagbagida ti ayat, ti naan-anay a singgalut ti panagkaykaysa,’ maysa a singgalut a mangiab-aw iti amin a panagialasin ti rasa, tribo, ken ti nasion.​—Colosas 3:14.

Panangipakita ti “Nasged nga Ayat”

18. (a) Aniat’ adda a katupag itatta ti ayat ni Jonathan ken ni David, ket kasano a mapampaneknekan daytoy? (b) Aniat’ imbungana iti sangalubongan ti awan pannakikompromisona a takder ti klase David?

¹⁸ Lagipenyo a “ti kararua ni Jonathan naisinggalut idi kararua ni David, ket ni Jonathan nagayat kenkuana a kas iti kararuana met laeng.” Anian a nakaskasdaaw a katupag ti adda ita kadagitoy “maudi nga al-aldaw”! (2 Timoteo 3:1, 14) Kabayatan ti awan kaes-eskanna a kinagulo itoy narungsot a panawen, adda maysa a grupo, dagiti Saksi ni Jehova, a nangsalimetmet ti naayat a sangalubongan a panagkaykaysa. Kas dagiti neutral a Kristiano, pinadayawanda ti Namarsuada kas Soberano nga Apo iti amin a sangatauan. (Salmo 100:3) O, dagiti moderno-aldaw a Rafaim​—dagiti napolitikaan a kakabagian ni “Goliat”​—mabalin nga agtultuloyda a mangkarkarit iti naespirituan nga Israel. (2 Samuel 21:21, 22) Ket ti moderno-aldaw a Saul​—dagiti klero ti Kakristianuan​—mabalin nga agtultuloyda a mangrirriribuk kadagiti klase David ken Jonathan. (1 Samuel 20:32, 33) Ngem “ti gubat kukua ni Jehova.” Kas Soberano nga Apo, magun-odannanto ti maudi a panagballigi agpaay kadagiti nasungdo nga ad-adipenna. Gapu ti pannakakitana iti awan pannakikompromisona a takder ti klase David, minilmilion​—iti isuamin a dagdaga​—iti grupo a Jonathan, agraman pay dagiti dati a manangidadanes, ti timmiponen kadakuada iti sidong ti ‘wagayway ti ayat’ ni Kristo.b​—1 Samuel 17:47; Kanta ni Salomon 2:4.

19, 20. (a) Aniada ti sumagmamano kadagiti tampok ti ar-aramid dagiti Saksi kas ipamatmat ti tsart kadagiti panid 4-7? (b) Aniat’ rukod ti panagdakkel dagiti Saksi bayat ti dekada ti 1979-88? (c) Apay a mabalin a maikuna a dagiti Saksi ket tattao a pudpudno a nagkaykaysa iti sangalubongan, ket ania a salsaludsod ngarud ti pinataudna?

¹⁹ Mabalinyo a repasuen ti rumangrang-ay a trabaho dagitoy minilmilion a Saksi babaen ti panangkonsultaryo ti tsart iti pinanid 4-7 itoy a magasin. Iti dekada ti 1979-88, ti bilang dagiti manangikaskasaba ti naimbag a damag ti naipasdeken a Pagarian ti Dios ket rimmang-ay manipud 2,186,075 ingganat’ 3,592,654, maysa a 64.3-porsiento a panagdakkel. Iti sangalubongan, dagitoy ti tattao a pudpudno a nagkaykaysa iti panagririnnanud ti maymaysa a pammati, maymaysa a serbisio iti Dios, ken maymaysa a napamaysa a debosion kadagiti moral a prinsipio ti Biblia. Iti daytoy nasinged nga internasional a grupo ti pagaplikaran ti sasao ni Jesus itatta: “No tungpalenyo dagiti bilbilinko, agtaengkayto iti ayatko, kasla iti panangtungpalko kadagiti bilbilin ni Amak ket agtaengak iti ayatna.”​—Juan 15:10; idiligyo ti 1 Corinto 1:10.

²⁰ Nupay mangaskasabada iti ingganat’ 200 a nagduduma a pagsasao, dagitoy a saksi ni Jehova agsasaoda ti “nadalus a pagsasao” ti kinapudno bayat nga agserserbida iti Dios a “sangsangkatunos.” Iti daytoy, tultuladenda ti naayat nga ulidan ni David ken Jonathan. (Sofonias 3:9; 1 Samuel 20:17; Proverbio 18:24) No saankay pay a nakipagkaykaysa iti ili ti Dios, dikay aya kayat ti agbalin a paset ti moderno-aldaw a klase Jonathan? Mapagbalinyo dayta a kalatyo, ket dagiti Saksi ni Jehova ti mangipakita ti nasged nga ayat a mangtulong kadakayo a makaragpat iti dayta.

[Dagiti Footnote]

Salsaludsod a Pangrepaso

◻ Kasanot’ panangiyebkas ni Jonathan ti panagayatna ken ni David?

◻ Ania a kita ti ayat ti inyanniniwan ti ayat ni David ken Jonathan?

◻ Kasano a nagtignay dagiti klero ti Kakristianuan kas ken Ari Saul idi an-anupanna ni David?

◻ Ania itatta ti kaasping ti ayat ni Jonathan ken ni David?

◻ Aniat’ indemostra ti sangalubongan a panagkaykaysa dagiti Saksi?

[Kahon iti panid 27]

St. Mary’s Cathedral

Sydney

August 20, 1940.

The Rt. Hon. W. M. Hughes, M.H.R.,K.C.,

Attorney General,

CANBERRA.

Dear Mr. Hughes:

Agyamanak iti dagdagus a suratyo idi petsa 9 maipapan iti representasion nga inaramid ni Mr. Jennings, K.P. a maipaay kadakayo.

Siempre, maaapresiar a masapul ti kasta unay a panagannadyo maipapan iti kasta unay ti kinarikutna a banag a kas iti represantasion a naaramid.

Nupay kasta, no ti kakaisuna a panagduaduayo ket gapu iti kinapudno a dagitoy a tattao kunaenda nga isaksaknapda ti Kinakristiano, isingasingko a buyogen ti panagraen a masapul a ti pangngeddengyo iti panangaramidda itoy ket maibatay, saan nga iti panagkunada, no di ket iti kinapudno. Maipaay kadagiti kinapudno, ipaayko dagiti publikasionda a mismo ken dagiti sasao ken ar-aramidda. a pinaneknekan ti Polis iti New South Wales. Aniaman a banag a naikontra iti Kinakristiano, ket narigat a patien.

Ti Commissioner iti Polis iti N.S.W. inyebkasna ti pananginanama a dagiti autoridad iti Commonwealth ideklaradanto ti masuppiat a sosiedad a kas saan a legal a bagi tapno ti Polis maaddaanda iti ad-adda nga epektibo a panagtignay malpapan iti dayta

With every good wish, I remain,

Yours faithfully,

ARCHBISHOP OF SYDNEY