ADONIAS
[Ni Jehova ket Apo].
1. Maikapat nga anak ni David, nayanak ken Haggit idiay Hebron.—2Sm 3:4, 5.
Nupay sabali ti ina ni Adonias, agpadada unay ken Absalom iti ‘kinataraki unay ti langa’ ken iti ambision. (1Ar 1:5, 6; idiligyo ti 2Sm 14:25; 15:1.) Isu naglatak iti rekord ti Biblia bayat ti tawtawen a kumapkapuyen ni David. Iti laksid ti panangideklara ni Jehova a ti kinaari maited ken Solomon (1Cr 22:9, 10), rinugian ni Adonias nga ipasindayag nga isu ti sumaruno nga ari ti Israel. Yantangay natayen da Amnon ken Absalom, ken nalabit uray ni Kileab, awan duadua a ti nakaibatayan ti panangikuna ni Adonias nga isu ti agtawid iti trono ket gapu ta isu ti inauna nga anak. Kas ken Absalom, nangaramid kadagiti naparammag a pakakitaan ti panagpammarangna nga ari ket saan nga inlinteg ni amana. Nangbuangay iti bunggoy a sumuporta kenkuana babaen ti pananggun-odna iti pabor ti pannakaulo ti buyot, ni Joab, ken ti pannakaulo ti kinapadi, ni Abiatar. (1Ar 1:5-8) Kalpasanna, nangangay iti padaya a panagisakripisio iti asideg ti En-rogel, pangasidegen manipud siudad ti Jerusalem, nga inawisna ti kaaduan a kameng ti naarian a sangakabbalayan, malaksid kada Solomon, Natan a mammadto, ken Benaias. Nabatad a ti panggepna ket tapno isu maideklara kas ari.—1Ar 1:9, 10, 25.
Nagtignay a dagus ni Natan a mammadto tapno malapdan ti gandat ni Adonias. Binalakadanna ti ina ni Solomon a ni Bat-seba nga ipalagipna ken David ti insapatana a pagbalinenna nga ari ni Solomon ket kalpasanna sinarunona ni Bat-seba iti siled ti ari tapno patalgedanna ti sasao ni Bat-seba ken ipakaammona ken David no kasano kagrabe ti kasasaad. Kasta met a kasna la imparipirip nga adda ar-aramiden ni David a di ammo dagiti nasinged a kakaduana. (1Ar 1:11-27) Daytoy ti nanggutugot iti lakayen nga ari tapno agtignay, ket sidadaras nga imbilinna a pulotandan a dagus ni Solomon kas kadua nga agturay ken suno iti trono. Nangpataud daytoy iti naariwawa a panagrag-o dagiti umili ket nangngeg dayta idiay pagdadayaan da Adonias. Di nagbayag dimteng ti maysa a tumataray, ti anak ni padi nga Abiatar, nga addaan iti makariribuk a damag a ni David improklamarna ni Solomon kas ari. Nawarawara a dagus dagiti pasurot ni Adonias, ket isu nagkamang iti paraangan ti tabernakulo. Kalpasanna pinakawanen ni Solomon iti kondision a saysayaatennan ti kababalinna.—1Ar 1:32-53.
Nupay kasta, kalpasan ti ipapatay ni David, inasitgan ni Adonias ni Bat-seba ket ginuyugoyna nga agbalin a manangibabaetna iti sanguanan ni Solomon tapno kiddawenna nga agbalin nga asawana ni Abisag, ti agtutubo a manangtaripato ken kadua ni David. Ti sasao ni Adonias a “ti kinaari agbalin koma idi a kukuak, ket ti intero nga Israel inturongda kaniak ti rupada tapno agbalinak nga ari” ipasimudaagna a nariknana nga inikkatda ti kalinteganna, nupay naginkukuna a bigbigenna a ti Dios ti makinggapuanan iti dayta. (1Ar 2:13-21) Nupay mabalin a ti nangibatayanna iti kiddawna ket kayatna laeng a masukatan ti napukawna a pagarian, nabatad nga ipakita daytoy nga agam-ambision pay laeng ni Adonias, yantangay sigun iti pagannurotan iti kadaanan a Daya, ti laeng mangtagikua kadagiti assawa ken kamalala ti maysa nga ari ket ti legal a sunona. (Idiligyo ti 2Sm 3:7; 16:21.) Kasta ti panangmatmat ni Solomon iti daytoy a kiddaw a naidanon babaen iti inana, iti kasta imbilinna ti pannakapapatay ni Adonias, a dagus met a tinungpal ni Benaias.—1Ar 2:22-25.
2. Levita nga imbaon ni Jehosafat a mangisuro kadagiti siudad ti Juda.—2Cr 17:7-9.
3. Maysa ‘kadagiti pannakaulo dagiti umili’ a ti kaputotanna, no saan nga isu a mismo, ket nakiraman iti sumagmamano a prinsipe ken Levita a, babaen iti selio, nangpatalged iti katulagan ti panagipudno nga inaramid dagiti nagsubli nga Israelita idi kaaldawan da Nehemias ken Esdras. (Ne 9:38; 10:1, 14, 16) Kunaen ti dadduma nga isu met laeng ni Adonicam iti Esdras 2:13, a dagiti kaputotanna nga agdagup iti 666 ket nagsubli manipud Babilonia iti sidong ni Zorobabel idi 537 K.K.P. Daytoy ket kasla pasingkedan ti panamagdilig kadagiti nagan dagidiay nangselio iti resolusion iti Nehemias 10 kas pannakabagi dagiti umili ken dagidiay nailista iti Esdras 2 kas pannakaulo dagiti nagsubli a destiero.