DOTAN

Maysa a siudad a nadakamat iti dua a salaysay ti Biblia. Ti Dotan isu ita ti Tell Dothan (Tel Dotan), a masarakan iti maysa a turod iti bassit a pimmalanggana a tanap nga adda iti nagbaetan dagiti turod ti Samaria ken ti Kabambantayan ti Carmelo, 16 km (10 mi) iti amianan nga amianan-a-daya ti Samaria.​—LADAWAN, Tomo 1, p. 950.

Ni agtutubo a Jose nasarakanna “idiay Dotan” ti kakabsatna ken dagiti arbanda. Mabalin nga addada idi iti amianan dayta a siudad, iti pagpaaraban a lumasatan ti dalan a namagsilpo iti Galaad (daya ti Jordan) ken ti kosta ti Mediteraneo agraman ti Egipto. Mabalin a daytoy ti ruta a dinaliasat ti “sangkakuyogan a managbiahe nga Ismaelita” a nanggatang ken Jose.​—Ge 37:17-36.

Sinigsiglo kalpasanna, ti ari ti Siria nangibaon iti dakkel a puersa militar idiay Dotan a mangaresto ken Eliseo. Sadiay a simimilagro a nalukatan ti matmata ti mabutbuteng a katulongan ti mammadto tapno makitana ti umap-apuy a pakigubat nga alikamen ti Dios iti “nakabambantay a rehion . . . iti intero nga aglikmut ni Eliseo,” kayatna a sawen, mabalin nga iti met laeng turod nga ayan ti Dotan wenno iti kabangibang a turturod iti daya, abagatan, ken laud ti Dotan. (2Ar 6:11-17) Idi a dagiti Sirio pinalawlawanda ti siudad, mabalin a nagpuestoda met kadagitoy a turod iti aglikmut, ket kalpasanna ‘simmalogda’ idi rimmuar ni Eliseo iti siudad tapno sabtenna ida. Nupay kasta, saan a nangdangran dagiti puersa ti kabusor idi simimilagro a nagpasarda iti maysa a kita ti kinabulsek, a nalabit inaramat ni Jehova dagiti anghel a mangibanag iti daytoy.​—2Ar 6:18, 19; idiligyo ti Ge 19:1, 10, 11.